Read tetala Undaki 11 Bible Online

Undaki 11 - tetala bible

Undaki 11

¹Ukadja ma diaye la diku diʼashi, ne dia we ayuditana lʼokongo a nshi kambi.

²Udikahanya le esambeli kana le enanei, ne dia we heyi kolo kakona kayuya lu kete.

³Lamʼatululaka wangi la ashi, vo watoloshaka mvula la kete. Lamʼatunyukoka utamba utsha la diku dia kushi kana utsha la ngelʼa kushi, vo watutshikalaka lu dihuli diakawakwe.

⁴One latendaka lopepe hune, la one latendaka wangi hani.

⁵Uku ahayeyi mbuka ka lopepe, ndu uku ahayeyi wuhu atuhamaka weka lʼutema wa kanga diemi, osoku mbahayeyi ulimu wa Unyashungu, latutshaka akambu tshe.

⁶Uneki wuhu aye la pindju. Tushaki lunya laye mumuya la dikolo, ne dia we heyi kana kene kana keku kayuluwana, kana vo ahendi wayula ololo.

⁷Usasi eko dimena, ashu ngenangenaka dia mena unya.

⁸Naka untu ayulumba deku efula, ndi angenengene lu deku diako. Keli ndi uhoki nshi ya udjima, ne dia vo yayuyala efula. Kene tshe katuyakaka, keli anyanya.

⁹Olongo a pami li, ongenangenaki lu nshi yaye yʼolongolongo. Utema aye akongenyangenyaki lu nshi yaye yʼolongolongo. Okendakendaki lu saki yʼutema aye ndu lu nangu ya ashu aye. Keli eyi wati: Lu akambu ane tshe, Unyashungu ayuketa lu elumbwelu.

¹⁰Okone unya lunyangu uma lʼutema aye ndu kolo uma lu dimba diaye, ne dia nshi yʼetatelu ka lumu yʼolongolongo yeli anyanya.