Read tetala Undaki 12 Bible Online

Undaki 12 - tetala bible

Undaki 12

¹Okone uhoki utungi aye lu nshi yaye yʼolongo a pami, ntundu nshi ya kolo yatakuki, ndu Jeku diatasukana diayuyuta wati: Dimi halongenangena ladio.

²Ntundu unya, usasi, ngondo la toto watadimala, la wangi watakalula lʼokongo wa mvula;

³ntundu ka lushi layudidima alami wa luudu, layukutama apami wa wulu, ndu layuheko atoshi ne dia vo kema efula, layuyala ashu a wane watendaka uma lu adidishi enguli;

⁴ntundu ka lushi layudihama kuki ya suku diʼosese, layukitakita lundju lʼetwelo, layunela untu la limbu la fudu, ndu layu-kitshakitshama ana amantu watimbaka esambu;

⁵ntundu ka lushi layuwuka akambu wa lʼulungu woma, la woma wa mamba wayuyala lu mbuka, la utamba wa amande wayoto alembo, ndu dikata diayuyala wutshu, la saki yayushila ne dia untu, ne dia untu lutsha ntsho utsha lʼedjaselu kandi ka pundju; la asi utanda wayeteta lu esese;

⁶ntundu okodi wa fesa atahimbo, kana donga dia paunyi diatule, kana mbaka atule lu eteko, kana utshimbi watukutulaka ashi uma lu difuku atahimbo;

⁷ntundu ditshu diatakalula lu kete, lene akidio, la lumu latakalula le Unyashungu lakawushalo.

⁸Anyanya wʼanyanya, mbata Undaki, tshe eko anyanya.

⁹Dikambu dikina, ne dia Undaki aki kanga yimba, ndi akatetemala mbetsha antu ewu. Ndi akayangi, akakani yimba, akakondola tukedi efula.

¹⁰Undaki akayangi aui wʼamena, akafundi aui wa mete la utema wʼusimbwi.

¹¹Aui wa kanga yimba weli uku atende, la ului wa tukedi wʼuma le ulami otoi weli uku seti yokokomadi wulu.

¹²Onʼami, ewo akambu akina ladiku dia ane. Efundelu kʼabuku hashili; wekelu efula nkomolaka dimba.

¹³Akambu tshe wambukema, nyulungi ekumelu ka dikambu. Uki Unyashungu woma, ulamaki elembe andi. Oso eli okende wʼuntu tshe.

¹⁴Unyashungu ayela akambu tshe lʼelumbwelu, ndu akambu wushami kana ololo kana kolo.