Read tetala Undaki 3 Bible Online

Undaki 3 - tetala bible

Undaki 3

¹Engo tshe keko la etena kato, dikambu tshe lʼesi ulungu dieko la etena kadio:

²etena ka mbuto la etena ka mvo; etena ka mune la etena ka muna;

³etena ka ndjaka, la etena ka nkonoya; etena ka mpandjula, la etena ka mpika;

⁴etena ka ndela, la etena ka mbola; etena ka utanda, la etena ka no wenyi;

⁵etena ka mbikadja ave, la etena ka nsanganya ave; etena ka nkhumbatanela, la etena ka nkimo nkhumbatanela;

⁶etena ka nyanga engo, la etena ka nshisha; etena ka mumba, la etena ka mbikadja;

⁷etena ka mbatshatsha, la etena ka ntela; etena ka nembohala, la etena ka nteketa;

⁸etena ka mbukana ngandji, la etena ka mpetshana; ndu etena ka ta, la etena ka ki.

⁹Waho akona watukundjaka one latukambaka uma lu pa kandi?

¹⁰Dimi lakenyi ulimu wakasha Unyashungu antu dia vo ntsha.

¹¹Ndi akatungi engo tshe dimena lu etena kato, ndi akasha antu tshe kanyi ya pundju lu etema awo. Keli wuhu wahakuki untu mbeyaka ulimu watutshaka Unyashungu uma lʼetatelu utsha lʼekumelu.

¹²Keli dimi mbeyaka nti: Nduku diese diuleki le wo, uku ngenangena la ntsha ololo lamʼekiwo la lumu.

¹³Ushasha wa Unyashungu le untu tshe one: nde, no la ngenangena lʼulimu andi.

¹⁴Dimi mbeyaka nti: Kene tshe katutshaka Unyashungu, kayutshikalaka pundju: nduku layahe, ndu nduku layunya. Unyashungu kambutsha okone diʼantu mbuka woma la ntundu kandi.

¹⁵Akambu wa kakiane, wakiko edjedja; la kene kayuyala nshi kina, kambuyalaka. Unyashungu atukaluyaka kene kaketi.

¹⁶Dimi lakenyi ntu lʼesi ulungu nti: Lu dihuli diʼelumbwelu kolo keko laawo, la lu dihuli dia sambu kʼololo kolo keko laawo.

¹⁷Dimi lakati lʼutema ami nti: Unyashungu ayulumbuya antu wʼololo ndu antu wa kolo; ne dia dikambu tshe la ulimu tshe weko la etena kawo.

¹⁸Dimi iakati lʼutema ami lu dikambu diʼantu nti: Unyashungu atuwaedikaka dia mbaenya ati: Nyama mbewo,

¹⁹ne dia dikambu diatuyakaka le untu, ndu ne diatuyakaka le nyama, dieko pupu. Uku atuvokaka omotshi, mbatuvokaka ukina. Vo tshe weko la lumu wuhu otoi. Untu haleki nyama; ne dia tshe eko anyanya.

²⁰Vo tshe watutshokaka lu dihuli diame. Vo tshe wakatungama uma lu ditshu, okone vo tshe watukalulaka lu ditshu.

²¹Akona eya kana lumu lʼuntu latumbelaka utsha lʼulungu, kana lumu la nyama mbatuhuloka lʼesi lu kete?

²²Osoku dimi lakenyi nti: Nduku engo kuleki ololo le untu, uku dia ndi ngenangena lʼulimu andi. Oso eli etenyi kandi. Akona ayuwela ntu dia ndi ndjena akambu wayutshama lʼokongo andi?