Read tetala Limbu la Solomona 1 Bible Online

Limbu la Solomona 1 - tetala bible

Limbu la Solomona 1

¹Limbu la kimbu ya Solomona lone.[1]

²Ononani la mi lu enonelu kʼunyo aye, Ne dia ngandji ndeka wanu ololo.

³Malashi aye weli la upumu wʼololo. Lukumbu laye leko uku malashi wa lomonga, Diako mbatukulangaka esekaseka wʼamantu.

⁴Unkutuli lʼokongo aye, tulawo esadi! We khumʼekanga ambombotshiya lu mvudu yaye ya lʼatei. Shu tayukaka olo, tayongenangenaka la ye. Shu tayundulaka ngandji kaye uleki wanu. Dikambu dimotshi dieko, diatuwukukaka ngandji.

⁵Ana amantu wa la Jerusalema li! kuyanga mbayami udima, dimi leko dimena, Uku mvudu yʼapema ya la Kedara, uku dikuhu dia koi dia Solomona!

⁶Tanyudjaki tukanyi tanyu ne dia lowa lami lambuyala udima, Ne dia yanyi mbakanunguya wuhu uku. Analingu wʼapami wakuto la mi utema otoi, wakambuki kele. Vo wakambete ulami wa dikambo dia vinyo. Keli dimi kunama ekambo kami ka vinyo.

⁷We latumulangaka lʼutema, umvuteli Lene atuyuleshaka dungalunga diaye, Lene atuyudiumuyaka unya lʼatei ote. Okoko wana wakukimi ntekekoka Lʼatei a nyimba ya dungalunga diʼanyaye?

⁸We luleki amantu dimena, naka we heyi, Uyeli wanya wa dungalunga. Utulesha anʼaye wa mbudi Lasuki la mvudu yʼalami wʼekoko.

⁹Dimi lambukufanya, we wademi la ngandji, La falasa ka wadi, katuwukelekaka lu pusupusu ya ta ya Farayo.

¹⁰Atama aye weko dimena lʼatei a dengalenga, Kingu kaye dimena lʼatei a sangi yʼadidi.

¹¹Shu tayukutshela dengalenga dia paunyi, Kame la tukama ta fesa.

¹²Lamʼakayadjashi, we khumʼekanga, lu mesa aye, Malashi ami wakatumbi upumu.

¹³Ulangimi ami, eko uku tshapa ya malashi le mi, Yatolendalendaka lʼasa awele ami.

¹⁴Ulangimi ami, eko uku ekanda kʼalembo le mi Kʼuma lu dikambo dia vinyo dia la Ene-Ngedi.

¹⁵Ndi dimena diaye, we wademi la ngandji, we eko dimena! Ashu aye weli uku fudu ya binga.

¹⁶Ndi dimena dieye, we umemi, we eko dimena! Tangi kasu keko eleselese.

¹⁷Esimbi wa lu luudu lasu weli esasi, La aleka asu weko weoto.