Read tetala Limbu la Solomona 4 Bible Online

Limbu la Solomona 4 - tetala bible

Limbu la Solomona 4

¹Ndi dimena dieye, we wademi la ngandji, we eko dimena! Ashu aye weli uku fudu ya binga Lʼedia dihondo diukumbiye. Divu diaye dieko uku limba la mbudi, Mbayahulo uma lʼukungu wa Ngiliyade.

²Anyu aye weko uku limba lʼekoko lanyishawo diosa, Mbayawandi uma lʼeokelo. Vo tshe mbutaka ahendi ahendi, Nduku otoi lʼatei awo weli la okei.

³Elomo aye weko uku ushinga wa tilili, Unyo aye weko dimena. Atama aye weko uku betshi diʼekomi kʼutamba Lʼedia dihondo diukumbiye.

⁴Kingu kaye keko uku etangelu kakahiki Davidi, Dia nkitsha diango dia ta. Loko kalendalenda dingawu dia tshitshe dinunu, Dingawu dia waki tshe dia ahuka.

⁵Awele aye weko uku ana ahendi wa lufumbo, Uku ana ahendi wa lufumbo otoi, Watolekaka lʼatei a waka.

⁶Dimi layutsho utsha lʼukungu wa mura, Utsha lu dikuna dia malashi, Edja ndu yanyi yambutshuta, la aledi wambutalo.

⁷Wademi la ngandji li, we eko dimena dimba tshe! Dimba diaye kema la ekomo.

⁸Yaka la mi uma la Lebanona! Endi uma lʼote wa Amana, Uma lʼote wa Senire, ndu wa Heremona, Uma lu ahuli watetamaka tambwe, Uma lʼekungu watuyalaka koi.

⁹We ambumbata utema, we kadiyemi, wademi. We ambumbata utema lu endelu kaye otoi, Uma lʼelengalenga otoi keli lu kingu kaye!

¹⁰We kadiyemi, wademi, ndi ngandji kaye dimena li! Ngandji kaye ndeka wanu ololo. Upumu wa malashi aye ndeka wehu tshe wa malashi dimena!

¹¹Wademi li, elomo aye watuselaka usanga! Usanga la awele weko lʼesi a lulimi laye. Upumu wʼeloto aye weko uku upumu wʼuma lu Lebanona.

¹²We kadiyemi, wademi, eko ekambo kudingami lukumbu kwi, Eteko kudihami khu, ushima wudihami lʼematelu.

¹³Songusongu yaye yeko uku ekambo kʼetamba wa dikomi, Weli la elua wʼololo, Uku ekambo ka tutambatamba tʼupumu wʼololo tatuwutshaka dangi dia tilili,

¹⁴Tutambatamba ta malashi ndu teli la elembo wʼupumu, Ediu wa tutambatamba tufanyi la sopo, Etamba wa kinamona kame la etamba tshe watuwutshaka malashi, Mura la uhidi, Kame la wehu ishe wa diango diʼepumu wuleki dimena.

¹⁵We eko uku ushima wa dikambo, Eteko kʼashi wakela, Tokedi tatokelaka uma la Lebanona.

¹⁶Lopepe uma la ngelʼa kushi emo, lopepe uma la diku dia kushi opepe! Nyopepe lu ekambo kami, dia epumu ato nyangana! Umemi la ngandji, oto lʼekambo kandi, Ayuli elua wa loko wʼamena.