Read tetala Isaya 14 Bible Online

Isaya 14 - tetala bible

Isaya 14

¹Latuyalaka ayuka Jakoba ketshi, ayosonola Isariyele ntu, ku ndi ayashikike lu kete yawo ntu. Angendangenda wayosohana la wo, la wayekesanela la luudu la Jakoba.

²Ku antu wayuwanda, wayatola lu ahuli awo. Luudu la Latuyalaka layuyala akanga awo, lu kete ya Latuyalaka, uku fumbi yʼapami la uku fumbi yʼamantu. Vo wayulunga wane wakalungaka fumbi, ndu wayulela wane wakasuyaka.

³Lu lushi loso, Latuyalaka ayukusha mumuya uma lu lunyangu laye, uma lu pa kaye, la uma lʼulimu wakawakukambiaka la khudu.

⁴We ayimba usambu wa monyola khumʼekanga ka Babilona wati: Kanga ngala kema ntu! Usumba a paunyi ambushila.

⁵Latuyalaka ambokola ukalimba wʼantu a kolo, Danga dia diulelu dia ambuledi,

⁶Wakakomolaka antu lu ududu, La dikomodi diaha mpeko, Wakulela wedja la kele, Wakasuyaka antu lʼukunda.

⁷Kete tshe yambuyala la mumuya ndu la ki. Wambutundo la kimbu yʼongenongeno.

⁸Etamba wa weoto wambongenangena dia ekwelo kaye, Esasi wa la Lebanona wambuta vati: Umaka etena kakayako, Nduku okotshi ambuya dia ndjutokota.

⁹Udimu a Pengandu ambusaka lukumbu pulu ndu lʼehongo awo, Dia ndjukulungula lamʼayayayi. Vo wayuketwela djimu, ewandji a waki wa la kete. Vo wambunyiya khumi ya dikanga ya lu wedja uma lu kiti yawo ya waulelu.

¹⁰Vo tshe wayukumbula vati: Ndu we kambuyala wodu uku shu! We ambufana la su!

¹¹Lutumbu laye lambuhulo utsha lʼUdimu a Pengandu, Kame la lundju la sese yaye. Kusu yambuyala tangi la tshina diaye, Ndu kusu yambuyala ulangitshi aye.

¹²Ndi wuhu wamboyoko uma lʼulungu,[40] We Yoto ya Pindju, onʼa Ehutwelu li! Ndi wuhu wambuyoko la kete, We lakalembiaka wedja li!

¹³We kakataka lʼutema aye wati: Dimi layumbela utsha lʼulungu, Layedia kiti kami ka diulelu ladiku dia toto ta Unyashungu. Dimi layudjase lʼukungu wa lusanganya, Utsha lu kuma ka ngelʼa kushi.

¹⁴Dimi layumbela ladiku dia wangi, Layuyaete uku KhumʼUlungu.

¹⁵Keli we ambukadjema lʼUdimu a Pengandu, Ka tshina dia Difuku diʼohongo.[41]

¹⁶Wane watukenaka, watukendaka tee, Watumbwanaka vati: Aha untu uku kakadidimiaka kete? Kakasutshasutshaka waulelu?

¹⁷Aha ndi kakete andja shenga, Kakalembiaka esumba, Ndu kaki kuntshungulaka asi lukanu?

¹⁸Khumi ya dikanga tshe ya lu wedja yayetama la lutumbu, Vo tshe untu lʼuntu lu diumbu diandi.

¹⁹Keli le ye, we ambukadjema uma lu diumbu diaye, Uku lutahi la wononyi, Uku ahondo wʼantu wakadiakema la tombo, Ndu wakakadjema lu ave wa lu Difuku, Uku udu wahotshahotshama lʼekulu.

²⁰We kunkhundama kame la wo lu diumbu, Ne dia we akalanya kete yaye, We akadiaki antu aye. Hawudimulaki diuhu diʼantu wa kolo pundju!

²¹Nyolongosole dihuli dia ndjaka anʼandi, Ne dia kolo ka watshewo. Vo watukunela dia mbulela kete, La watukufulanela lʼandja.

²²Dimi layunela dia ndo la wo, mbata Latuyalaka Kanga lulimbilimbi. Dimi layulanya lukumbu la atshikadi wa la Babilona, anʼandi la akanandi, mbata Latuyalaka.

²³Layete usumba ako eduwa wʼashi ndu edjaselu ka biku. Dimi layuwomba la lombo lʼelanyelu, mbata Latuyalaka Kanga lulimbilimbi.

²⁴Latuyalaka Kanga lulimbilimbi akatshibi ati: Mete, kene kakamakani, kayuyala; La kene kakamasanguya, kayushikikala.

²⁵Dimi layowediawedia usi Asuriya[42] lu kete yami, Layohotshahotsha lʼakaka ladiku diʼekungu ami. Ku lokoho landi layumo uma ladiku diawo, La ushiko andi uma lʼaheka awo.

²⁶Oso eli esangweyu kakasangweyama ne dia kete tshe. Oso keli lunya lusimbwami ladiku dia wedja tshe.

²⁷Latuyalaka Kanga lulimbilimbi kaksanguya erangweyu kene, eya nkifutanya? Lunya landi lambusimbo, eya lokonye na?

²⁸Lu eleku kakavu khumʼekanga Ahaza,[43] kakenama enelo kene ati:

²⁹Nyu wudja tshe wʼasi Filistiya,[44] tanyongenangenaki, Ne dia ukalimba wakanyokomolaka wambuhimbo, Ne dia uma lʼudiu wʼului kayutumba dikhuha, La ulua awo ayuyala kunga ka dja, kafumbo.

³⁰Wane wuleki wula, wayolekaka ma, La ehumbi wayetamaka la ki. Dimi layudiaka udiu aye la ndjala, Ndu asikaye wutshikadi, wayudiakema.

³¹Suku li, uleli! we usumba, udi kuku! Nyu asi Filistiya tshe nyuteko la woma! Ne dia dinga diambutumba la ngel a kushi. Enongo wʼalimoi wʼutunyi weko khukhu.

³²Na diui diayuwukaluya le akendji wa wudja? Latuyalaka kakaki Siona, Amenyi fono wa lu wudja andi wayutana eshamelu loko.