Read tetala Isaya 17 Bible Online

Isaya 17 - tetala bible

Isaya 17

¹Enda, Damasekea[46] huyala usumba ntu. Vo wayuyala uku tuta diʼelanyelu

²Esumba wa Aroere wambukalema, Wambukimwama le dungalunga. Dio diayetamaka leko, ku nduku untu ayudiutsha woma.

³Lukumbu lʼave lʼEfarayima layunyuko. La diulelu dia Damaseke diayushila. Ku atshikadi wa la Suriya wayuyala uku lutumbu lʼasi Isariyele, Mbata Latuyalaka Kanga lulimbilimbi.

⁴Lushi loso, lutumbu la Jakoba layukitakita, Ndu dimba diandi diayonda.

⁵Dikambu diako diayuyala uku atunaka umunyi epunga, Ndu uku atuhimbulaka lunya landi disha. Dikambu diako diayuyala uku atuwusanganyaka disha LʼUkidi wa Refayima.

⁶Elua emotshi wayutshikala leko, uku atutshikalaka mbeli, Hyendi kana shatu, ka shodi lamʼatuwusutshasutshaka utamba wa mbeli, Nyei kana tshanu lu tahi yawo yatotokaka elua, mbata Latuyalaka, Unyashungu wa Isariyele.

⁷Lushi lako antu wayenda utsha le Utungi awo, ndu ashu awo wayolemia lʼEkila lʼlsariyele.

⁸Vo hawenda utsha lu diakelu ntu, ulimu wʼanya awo, kuyanga nemia diango diakatshi pita yawo, kuyanga kinda ya WaAshera, kana difanelu dia unya.

⁹Lushi lako, esumba awo a wulu wayuyala uku ahuli wakalanyema lʼatei ukunda ndu lʼete wʼekungu, ahuli wakawatshiki dia ndawo asi Isariyele. Ku ahuli ako wayutshikala atongo atu.

¹⁰We akuhela Unyashungu a panda kaye, We kumbuho Dive dia eshamelu kaye. Okone we akasekola esango wʼamena lʼekambo, Akune esango wʼuma lu wedja loko.

¹¹Lamʼakayayuweune, we ambedinga lukumbu, Ku wediʼa pindju, we ayuyetundja alembo. Keli dinela diayushisho tshe Lu lushi lʼokei la lunyangu la wulu.

¹²Yee! lundju lʼantu efula loso. Lufungusu lawo leli uku luhelu lʼashi a waki. Yee! lundju la wedja loso! Dikita diawo dieli uku dikita diʼashi a wulu.

¹³Wedja wambudikita uku atudikitaka ashi a waki, Keli ndi ayahangwela ku vo wayulawo etali, Uku puhudi yatembamaka la lopepe lʼekungu, Uku ditshu diatembamaka la lopepe la wulu.

¹⁴La dikolo, enda woma wa mamba! Ntundu unya atahuto, ku vo kema ntu! Oso eli etenyi ka waku watutusuyaka, Ndu difutu dia waku watutohotolaka diango diasu.