Read tetala Isaya 19 Bible Online

Isaya 19 - tetala bible

Isaya 19

¹Enda, Latuyalaka lahemi lu dingi diateti esadi, Ambuya uya lʼEdjibitu.[48] Dikishi dia lʼEdjibitu diayudidima la ntundu kandi, La etema wʼasi Edjibitu wayuyala ashi atu.

²Dimi layotombosha asi Edjibitu dia vo ndosha asi Edjibitu. Vo tshe wayoloshanya untu lʼonangu, Ndu untu lʼuntu la unyandi, Usumba lʼusumba, diulelu la diulelu.

³Etema wʼasi Edjibitu wayushila wulu. Dimi layufutanya sangweyu diawo. Ku vo wayutumbula dikishi, akanga wʼaloho, Wane watoteketshaka djimu la wane watendjaka wetshi.

⁴Dimi layukimo asi Edjibitu lʼanya wa kanga ngala. Khumʼekanga ka djawudi ayuwaulela, Mbata Khumadiondjo Latuyalaka Kanga lulimbilimbi,

⁵Ashi wa Nile wayuma tu, Okedi ayuma, ayuyala ditshu tu.

⁶Wetshiya ato wayuyala sulu; Ekedi walambula Nile lʼEdjibitu wayukitakita, wayuma Kungu la asopo wayolengela.

⁷Ahuli wa hwe waha la adiyu, mbayuyala lʼukidi wa Nile. Kene tshe kakawune lʼemamu a Nile kayuma, kayukadimo ditshu. To kayembama la lopepe, hakienama ntu.

⁸Amundji wa nsi wa lu Nile wayulela, wayuda tukuku, Wane tshe watukaka todi lu Nile. Wane watudjaka etei lu ashi wayuyala la lunyangu.

⁹Waku watutshaka eshinga wa linene, La watutshaka ahondo wa wema wayukanana.

¹⁰Waku weli dikoho dia la kete, wayatshatshema. Asi elimu tshe wayuyala la etema wʼokei.

¹¹Ewandji wa la Zoana weli dinginya. Aui wʼandaki wa yimba wa Farayo wambuyala anyanya. Ukundi, eyanyu mvutela Farayo nyati: Onʼa usi yimba kemi, ona aki khumi ya dikanga yʼedjedja?

¹²Lendʼeli asi yimba aye? Wakuteli, wakulimbitshiya kene kakasanguya Latuyalaka Kanga lulimbilimbi dia ntshela Edjibitu.

¹³Ewandji wa Zoana wambuyala dinginya, Ndu ewandji wa la Memifi wambukesama. Waku weli ete a wauhu wambunyangiya Edjibitu.

¹⁴Latuyalaka akadianganya lumu lʼuhukusanu lʼatei awo. Vo wakasukusukuya asi Edjibitu lu tumu yawo tshe, Uku atusukosukoka umbidjoki lamʼatuwondi.

¹⁵Akambu wakatshaka ote kana wela, dianga kana sopo, Hawuyeyama ntshama ntu lu Edjibitu.

¹⁶Lu lushi loso, asi Edjibitu wayuyala uku amantu. Wayudidima la woma, lamʼayeteta lunya la Latuyalaka Kanga lulimbilimbi ladiku diawo.

¹⁷Asi Edjibitu wayuka wudja wa Juda woma wa mamba. One tshe ladimula lukumbu la wudja ako, ayuka woma efula, ne dia esangweyu kakasanguya Latuyalaka Kanga lulimbilimbi dia ntshela Edjibitu.

¹⁸Lʼetena keso, esumba etanu wa lu kete yʼEdjibitu wayoteketa oteketa wa Kanana, wayutshiba dia mbekama le Latuyalaka Kanga lulimbilimbi. Omotshi ayetama ati: Usumba wʼelanyelu.

¹⁹Kʼetena kako, vo wayuhikela Latuyalaka ediakelu lʼatei a wudja wʼEdjibitu, wayuhikela Latuyalaka ekoho lʼumamu wa kete yako.

²⁰To kayuyala djimbitelu la omenyi le Latuyalaka Kanga lulimbilimbi lu kete yʼEdjibitu. Vo wayulelela Latuyalaka ne dia asuyanyi, ku ndi ayatumela ushimbedi la umamedi dia mbatshungula.

²¹Latuyalaka ayeyama lʼEdjibitu, ndu asi Edjibitu wayulimbitela lʼetena kako, ee, vo wayote-mola la elambu wa nyama la wa diango. Vo wayutshikela Latuyalaka tunyi, ku wayudishikike.

²²Latuyalaka ayokoi nola asi Edjibitu, ajakomola, ku ayakonoya. Vo wayukalula le Latuyalaka. Ndi ayuwaukela ayakonoya.

²³Lu nshi yako, osese a wuki ayuyala uma lʼEdjibitu pulu lʼAsuriya. Asi Asuriya wayutshokaka utsha lʼEdjibitu, la asi Edjibitu utsha lʼAsuriya. Asi Edjibitu la asi Asuriya wayotemolaka Latuyalaka kame.

²⁴Lu nshi yako, Isariyele ayuyala diulelu dia satu, kame lʼEdjibitu la Asuriya. Otshoko wayuyala la kete,

²⁵ne dia Latuyalaka Kanga lulimbilimbi akatshokola, ata ati: Edjibitu, wudja ami: la Asuriya, ulimu wʼanya ami; ndu Isariyele, ukito ami, watshokwami!