Read tetala Isaya 22 Bible Online

Isaya 22 - tetala bible

Isaya 22

¹Na dikambu ne, diambunyumbela nyu tshe lʼete a mvudu,

²We usumba wa yengeliyengeli, Wuludi too la lundju, ngelu kʼongenongeno? Antu aye wuvwi, kundjakema la tombo kuyanga mvo lu ta.

³Ewandji aye tshe wakalawo kame, Wakandama le waku waki kundjala la eta. Waku tshe wakakukaka ngandji, wakakelekama kame, Kuyanga vo wakalawo etali.

⁴Okone dimi lakati nti: Nyunya ashu uma le mi, dimi lutsha ndela kuku ya wulu. Tanyutetemalaki nsambami Lu elanyelu kʼona umuntu a wudja ami.

⁵Khumadiondjo, Latuyalaka Kanga lulimbilimbi eko la lushi, Lushi lʼohenyohenyo, lʼehotshehotshelu, Ndu lʼukananu lʼukidi wʼenelo. Lo laki lushi lʼehandjwelu ka kumbu, Ndu lʼalelu a wulu lʼekungu.

⁶Asi Elame wakahakata ekulu wa pitu, wakalongosola Pusupusu yʼandoshi wa ta, la ambahemi wa falasa, Ndu asi Kire wakatundja dingawu diawo.

⁷Pusupusu yanyu ya ta yakaluli lu ekidi wʼamena, Ku ambahemi wa falasa wakemala lu asuku anyu.

⁸Ndi akanya ukumbo wa Juda. Lushi lako nyu nyakenyi diango dia ta dia lu luudu la lʼukunda.

⁹Nyu nyakenyi ahuli wakalanyema lʼusumba wa Davidi, nyati: Efula kawo. Ku nyu nyakalongosola djuwaduwa yʼashi wa lʼesi.

¹⁰Nyu nyakali efula ka mvudu ya la Jerusalema, nyakayihandjula dia nkikitsha eheli ka lukumbu.

¹¹Nyu nyakatshi djuwaduwa kina yʼashi lʼasa peli pendi dia lukumbu, ne dia ashi wʼuma lu djuwaduwa yʼedjedja, keli nyu kumenda le one lakatshi dikambu ne, kuyanga nemia one lukadisonela edjedja.

¹²Lushi lako, Khumadiondjo, Latuyalaka Kanga lulimbilimbi, Akanyeti dia nyu ndela la ndjakomola lu tulu, Dia nyu minya divu la ndota akutu.

¹³Keli nyakangenangenaka, nyakatamanya ngenangena! Nyakadiaki ngombe la ekoko, Nyakali unatshi, nyakano wanu nyati: Tuli, tono ne dia tayuvo lui.[50]

¹⁴Ku Latuyalaka Kanga lulimbilimbi akamvutela ati: Mete, edja ndu lamʼayunyuvo, kolo kene hudimanyema le nyu, Mbakati Khumadiondjo, Latuyalaka Kanga lulimbilimbi.

¹⁵Okone mbata Khumadiondjo, Latuyalaka Kanga lulimbilimbi ati: Uneli, utshu le Shebina, ulami wa luudu, utuwumbuli wati:

¹⁶We layatshimela diumbu lu dihuli dia ladiku, layaselela edjaselu lu dive, katshaye lane na? Akona eli la ye lane? Na dikambu diatshimaye diumbu lane?

¹⁷Enda, we kanga wulu, Latuyalaka ayukulimbula la wulu. Ndi ayukukimela wulu,

¹⁸ayukomba wombo, ayukuka uku pundi lu kete ya hwe. We ayutuvo leko; pusupusu yaye ya ta yʼamena yayuyala leko, we ako leli sonyi ka luudu lʼuwandji aye!

¹⁹Dimi layukukitshakitsha uma lu dihuli diaye, layukutshanya uma lʼulimu aye.

²⁰Lushi lako, dimi layeta ukambi ami Eliyakima onʼa Hilikiya.

²¹Dimi layuwudja ukutu aye, layolotsha uya aye. Dimi layukikitsha, layukimo wulu aye lu anya andi. Ndi ayuyala shi asi Jerusalema, ndu luudu la Juda.

²²Dimi layuwusha sapi ka luudu la Davidi. Lamʼayundudihula, nduku layudiha, lamʼayundudiha, nduku layudihula.[51]

²³Layushikike uku seti ka-hasukasuka. Ku ndi ayuyala kiti ka lutumbu lu luudu la shi.

²⁴Ndi ayuyala usuko wa lutumbu tshe la luudu la shi, ndu wʼana wa luta ndu wʼantu kʼantu, wa diango tshe diʼulimu uku mbaka la akoho.

²⁵Keli lu lushi lako, seti kako kakawashikike lu dihuli dia wulu, kayuhiko, mbata Latuyalaka Kanga lulimbilimbi. To kayolembiama, kayoko. Ku wutshu tshe wakahanemi ladiku diato, wayulanyema, ne dia osoku mbakati Latuyalaka.