Read tetala Isaya 23 Bible Online

Isaya 23 - tetala bible

Isaya 23

¹Enelo lu dikambu dia Tura.[52] Nyu mashua wa la Tarashishi, Nyudi tukuku ne dia Tura ambulanyema. Nduku luudu, nduku eotwelo kekiko. Vo wambuyeya dikambu so lu kete ya Kupiro.

²Nyuyali ki, nyu wane wudjashi lʼumamu wʼashi a waki, Nyu asumbishi wa la Sidona, Akendji anyu wakatakindulaka efula Ladiku diʼashi a waki dia nkutsha ehumba anyu.

³Ekundjelu kanyu kaki epunga wʼuma la Shihoro, Ee, dinela diʼuma la Nile. Nyu mbaki esumbisha a wedja.

⁴We Sidona, uvu sonyi, ne dia ashi a waki wamboteketa, Ee, wumbe wa ta wʼashi a waki vati: Dimi kuntata lono kuyanga mbuta ona. Dimi kundeshaka elongo wʼapami Kuyanga mbudia esekaseka wʼamantu.

⁵Lamʼayukuma lukumu lone lʼEdjibitu, Vo wayuyala la okei dia mbuka lukumu lʼelanyelu ka Tura.

⁶Nyu wane watudjaseka lʼumamu wʼashi a waki, Nyuleli wulu, nyeti utsha la Tarashishi.

⁷Aha usumba anyu wʼongenongeno oso, Wakatatela uma lu nshi yʼedjedja, wakawasekola etali?

⁸Akona akasanguya ntshela Tura, lakahaneka alembo wa kusu, Laki la esumbishi waki ewandji, Laki la ambetshetshi wʼukunda wa lukumu wa la kete, dikambu ne na?

⁹Latuyalaka Kanga lulimbilimbi kakasanguya dikambu diako, Dia monyola utaku tshe wa waku weli la lutumbu, La dia mbutsha antu a waki tshe wa la kete sonyi.

¹⁰Ulekani kete yanyu uku Nile, we ona umuntu a Tarashishi, Ne dia dihuli diakanyashamaka diakalana.

¹¹Latuyalaka akasimbula lunya landi ladiku diʼashi a waki. Ndi akasutshasutsha waulelu. Latuyalaka akadjanga dia nanya Kanana, Lu ahuli a wulu wʼusumba.

¹²Ndi akati ati: We hongenangena, we usuyanyi, ona umuntu a Sidona! Unela, utshu utsha la Kupiro. Ndu leko we huyala la mumuya.

¹³Enda kete ya Kaladiya. Yo yeko wudja; yo kema Asuriya. Vo mbakatshikela nyama ya ngala Tura. Vo wakalanya mvudu yawo ya waulelu. Vo wakahiki tangelu diawo, wakalanya usumba ako.

¹⁴Nyu mashua wa la Tarashishi, nyudi tukuku, ne dia usumba anyu a wulu wambulana.

¹⁵Lʼetena keso, lʼatei wa deku akumi esambeli Tura ayuhamela, uku efula ka deku diatulumbaka khumʼekanga kemotshi. Ku lʼekumelu ka deku akumi esambeli, Tura ayimba limbu uku atimbaka umuntu kanga luseka ati:

¹⁶Ose losese, ukinduli lʼusumba, We kanga luseka lakawuhela. Uhumi ololo, otelenganya kimbu, Imbi efula, dia vo nkuho.

¹⁷Lʼekumelu ka deku akumi esambeli, Latuyalaka ayokendela Tura. Tura ayukalula lʼulimu awo ntu. Vo wayunana la waulelu tshe wa la kete, wa lʼandja.

¹⁸Keli waho awo la difutu diawo wayukimwama le Latuyalaka. Vo hawomotshama, kuyanga mumbama. Keli waho awo wayulesha ndu wayolotsha wane watudjaseka la ntundu ka Latuyalaka.