Read tetala Isaya 26 Bible Online

Isaya 26 - tetala bible

Isaya 26

¹Lu lushi loso, antu wayimba usambu one lu kete ya Juda vati: Shu la usumba a wulu. Latuyalaka ambutuhikela panda kandi dia ndjala lukumbu la lungeli lasu la ta.

²Nyudihuli asuku, Wudja wʼololo weli la kolamelu woto loko.

³We atulamaka one lukanga tukanyi Tushikikadi le ye, lu ki kʼuluwanyi, Ne dia ndi atukekamaka.

⁴Nyekamaki Latuyalaka pundju, Ne dia Latuyalaka Unyashungu keli dive dia pundju.

⁵Ndi akakitshakitsha antu wakadjase Lu ahuli wa ladiku, lʼusumba wa lʼukungu. Ndi akalanya usumba ako, akuhandjula vwa, Ndi akawete ditshu tu.

⁶Amenyi fono la ahumbi wayukamela usumba ako La tshina diʼakaka, la tshina diʼakaka awo.

⁷Mbuka kʼuntu lʼusimbwi keli usimboki. We untu lʼusimbwi, we katolongosolaka mbuka kʼuntu ololo.

⁸Latuyalaka li, shu tambukukunga lu mbuka ka dumbwelu diaye. Etema asu wambulula la saki kʼeuhwelu kaye.

⁹Dimi latukukumbulaka lʼutema lʼutshu. Dimi latukuyangaka la lumu lami tshe; Ne dia lamʼatuyalaka dumbwelu diaye la kete, Antu wa lʼandja tshe watekaka sambu kʼololo.

¹⁰Kuyanga untu a kolo ayuhumo lukulu lʼolo, Ndi hekela dia ndjala untu ololo. Ndi ayutshaka kolo ketu lʼatei a wudja wʼusimbwi, La ndi hetawo menda wuki wa Latuyalaka.

¹¹Latuyalaka, lunya laye leli wulu, Keli vo hawulenyi; wayenda saki kaye le wudja, wayutshama sonyi. Mete, dja yayutshumba atunyi aye.[56]

¹²Latuyalaka, we atutushaka ki, Ne dia kene tshe katututshaka, we katutukutshiyakato.

¹³Latuyalaka li, we Unyashungu asu, Khumi kina yakatulela, Keli shu tatudimulaka paka lukumbu laye lutu.

¹⁴Vo wambuvo, hawulumbi ntu. Vo waya asumbu, hawuyulo ntu. We ambalanya, Ambunya euhwelu kawo pundju.

¹⁵Latuyalaka li, we akahamia wudja! We akahamia wudja, we ambutumbwama. We akakokola elelu tshe wa wudja.

¹⁶We Latuyalaka, vo wakakuyangi lamʼakiwo la pa. Vo wakakplombe. Lamʼakayasuya.

¹⁷Uku atuleiaka kanga diemi La lono lamʼayangandi mbuta, Osoku mbakisu la ntundu kaye, we Latuyalaka.

¹⁸Shu takatshu waemi, takatati lono; Keli shu tambuyuta paka lopepe lutu. Shu kumbeya nshimbela kete, Ndu asi wedja konembiama.

¹⁹We Latuyalaka, wavo aye wayuyala la lumu, edu awo wayulo. Wane wudjashi lu ditshu wewo, wimbi esambu lʼongenongeno ne dia dihohe diaye dieli dihohe diʼusasi. We ayukimo usasi dia vo mpeta lu kete yeli la aledi.

²⁰Nyu wudja ami, nyuyi, nyuyoto lu mvudu yanyu, Nyudihi kuki lʼokongo awo. Nyutukuyashe yema Edja ndu kele kambeta.

²¹Enda, Latuyalaka uyatumbi uma lu dihuli diandi, Dia ndjusuya wa la kete, ne dia kolo yawo. Ndu kete yayushula dikila dia andjakemi, Kete hayushe andjakemi nduku yema.