Read tetala Isaya 29 Bible Online

Isaya 29 - tetala bible

Isaya 29

¹Yee! Ariyele, Ariyele; Usumba wakadjashi Davidi! Nyahatanya eleku ladiku diʼeleku, Nyuyalaki la nshi ya waki lu tena diayo.

²Dimi layohenyahenya Ariyele. Tukuku la alelu wayuyala leko, Ku usumba ako ayuyala le mi uku Ariyele,

³Dimi layukudinga lu beke tshe, Layukutshimbia lʼalimbi, layukutshimiya ngeli.

⁴We ayukitshakitshama kʼesi, We ayoteketa la diui diʼokoke lu kete. Diui diaye diayutumba uma lu kete uku diui diʼedimu, Ku we ayutundja diui okoke uma lu ditshu.

⁵Efula kʼatunyi aye wayuyala uku efula ka ditshu, La efula kʼantu wa ngala wayuyala Uku efula ka puhudi katembamaka la lopepe. Dikambu ne diayutshama shashimuya uku mamiya ka su.

⁶Latuyalaka Kanga lulimbilimbi ayunyusuya la dikhungula, Edidimelu ka kete, la lundju la wuki, Lopepe la wulu la ngimbi ndu la lumbi la dja yadikita.

⁷Efula ka wedja tshe wayolo la Ariyele, Ee, waku tshe wayolosha lu lungeli landi la ta, Ndu wayohenyahenya, wayuyala uku do, uku enelo ka lʼutshu.

⁸Uku atenaka one luka ndjala ale ma lu do, Ku lamʼakashimondi kʼutema hwe, Kana uku atonokaka one luka pusa kʼashi lu do, Ku lamʼakashimondi, ku wadi tu. Osoku mbayuyala ului wa wedja tshe wayolosha Ukungu a Siona.

⁹Nyukashimo, nyuhukusani, Nyudihe ashu, nyuyali tutshungu! Nyudjo, keli aha la wanu; Nyusukosuko, keli aha la dinono dia wulu.

¹⁰Latuyalaka ambunyutshulwela lumu la nyuladia djo ya wulu. Ndi kakadihe ashu anyu,[62] nyu amvutshi, Ndu ndi akakumbi ete anyu, nyu amenyi wʼakambu wahatayi.

¹¹Enelo kʼakambu ane tshe kambenama le ye, keli uku aui wufundami lu buku diumamatanyi akatshi maa lʼelungu, diambuwusha untu leya mbala lʼosengosengo vati: Utadiya aui wa loko, ku ndi nkaluya diui ati: Haleyi mbala, ne dia dio diambumamatana akatshi maa lʼelungu.

¹²Ku vo wambusha untu laheyi mbala buku diako, wambosengasenga vati: Utadiya aui weli loko, ku ndi nkaluya diui ati: Haleyi mbala.

¹³Ku Khumadiondjo akati ati: Lamʼatusukanaka wudja one le mi, Vo watonemiaka lu enyo awo la lu elomo awo. Keli etema awo watuyalaka etali uma le mi,[63] La woma watuwumbukaka, weli uku shimu wakaweki le antu.

¹⁴Okone nyulungi, dimi layutate la ntsha ntu Ulimu wa mamba lʼatei a wudja one, Ee, ulimu a wuki ndu wa mamba: Yimba yʼakanga a tumba yayulanyema, La ewu kʼakanga a bewu kayushisho.[64]

¹⁵Mananu kayali le waku watusheka Sangweyu diawo etali uma le Latuyalaka, Ndu le waku watutshaka elimu awo lu udjima, wata vati: Atena na? atulimbitela na?

¹⁶Nyu nyatukadimulaka akambu etshulitshuli. Undi, ukingi a puki hatuyalaka la kenemo uleki diwumba uka? La engo kakatungama atutaka dia utungi andi ati: Ndi kumbeya ntungami? Puki atutaka dia ukingi ato ati: Ndi kema la yimba uka?[65]

¹⁷Aha yema tshitshe mbambutshikala Dia Lebanona ndjala ekambo kʼelua? Ku ekambo kako ndjala uku ukunda?

¹⁸Lu lushi loso, akanga a puki wayuka aui wʼuma lu buku diako Ndu ashu wʼakanga a tutshungu wayutshungo uma lu lungi la udjima, wayena ololo.

¹⁹Akanga a memakana wayutamanya ngenangena le Latuyalaka, Ndu asi wula lʼatei wʼantu wayongenangena le lʼEkila la Isariyele.

²⁰Kanga ngala huyala ntu, osoki ayushisho, La waku tshe watulungamelaka kolo, wayushila ushiki,

²¹Watutakanyaka untu lu aui andi, Watambaka one latemalaka la suku dia ndaka antu djunga, La watunganyiyaka untu lʼusimbwi la aui wa lukesu.

²²Diako mbata Latuyalaka, lakatshungula Abarahama, lu dikambu dia luudu la Jakoba ati: Jakoba hutshama sonyi ntu, elundji kandi hokolama la dionyo.

²³Ne dia lamʼayena anʼandi Ulimu wʼanya ami lʼatei awo, vo wayukidia lukumbu lami, Vo wayutumbula lʼEkila la Jakoba, Wayukaka Unyashungu wa Isariyele woma.

²⁴Wane wakanganelaka lu nyumu yawo, wayukundja ewu, La wane wakangungangunaka, wayetawo wetshelu.