Read tetala Isaya 3 Bible Online

Isaya 3 - tetala bible

Isaya 3

¹Enda, Khumadiondjo, Latuyalaka Kanga lulimbilimbi, Utsha minya usuko tshe uma la Jerusalema la uma la Juda: Usuko tshe wa dia nde ndu wʼashi,

²Kanga wulu, usi ta, umbadi, umvutshi, Wetshi wa diwulu la ehangamendi,

³Elombodi wʼalimbi akumi atanu, untu la lukumu, Undaki, utshudi wa komba la kanga aloho.

⁴Dimi layuwasha akenda dia vo ndjala ewandji awo, Ndu ana wʼashashi wayuwaulela.

⁵Ku antu wayusuyanya: untu tshe la unyandi, La untu tshe la usukanyi andi. Dikenda ayutakwela usumbi, La untu anyanya untu la lukumu.

⁶Untu omotshi ayukimela onangu lu luudu la shi ati: We la ahondo, uyali uwandji asu, Elanyelu kene kayali la tshina dia lunya laye.

⁷Lu lushi lako, ndi ayukaluya diui ati: Dimi haletawo ndjala wetshi, Ne dia ma la ahondo kema lu luudu lami; Tanyumbidjaki uwandji wa wudja.

⁸Jerusalema ambulanyema, La Juda ambuhandjo, Ne dia aui awo la etsha awo watotombokwelaka Latuyalaka, Watudjaka ashu andi wa lutumbu tofwefwe.

⁹Wuhu wenama dundji diawo, mbeli emenyi dikambu diawo, Watusanyaka kolo yawo uku Sodoma, hawuyishe. Fono kayali lʼetema awo! Ne dia vo wakayayangela unungu.

¹⁰Nyutaki nyati: Antu wʼololo wayena olo, Ne dia vo wayole elua wa etsha awo.

¹¹Fono kayali le untu a kolo! ndi ayuhumoka lukulu lʼengeno, Ne dia vo wayufuta uku weli etsha andi.

¹²Wudja ami li, akenda watunyusuyaka, Ndu amantu watunyulelaka! Wudja ami li, wane watunyolombolaka, Watunyunganyiaka, watulanyaka mbuka yanyu.

¹³Latuyalaka atunelaka dia mama lʼantu, Ndi atemalaka dia numbuya wedja.

¹⁴Latuyalaka ayoto lʼelumbwelu Ndi la dihangamendi dia wudja andi la ewandji awo ati: Nyu mbakali elua wa lʼekambo kʼelua. Diango diakanyahotola asi wula dieko lu mvudu yanyu.

¹⁵Okoko wana watunyohotshahotshaka wudja ami? La mbatshatsha dundji diʼasi wula? Mbakawambula Khumadiondjo Latuyalaka Kanga lulimbilimbi.

¹⁶Latuyalaka akati ati: Ne dia esekaseka wʼamantu wa la Siona weko la utaku, Watusekusekuyaka kingu yawo lamʼatuwokendakendaka, Watolengiyaka ashu awo, Watosolaka lokendo, ndu watusakanyaka ayaka wa lʼekulu,

¹⁷Khumadiondjo ayete ete wʼesekaseka wʼamantu wa la Siona kaya tshu; Latuyalaka ayatshika utakataka.

¹⁸Lu lushi lako, Khumadiondjo ayunya dimena dia ekoma awo wa lʼekulu, etei wa dive, la ehakito;

¹⁹dia tunganga tʼatui, ekoma wa lʼanya, la apupela;

²⁰dia tambala dia lʼote, kangi ya lʼanya, eya, eshete wa malashi, la eshidika;

²¹dia pete yʼamatelu, la ashingu wa lʼehembe;

²²dia ekutu wa nshi ya waki, shiwawu, akoti, la atapa wa nkimelaka;

²³diʼahondo wa saa-saa, ahondo wa linene, tudingadinga ta lʼote, la ekumbo.

²⁴Lu dihuli dia malashi, ayuyala ehondelo; Lu dihuli diʼuya, okodi; Lu dihuli diʼaputu, diwandji; Lu dihuli diʼahondo wʼamena, elotelo kʼakutu; La lu dihuli dia dimena, sonyi.

²⁵Waumenyu wayudiakema la tombo, Ndu ahuka anyu lu ta.

²⁶Asuku wa Siona wayuyala la alelu, ndu la utanda. Vo wayohenyahenyama wulu, wayutadjaseka udjasedjase la kete.