Read tetala Isaya 30 Bible Online

Isaya 30 - tetala bible

Isaya 30

¹Mananu kayali le ana wʼehedia, mbata Latuyalaka! Vo watuyalaka la sangweyu diaha uma le mi. Vo watudjaka sheki yaha la lulangu lami loko. Vo watahatanyaka kolo ladiku dia kolo.

²Vo watutshokaka utsha lʼEdjibitu, Aha mumbulami, dia ntekama wulu wa Farayo, La dia ntuyanga eshamelu lu dedi diʼEdjibitu!

³Okone wulu wa Farayo wayunyutsha sonyi, La eshamelu lu dedi diʼEdjibitu ayunyukananya.

⁴Kakiane elohe awo weko la Zoana, La atumami awo wakakumi la Hanese.

⁵Vo tshe wayutshama sonyi Dikambu dia wudja waheyi mbakimanyia, Kuyanga mbakundjiya waho, Keli wambuyala sonyi la wononyi le wo.

⁶Enelo lu dikambu dia nyama ya la Nengebe. Vo wataheka ekundji awo ladiku dia punda, La diango diawo diʼushinga a wulu ladiku dia kamelo. Vo watetaka lu kete yʼohenyohenyo la yʼukiyanu, Lene atetaka tambwe ka wadi la kʼumi, Dikhuha la kunga katulimboka. Watutshokaka utsha lu wudja waheyi mbakimanyia.

⁷Ekimanyelu kʼuma lʼEdjibitu keli anyanya atu. Diako mbakamawole nti: Rahaba ludjashi udjasedjase.

⁸Uneli kakiane, ufundi akambu ane lu ehasi ka dive la ntundu kawo. Uwasanguli lu buku, Dia vo ndjala lu nshi yayayi Uku omenyi wa pundju,

⁹Ne dia wudja one weli wudja wʼakanga wʼuhedia. Vo watutaka kashi, hawutulungaka elembe wa Latuyalaka.

¹⁰Vo watutelaka amenyi wʼakambu wahatayi vati: Tanyuwaenaki! Ndu watutelaka amvutshi vati: Tanyututelaki akambu wʼusimbwi. Nyututelaki paka aui wʼoselo, nyutudimbiyaki.

¹¹Nyangani uma lʼosese, nyetole uma lu mbuka. Nyutunyiya lʼEkila la Isariyele uma lu mbuka kasu.

¹²Diako mbata lʼEkila la Isariyele okone ati: Ne dia nyu monyolaka diui ne, Ndu nyatukitshaka elungamelu lu wengiya la ngala, nyu nyatuwaekamaka,

¹³Okone kolo kene kayuyala le nyu Uku etshi kʼeheli kambate elonge, kambengama, kutsha mvuto. To kayuto shashimuya uku mamiya kasu.

¹⁴To kayuhandjo vwa uku atuleka puki ka diwumba. Ku hatshikala nduku kiengakenga ya mbosa dja, Kuyanga ya ntekola ashi lʼeteko.

¹⁵Khumadiondjo, Latuyalaka, lʼEkila la Isariyele, kakati okone ati: Paka nyu nyambukalula, nyambuyakimo le mi, mbayunyushimbamela. Tshikima nyambunya ukandukandu, nyambombekama, mbayunyukundja wulu. Nyu kumbetawo osoku,

¹⁶Keli nyakati nyati: Kema, shu tayusamanya esadi lu falasa yasu. Uma lu dikambu diku, mbayunyutukalula la luwangu. Ku nyu nyati: Shu tayahema lu diango diatsho luwangu. Uma lu dikambu diako, mbayudja ndu wane wayunyutshanya luwangu.

¹⁷Antu kinunu wayulawo la luhangu lʼuntu otoi, La luhangu lʼantu atanu nyu nyayulawo, Edja ndu nyambutshikala uku utamba waki dembela lʼote wʼukungu, Uku djimbitelu yʼeuhwelu lu dikuna.

¹⁸Okone Latuyalaka atulangaka nyuhumuya lukulu lʼolo, Ndu atukumbulaka nyuka ketshi, Ne dia Latuyalaka keli Unyashungu a sambu kʼololo. Waku tshe watulungamelaka le ndi weli la otshoko,

¹⁹Nyu asi Jerusalema wudjashi lu Siona li, nyu hanyuyulela ntu! Mete ndi ayunyuhumuya lukulu lʼolo lamʼayunyolomba. Kamʼayunduka, ndi ayunyukela.

²⁰Kuyanga Khumadiondjo ayunyusha ma dia lutunu la ashi wʼasui, Umbetsha anyu hunyusnama ntu, keli ashu anyu wayenaka Umbetsha anyu.

²¹Lamʼayunyuyanga mbetola lu lunya la pami kana la lomoso, atui anyu wayuka diui uma lʼokongo ati: Mbuka keku, nyokendekende loko! nyokendekende loko!

²²Ku nyu nyayulanya dikishi dianyu diakanyombe la fesa la diakanyombe la paunyi. Nyu nyayudianganya betshi diako uku diango dia mindu, nyayuta nyati: Nyumo lane.

²³Ndi ayolosha mvula la kete, dia wehu wayunyune ngona, ku mbu ya nde yayufulanela la kete. Ndu lʼetena kako, dungalunga dianyu diayolekaka adiyu lʼesui a waki.

²⁴Ku ngombe la punda yatukambaka dikambo, yayolekaka adiyu wakawahimbula, wakawumia ololo, wosohanyimi la leho.

²⁵Tokoko la ekedi wʼashi wayuyala ndu ladiku diʼekungu a waki la akuna wʼetali lu lushi layudiakema antu ndu layunyuko tangelu.

²⁶Usasi a ngondo wayuyala uku usasi a unya. Usasi a unya wayoheta wulu tena esambeli, uku yediko yʼusasi wa nshi esambeli lu lushi layomba Latuyalaka puta ya wudja andi, layundokonoya wimbo wa dikomoki diawo.

²⁷Enda, Latuyalaka ambuya uma lʼetali, Kele kandi kayahete uku dja, kayatuto dinga. Elomo andi wambulula too lʼududu, La lulimi landi uku dja yadikita.

²⁸Luwi landi lambuyala uku okedi wambudja elula, Wambukuma pulu ndu lu kingu, Dia nyunga wedja la djungo yʼelanyelu, La okodi lu kingu yʼantu dia mbanganyiya.

²⁹Nyu nyayimba usambu uku atunyimbaka lʼutshu wa dambu diʼekila. Nyayongenangena lʼutema uku atongenangenaka one latakendakenda lu ekuma wa pungu utsha lu dikuna dia Latuyalaka, le Dive dia Isariyele.

³⁰Keli Latuyalaka ayukia antu diui diandi dia lutumbu. Ndi ayuwaenya lunya landi layahulo lʼududu wa kele kandi, la lumbi la dja yadikita, la ngimbi ka wulu la mvula ka mboko.

³¹Asi Asuriya wayusaka lukumba lu luhangu la Latuyalaka lamʼayundasuya la ukalimba andi.

³²Lu ehelenganyelu ka ngomo la sese, mbayakomola Latuyalaka la ukalimba. Ndi ayolo la wo la lunya landi la wulu.

³³Ne dia dihuli diʼetshumbelu diambolongoswamaka, ee, dio diakalongoswama ne dia khumʼekanga. Dio dieli ohongo la wuki, diuludi dja la kunyi efula. Luwi la Latuyalaka layuyitshumba la lumbi la dja uku okedi wa tsho.