Read tetala Isaya 34 Bible Online

Isaya 34 - tetala bible

Isaya 34

¹Nyusukani nyu wedja, nyulungi! Nyuhukami, nyu antu! Kete yuki, ndu kene tshe katuyalaka loko, Ndu andja la diango tshe diatutumbaka loko,

²Ne dia kele ka Latuyalaka keko ladiku dia wedja tshe, Ndu ududu andi ladiku dia elui awo tshe wʼalimbi. Ndi amtushila ujhiki, ambakimo dia vo ndjakema.

³Edu wa wavo wayukadjema, wayutumba sulu. Ku ekungu wayolelo la dikila diawo.

⁴Ului tshe wʼalimbi wa lʼulungu wayuhandjo, Ulungu wayombama uku wombo wa mukanda.[66] Ku ului awo tshe wʼalimbi wayoko Uku atololoka dikatshi diʼokodi wʼelua, Ndu uku atololoka dikatshi diʼutamba wa fingu.

⁵Yombo yami yambeshama la kele lʼulungu. Enda, yo yayuhula ladiku dia Edome,[67] Ladiku dia antu wakamadji mananu dia mbalumbuya.

⁶Yombo ya Latuyalaka yaya dikila tu. Yo yambukumbama la wata la dikila dia ana wʼekoko la dia weumbi wa mbudi, Ndu wata a washu wʼekongo a waumi wʼekoko, Ne dia wambudiakela Latuyalaka nyama efula la Bozera, Ndu wakudiakela efula lu kete ya Edome.

⁷Mangana yayoko kame la yo, Ndu esongo wa ngombe la waumi wa ngombe. Ku kete yayomena dikila, Ndu ditshu diayukumbama la wata.

⁸Latuyalaka ambosonola lushi lʼesombweyo, La ononyi wa nsombweya Siona.

⁹Tokedi ta Edome tayukadimo elangi, La ditshu diayukadimo tsho. Ku wudja awo wayutshumbama la dja ya tsho.

¹⁰Dja yako hayudimalaki ndu la yanyi ndu lʼutshu, Dinga diayo diayumbelaka pundju.[68] Ku kete yako yayutshikala anyanya lu lolonga la lolonga. Nduku untu ayeta loko pundju, pundju.

¹¹Kumbaka la eku wayuyala akanga ayo, La ekuki la dingwangwa wayudjaseka loko. Ndi ayusimbula ushinga wa mbedika ufutanu ayo, Ayuhane okodi dia menda elanyelu kayo.

¹²Vo wayeta dihangamendi dia lu diulelu, ku nduku otoi; Ku wayeta ndu ewandji, ku nduku untu.

¹³Atende wayutumba lu mvudu yaki khumi ya dikanga, Ndu adungu la ahangulakoi lu tangelu diawo. Leko kayuyala edjaselu ka mbulu la seke dia kumbaka.

¹⁴Nyama ya lʼusui wa shenga yayuhumana la laundu La peli yayetana leko. Ee, ekukʼa sheka ayumuyaka leko.

¹⁵Tsheketeki yayutsha kefu leko, yayumba ekeli, yayudama, Yo yayuhuhula, yayukhukhume tana tayo la tshina diʼahafu. Ndu beki diayusangana leko, wadi lʼumi, wadi lʼumi.

¹⁶Nyuyangi buku dia Latuyalaka, nyudiali. Nduku otoi ayuyala kema; Nduku layuyala aha la wadi kana aha la umi; Ne dia unyo wa Latuyalaka ambudidjanga. Lu yimba yandi, mbambundasanganya.

¹⁷Lunya landi lakawaedikela ahuli lʼokodi, Ku ndi akasonoya ahuli lu kete yako. Okone vo wayuyala akanga ayo pundju; Wayudjaseka loko lu lolonga la lolonga.