Read tetala Isaya 37 Bible Online

Isaya 37 - tetala bible

Isaya 37

¹Lamʼakuki Hezekiya aui aso, ndi akatshatsha ahondo andi, akalote akutu, akoto lu luudu la Latuyalaka.

²Ndi akatumi Eliyakima uwandji wa luudu landi, la Shebina, ufundji, la elombedi wa dikumanyi, wolotshi akutu utsha le umvutshi Isaya, onʼa Amoza.

³Ku vo wakatuwutela vati: Okone mbata Hezekiya ati: Lushi lone leli lushi la pa, lʼasui, ndu la dionyo; ne dia etena kʼana mbuto ambukuka, keli wulu wa mbauta kema.

⁴Undu, Latuyalaka, Unyashungu aye, akuki aui wʼolombodi wʼalimbi wakatumi khumendi, khumʼekanga kʼAsuriya, dia monyola Unyashungu a lumu. Latuyalaka, Unyashungu aye, ayuhangwela ne dia aui wakanduki, undu. Okone olombele atshikadi ane Unyashungu.

⁵Okone ekambi wa khumʼekanga Hezekiya wakakumi le Isaya.

⁶Ku Isaya akawatela ati: Kanyututeli khumenyu nyati: Latuyalaka kata okone ati: Tukaki woma dia aui wakayuki, wakantenge ekambi wa khumʼekanga kʼAsuriya.

⁷Enda, layukadimula yimba, ku lamʼayunduka kumu, ndi ayukalula utsha lakandi. Ndi ayutudiakema la yombo lu wudja andi.

⁸Lamʼakuki olombodi wʼalimbi lukumu ati: Khumʼekanga kʼAsuriya ambunela la Lakishi, ndi akakalula, akatutana alo la Libina ta.

⁹Khumʼekanga kʼAsuriya akuki lukumu ati: Tirihaka, khumʼekanga kʼEtiyopiya, uyayi dia ndjolo la ye. Lamʼakanduki lukumu loso, ndi akatumi akendji le Hezekiya ati:

¹⁰Kanyututeli Hezekiya, khumʼekanga ka Juda, nyati: Tetawoki Unyashungu aye, latuyekamaka, nkudimbiya ati: Jerusalema holembiama le khumʼekanga kʼAsuriya.

¹¹Enda, we akuki uku akatshela khumi ya dikanga yʼAsuriya wedja tshe, uku akawashili ushiki, ku we ayuhanda uka?

¹²Watshesu wakalanya wedja wa Ngozana, Harana, Rezefu, ndu wʼana wa Edena waki la Talasara. Undi, ditemolatemola diawo diakeyi mbashimbela uka?

¹³Lendʼeli khumʼekanga ka Hamata, khumʼekanga ka Arapada ndu khumʼekanga kʼusumba wa Sefaravayima, khumʼekanga ka Hena ndu khumʼekanga ka Iva?

¹⁴Hezekiya akalungula mukanda uma lʼanya wʼakendji, akawali. Hezekiya akatshu la wo lu luudu la Latuyalaka, akatuwufula la ntundu kandi.

¹⁵Ku Hezekiya akalombe Latuyalaka ati:

¹⁶We Latuyalaka Kanga lulimbilimbi, Unyashungu wa Isariyele, ludjashi ladiku dia akeruba![72] We weme keli Unyashungu a waulelu tshe wa la kete, we kakatungi ulungu la kete.

¹⁷Latuyalaka li, uhuke tui, umbukeli! We Latuyalaka, udihuli ashu aye, endi! Uki aui tshe wa Senakeribe wakandatumi dia nkotenga, we Unyashungu a lumu.

¹⁸Mete, Latuyalaka, khumi ya dikanga yʼAsuriya yambuyalanya wedja tshe ndu kete yawo.

¹⁹Vo wakatshumbi ditemolatemola diawo lu dja, ne dia dio diaki paka ditemolatemola diakawatshi uma lʼetamba lʼave, diako mbakawadilanya.

²⁰Latuyalaka li, we Unyashungu asu, utushimbeli kakiane uma lʼanya wa Senakeribe, dia waulelu tshe weyi vati: We, weme keli Latuyalaka.

²¹Ku Isaya, onʼa Amoza, akatumela Hezekiya diui ati: Latuyalaka, Unyashungu wa Isariyele kata ati: Lakuki elombelo kaye dikambu dia Senakeribe, khumʼekanga kʼAsuriya.

²²Okone mbakati Latuyalaka lu dikambu diandi ati: Siona, ona umuntu leki emuma ambukonyola, ambukosoka. Jerusalema, ona umuntu, ambukusukiasukiya ote.

²³Akona akayatenge, akayonyola na? Akayahangwela na? LʼEkila la Isariyele!

²⁴Lu dikambu diʼekambi aye, mbakayatenge Khumadiondjo. We atuyasemaka wati: Uma lʼefula ka pusupusu yami, Mbamumumbela ladiku diʼekungu ene pulu ndu la Lebanona. Layokota esasi wuleki etali, la weoto wuleki amena wa loko. Dimi layukuma kʼatei a ngamba, lu dihuli diuleki eteto.

²⁵Dimi lakatshimi teko, lakano ashi uma loko. Dimi layumia ekedi tshe wa lʼEdjibitu la dikaka diami.

²⁶We kumbuka wati: Dimi lambolongosolaka akambu ane, Ndu lambasanguyaka umaka nshi yʼedjedja? Kakiane dimi lambukimo wulu wa akambu ane ntshama, Dia we nanya esumba wa wulu la mbaete atongo atu.

²⁷Okone waku wakadjashi loko, Kundjala la wulu, wakuki woma, wakakanana. Wakayala uku adiyu wa lu dikambo, Ndu wʼomongela, uku adiyu watomenaka lʼelumbi wa mvudu, Ndu uku epunga wahatuli.

²⁸Dimi mbeyaka edjaselu kaye, eunelu kaye, Eyelu kaye, ndu ududu watuyumbukaka.

²⁹Dimi lakuki dia ududu watuyumbukaka, la dia utaku aye. Okone layukudja shingu diami lʼohembe, la okodi ami lu kingu, Ku dimi layukukaluya lu mbuka kakayayi.

³⁰Dikambu ne diayuyala djimbitelu le nyu ati: Lʼeleku kene, nyu nyayolekaka diango diatutumbaka aiame, ndu lʼeleku kʼuyuyu pupu. Ku lʼeleku ka satu kanyune, kanyuni; kanyune ekodi wʼelua, kanyoleki elua awo.

³¹Atshikadi wa lu luudu la Juda wakahandi, wayudja ediu utsha lʼesi, ndu wayoto elua ladiku;

³²ne dia atshikadi wayutumba uma la Jerusalema, la waku wambuhanda uma lʼukungu a Siona. Saki ka Latuyalaka Kanga lulimbilimbi kambutsha dikambu ne.

³³Latuyalaka kata dia khumʼekanga kʼAsuriya ati: Ndi hukuma lʼusumba one, kuyanga mbuka pitu yandi loko. Ndi hukuma la engawu loko, kuyanga mbukela wumbe wa ta.

³⁴Ndi ayukalula lu mbuka kakandayi, ku ndi hukuma lʼusumba one, mbata Latuyalaka.

³⁵Dimi layulama usumba one, layushimbela, lu dikambu diami, ndu lu dikambu dia ukambi ami Davidi.

³⁶Ku ondjelo wa Latuyalaka akatumbi, akadiaki asi Asuriya nunu lukama la akumi enanei la tanu lu pangu. Ku lamʼaketo antu la pindju, wayendaki, ku vo wakayadi edu etu.

³⁷Ku Senakeribe, khumʼekanga kʼAsuriya, akunela uma lu pangu, akakalula utsha lakandi, ku akatudjase la Ninive.

³⁸Keli lamʼakindi lu ntemola etemolatemola kandi Nisroke lu luudu lato, anʼandi wʼapami, Adarameleke la Sharezere, wakayudiaka la yombo. Vo wakalawo utsha lu leke la Ararata. Ku onʼandi Esara-Hadona akulela lu dihuli diandi.