Read tetala Isaya 38 Bible Online

Isaya 38 - tetala bible

Isaya 38

¹Lu nshi sho, Hezekiya akuki kandji, aki lasuki la nyoi. Ku umvutshi Isaya, onʼa Amoza, akayi le ndi, akawutela ati: Latuyalaka kata ati: Olongosole luudu laye, ne dia we ayuvo, hayuka ntu.

²Hezekiya akakadimo utsha lʼeheli, akalombe Latuyalaka ati:

³Latuyalaka li, dimi lambukosengasenga nti: Uho uku akamakendakendaka la ntundu kaye lu mete lʼutema wʼusimbwi, ndu uku akamatshaka akambu waki ololo lu ashu aye. Hezekiya akaleli wulu.

⁴Ku diui dia Latuyalaka diakayi le Isaya ati:

⁵Utshu, ututeli Hezekiya wati: Latuyalaka, Unyashungu wa sho Davidi, kata okone ati: Lambuka elombelo kaye, lambena asoi aye. Enda, layukahela deku dikumi la tanu.

⁶Dimi layukutshungula, we la usumba one uma lʼanya wa khumʼekanga kʼAsuriya layulamaka usumba one.

⁷Enda, djimbitelu nye uma le Latuyalaka, ya we mbeya wati: Ndi ayushidiya diui diakandati.

⁸Dimi layukaluya dedi, diambutalo ladiku dia bandelu dia Ahaza. Unya lyukalula esokosoko yediko ya bandelu dikumi. Ku unya akakalula ekongokongo bandelu dikumi uma lene akawaselami.

⁹Usambu wa Hezekiya, khumʼekanga ka Juda, lamʼakindi la kandji ndu lamʼakandakono one:

¹⁰Dimi lakati nti: Lamʼeki nshi yami ki, Ku lambutsho utsha lʼUdimu a Pengandu. Deku diami diambuhimbwama pe!

¹¹Dimi lakati nti: Dimi halenana la Latuyalaka ntu lu kete ya wasena. Dimi handjenana lʼuntu ntu lʼatei a wane weki lʼandja.

¹²Edjaselu kami kambunyema uma le mi, Kambembama uku atembamaka luudu la dipema lʼulami wʼekoko. Lumu lami lambombama uku atombaka uhumi adiba. We ambumpimbula uma lu wimo. Umaka yanyi pulu ndu lʼutshu, we ayunkumiya.

¹³Dimi lakalembohala edja ndu pindju. We atotetshatetshaka weka ami tshe uku tambwe. Umaka yanyi pulu ndu lʼutshu, we ayunkumiya.

¹⁴Lakawanaka uku yengenga, Lakakhumaka akhumu uku kudumba. Dimi lakaheko mbalela utsha lʼulungu nti: Khumadiondjo li, lambusuyama, unkimanyia!

¹⁵Keli, kakamati na? Ndi akamvutela, Ndame kambutsha dikambu ne. Dimi layokendakendaka lʼokei nshi tshe ya lumu lami.

¹⁶We Khumadiondjo, uma lu akambu ane mbeli antu la lumu. Ndu uma lu akambu ako tshe, mbeli lumu lʼutema ami. Okone onkonoya, umbete la lumu.

¹⁷Enda, asui ami wambukadimo otshoko le mi. We akangenangena dia mpandja lumu lami uma lu diumbu, Ne dia we akakadja kolo yami lʼokongo.

¹⁸Udimu a Pengandu heyi nkutumbula, Nyoi heyi nkandula. Waku watuhuloka utsha lu diumbu, Hawutulungamelaka kolamelu yaye ntu.

¹⁹Keli lasena, ee, lasena keya nkandula uku dimi elo. Shi kateyaka nimbitshiya anʼandi kolamelu yaye.

²⁰Latuyalaka ambunshimbela! Okone shu layimbaka esambu la sese Lu luudu la Latuyalaka nshi tshe ya lumu lasu.

²¹Isaya akati ati: Nyela diombo Jia fingu, wamami Hezekiya lu edada. Ku ndi ayokono.

²²Ku Hezekiya akambula ati: Djimbitelu yakona yayumeya nti: Layoto ntu lu luudu la Latuyalaka?