Read tetala Isaya 40 Bible Online

Isaya 40 - tetala bible

Isaya 40

¹Nyusambi wudja ami, nyusambi, mbata Unyashungu anyu.

²Nyuteli asi Jerusalema aui ololo, Dia nsamba etema awo. Nyuwateli la diui dia wulu nyati: Nshi yawo yʼata yambushila, Kolo yawo yambudimanyema. Vo wambulungula asui tena pendi uma le Latuyalaka, Ne dia kolo yawo tshe.

³Nyuhukami diui diahangohango ati: Nyati mbuka ka Latuyalaka lʼusui, Nyolongoswele Unyashungu asu osese lʼusui wa shenga.[74]

⁴Ekidi tshe wayutediama, La ekungu la akuna tshe wayukitshakitshama, Ahuli wʼakote akote wayusimbo, La ahuli wʼafuku afuku wayukitanyiama.

⁵Lutumbu la Latuyalaka layenama. Ku antu tshe wayulena kame, Ne dia Latuyalaka kambuta osoku.[75]

⁶Nyuhukami diui diata ati: Uhangohango! Ku umvutshi akûkaluya diui ati: Ahangohangomi na? Antu tshe weli uku adiyu. Dimena diawo tshe dieli uku dembo dia lʼusui.

⁷Adiyu watumaka, la alembo watoloka Lamʼatuwafufaka Latuyalaka lumu. Mete, mete antu uku adiyu mbewo.

⁸Adiyu watumaka, la alembo watoloka, Keli diui dia Unyashungu asu diatutshikalaka pundju.[76]

⁹We umvutshi wa kumu yʼololo lu Siona, Umbeli lʼukungu wʼutali, dia diui diaye wulu. We umvutshi wa kumu yʼololo lu Jerusalema, Edia diui, tukaki woma. Uteli esumba wa Juda wati: Nyendi Unyashungu anyu.

¹⁰Enda, Khumadiondjo, Latuyalaka uyayi. La lunya landi la wulu, mbatundulelaka. Enda, waho andi weko la ndi, La diango dia lukahu diambeta la ntundu kandi.[77]

¹¹Ndi ayuleshaka ekoko andi uku ulami.[78] Ndi ayosa ana wʼekoko lʼanya andi; Ndi ayuwakhumbatela lu tulu. Ndi ayolombola wali la tana tawo okoke.

¹²Akona akedika ashi lu difuku diʼewambu ka lunya landi, Akedika ulungu lʼanana wa pita, Akatshumanya ditshu dia la kete lu mbaka na? Akedika wutshu wʼekungu, akahe akuna lu kilo?

¹³Akona akedika Nyuma ka Latuyalaka, akawetsha na?[79]

¹⁴Akona akadji la ndi sheki, akawetsha? Afilombola lu mbuka kʼusimbwi? Akumanya akambu fundu na? Akawenya mbuka kʼewu na?

¹⁵Enda, wedja wʼantu weko uku dipopo diʼashi lu mbaka. Vo weli uku loseke la ditshu ladiku dia kilo. Enda, ndi atediaka wedja wa lʼasenga uku toseke ta ditshu.

¹⁶Etamba tshe wa la Lebanona La nyama tshe ya leko hawukuki ulambu wa lutshumba.

¹⁷Wedja tshe weli anyanya la ntundu kandi. Vo weko paka anyanya, nduku engo le ndi.

¹⁸La untu akona ayunyedika Unyashungu? La engo kakona kayun fanya la to?

¹⁹Ekishi! utshudi katukitshaka. Utshudi wa paunyi katukikumbaka la paunyi, Katutshaka molola ato la fesa.[80]

²⁰One laha la diango efula ne dia wula andi, Atosonolaka utamba a wulu waheyi mboto lumbu. Ndi atuyayangelaka usi ulimu la komba, Dia mbutshela ekishi ka heyi nsukasuka.

²¹We heyi dikambu diako? We kudiuka? Vo kunkuteladio umakʼetatelu? We kudimana fundu umakʼetungelu ka kete?

²²One ludjashi ladiku dia kete Atombolaka ulungu uku dihondo dia shadisadi. Ndi atunanulaka uku luudu la dipema dia ndi mbidjase loko. Ku wane watudjaseka la kete, watuyalaka uku akata.

²³One lateteka ewandji anyanya, Katunyaka ndu embadi wa la kete dimemo.

²⁴Vo kumunema, kuyanga mbukama, Ndu etundu awo kema la ediu lu kete. Ndi atuwafufaka luwi ku vo watumaka. Ku punganendji atuwaembaka uku adiyu.

²⁵Akona ayunyombedika la ndi, Dia dimi nfana la ndi? mbata lʼEkila.

²⁶Nyedia ashu anyu utsha lʼulungu, Nyendi one lakatungi diango ne, Latuditundjaka lʼelui adio. Ndi atudietaka dio tshe kumbu. Uma lu wuki wa wulu andi, ndu uma lu khudu kandi kʼutamanya, Mbakidio kumpumbama nduku otoi.

²⁷Okoko wana wataye we Jakoba, Ndu wateketaye we Isariyele wati: Akambu ami wambushama uma le Latuyalaka, Ndu elumbwelu kami kambunyema uma le Unyashungu ami?

²⁸We ateyi? We atuki? Unyashungu a pundju, Latuyalaka, Utungi wa kuma ya kete, Hatokomoka dimba, hatuhekoka. Nduku untu leya mbedika yimba yandi.

²⁹Ndi atushaka one lambokomo wulu. Ndi atufudiayaka one lamboko la yimba ntshimba wulu.

³⁰Akenda wʼapami watokomoka, watuhekoka. Ndu elongo wʼapami watukitaka huhakavi.

³¹Keli wane watukungelaka Latuyalaka, Watuludiamaka la wulu wʼuyuyu. Vo watufumboka uku fudu ya pungu. Vo watulawoka, Ku hawuheko, watokendakendaka, ku hawokomo.