Read tetala Isaya 41 Bible Online

Isaya 41 - tetala bible

Isaya 41

¹Nyu asenga, nyolembohali ki la ntundu kami. Antu waludiami la wulu wʼuyuyu, wasukani, la watekete. Tusukani kame lu elumbwelu.

²Akona akatunyiya untu uma lʼehutwelu ka unya, akawete uya le ndi, Akukimwela ndu akawete umbuledi a khumi ya dikanga? Ndi akawaete ditshu la yombo yandi, Ndu uku adiyu watufumboka la uta andi.

³Ndi akatawatshanyaka, aketi la ki Lu mbuka kakindi kumbetaka.

⁴Akona akatshi dikambu ne, aketi nonga umakʼetatelu? Dimi Latuyalaka, leli etatelu, kame la ekumelu, keli ndi.

⁵Waku wudjashi lu asenga, watenaka, watukaka woma. Wa la kuma ya kete watudidimaka, watuyakaka, watusukanaka.

⁶Vo tshe watukimanyanyianaka. Untu lʼuntu atutelaka unyandi ati: Ukikitali!

⁷Okone utshudi wʼabaya atukikitshaka utshudi wa paunyi. One latokolongaka la uhumo, atukikitshaka one latutshulaka la nyundu, Atutaka dia songa ati: Dio diaya dimena! Ndi atudikikitshaka la seti, ne dia dio diatukusukasuka.

⁸Keli we ukambi ami Isariyele, Jakoba lakamasonola, diuhu diʼongenyi ami Abarahama;[81]

⁹We lakamose uma la kuma ya kete, Ndu lakameti uma lu atshuku ayo; Lakamatela nti: Ukambi ami mbeye. Dimi lakakosonola, dimi kunkutuna.

¹⁰Tukaki woma, dimi leko la ye. Tuyakiyanyaki, dimi keli Unyashungu aye. Dimi layukukikitsha, layukukimanyia, Layukusukela ololo la lunya lami la pami.

¹¹Enda, waku tshe watukukaka kele, Wayukanana, wayutshama sonyi. Wane watolokaka la ye, wayulanyema, wayushila ushiki.

¹²We ayuyanga waku wakadjaka la ye lundju, Keli we huwatana. Wane watolokaka la ye, wayuyala pudi, wayushila tshe,

¹³Ne dia dimi keli Latuyalaka, Unyashungu aye, Latukukimelaka lu lunya laye la pami. Dimi latukutelaka nti: Tukaki woma, layukukimanyia.

¹⁴Jakoba, we kanga ohodu, tukaki woma. Ndu nyu asi Isariyele. Dimi layunyukimanyia, mbata Latuyalaka, LʼEkila lʼlsariyele, utshungudi anyu.

¹⁵Enda, dimi layukete ohelo wa panga wʼuyuyu. Ku we ayohela ekungu, ayekitshakitsha, Ayete akuna efushi etu.

¹⁶We ayafufula, ku lopepe layuwaemba; La punganendji kayadianganya. Ku we ayongenangenela Latuyalaka! Ayuyatumbula lu dikambu dia lʼEkila lʼlsariyele.

¹⁷Asi wula la amenyi fono watuyangaka ashi, ku ashi pudi. Weudi awo wambuma tu la pusa kʼashi. Dimi Latuyalaka layuwaukela. Dimi Unyashungu wa Isariyele haluwaseka.

¹⁸Layutundja ekedi wʼashi uma lʼakuna wʼetali, La teko diʼashi uma lʼekidi. Dimi layete usui wa shenga uduwa, La kete ya wumu teko diʼashi.

¹⁹Dimi layutundja etamba wʼesasi, wʼelungu, Wa wuma, la wʼeweli lʼusui wa shenga. Dimi layune weoto, eduwula, la esengi,

²⁰Dia antu mena, mbeya nkana yimba la mana fundu vati: Lunya la Latuyalaka mbakatshi akambu ane. LʼEkila lʼlsariyele keli utungi wa akambu ane.

²¹Nyuyateketele, mbata Latuyalaka. Nyutundja emenyi anyu a wulu, mbata khumʼekanga ka Jakoba.

²²Watenya bewu diawo watuteli akambu wayanga ndja. Watusanyia akambu wakatshama ntundu Dia shu nkana yimba loko, dia mbeya ekumelu kawo. Naka aha osoku, nyututeli akambu wayayi.

²³Nyututeli akambu wayayi, keli teyi shati: Ditemolatemola dia mete mbenyu. Nyutshi ololo kana kolo, Dia shu tshe mbuka la mena kame.

²⁴Enda, nyu nyeko anyanya, ndu ulimu anyu pudi. La one latunyekamaka, eko wononyi.

²⁵Dimi lakunyiya untu omotshi uma la ngelʼa kushi. Ndi ayuya uma lʼehutwelu ka unya, Ayetaka lukumbu lami. Ndi ayuya dia ndjohotshahotsha embuledi uku loteke, Uku atohotshahotshaka ukingi a puki diwumba.

²⁶Akona akati dikambu ne umakʼetatelu dia shu dieya, Akona akatutela la ntundu dia shu mvuta shati: Mete? Nduku untu lakatutela, Nduku lakatenya, nduku lakuki aui anyu.

²⁷Dimi kakatatela mvutela wa la Siona nti: Vo ane, vo ane! Ndu le Jerusalema nti: Dimi lambukutumela dikendji dia kumu yʼololo.

²⁸Dimi lambenda, ku nduku untu, Nduku untu lʼatei awo eli la yimba ya nkaluyami diui lamʼuwambudimi.

²⁹Enda, vo tshe weli anyanya. Elimu awo nduku engo. Dikishi diawo dieli efufelu kʼanyanya.