Read tetala Isaya 45 Bible Online

Isaya 45 - tetala bible

Isaya 45

¹Okone mbateketa Latuyalaka le Kuro, Lakandakiti iso lʼote, latundukimelaka lu lunya la pami Dia nembia wedja weli la ntundu kandi, Ndu dia ntewoka eya wa khumi ya dikanga, La dia mbudihwela kuki ne dia yo yatukudihama ati:

²Dimi layutsho la ntundu kaye, layukitanyia akuna. Layuhandjula kuki yʼehotela, la mpimbula tukengiti ta mbulu.

³Dimi layukushi ukundji wushami La diango diʼushinga a wulu diukhundami; Dia we mbeya wati: Dimi keli Latuyalaka, Unyashungu wa Isariyele, latuketaka lukumbu laye.

⁴Ne dia ngandji kukami ukambi ami Jakoba, Osonami ami Isariyele, mbatumuketaka lukumbu laye. Kuyanga we hambeyi, dimi lambukusha lukumbu la nemo.

⁵Dimi leli Latuyalaka, nduku ukina, Ee, nduku Unyashungu ukina weko. Kuyanga we hambeyi, dimi katukukikitshaka,

⁶Dia antu wʼuma lʼehutwelu ndu wʼuma lʼedjelu mbeya vati: Nduku Unyashungu ukina weko. Dimi leli Latuyalaka, nduku ukina.

⁷Dimi katutumaka usasi la udjima. Dimi katelaka ki ndu ohenyohenyo. Dimi, Latuyalaka, katutshaka akambu aso tshe.

⁸Ulungu alosha sambu kʼololo uma ladiku, Ku wangi wakikedia, kete yadiho dia panda nto elua loko, Ndu etshungwelu katumbi uma loko. Dimi Latuyalaka katutungaka akambu aso.

⁹Mananu kayali le one latamaka lʼUtungi andi! Puki lʼatei a puki ya la kete! Diwumba mbeyaka mumbula one ladikinga ati: Akingaye na?[89] La engo kukingindi mbeyaka mbutela ati: We kema lʼanya?

¹⁰Mananu kayali le one latumbulaka umbutshi a pami ati: Kakona keye lu mbuta? La le umuntu ati: La na atataye lono?

¹¹Okone mbata Latuyalaka, LʼEkila lʼlsariyele, la Utungi andi, ati: We nangaka mumbulami akambu wahatayi? Ndu we nangaka mbidjangelami adjangu dikambu diʼana ami, La dikambu diʼulimu wʼanya ami uka?

¹²Dimi lakatungi kete, Ndu untu ludjashi ladiku diayo. Dime kakananula ulungu lʼanya ami. Dime kakadjangela ului awo tshe adjangu.

¹³Dimi lakudia Kuro lu sambu kʼololo, La dimi layukitanyia mbuka yandi tshe. Ndi ayuhika usumba ami. Ndi ayutshungula antu ami uma lu fumbi utshungulatshungula, Aha la difutu diʼetshungwelu, mbata Latuyalaka Kanga lulimbilimbi.

¹⁴Latuyalaka kata okone ati: Ukundji wʼEdjibitu, ongonyi wʼEtiyopiya, Ndu asi Seba, antu wʼetali, Wayuya la ntundu kaye, wayuyala waye. Vo wayuya wukelekami la molola, wayukuyela, wayukukhusamela, Wayukolemia vati: Unyashungu eko la ye. Nduku Unyashungu ukina weko, paka ndi.

¹⁵Mete, we keli Unyashungu latuyasheka, Unyashungu wa Isariyele, Ushimbedi.

¹⁶Asedi wa dikishi tshe wayukanana, Wayutewala, wayolombo la sonyi kame.

¹⁷Keli nyu, asi Isariyele, nyayushimbamela Le Latuyalaka la panda ka pundju, pundju. Nyu hanyuhananaki, hanyutshamaki sonyi.

¹⁸Okone mbata Latuyalaka, Lakatungi ulungu (ndi eli Unyashungu!), Lakatungi kete, ndu lakayitshi (ndi kakayishikike; Ndi kuyitunga utungatunga, Keli akayitungi dia antu mbidjase loko!) kata ati: Di mi keli Latuyalaka, nduku ukina.

¹⁹Dimi konteketa lu usheshe Kana lu dihuli dia udjima dia la kete. Dimi kumvutela diuhu dia Jakoba Dia vo nyangami uyangayanga. Dimi Latuyalaka latutaka akambu wa mete, Latoteketaka akambu wʼusimbwi.

²⁰Nyu wane wakahandi lʼatei wʼasi wedja, Nyomote, nyuyi, nyusukani kame. Waku watembaka dikishi diawo diʼetamba, La watolombaka etemolatemola kaheyi mbashimbela, kema la yimba.

²¹Nyotekete, nyuwaela, walakani kame! Akona akati dikambu ne edjedja? Akona akaditeketa lu nshi ya ntundu, aha dimi, Latuyalaka? Nduku Unyashungu ukina weko, Dime keli Unyashungu wʼololo la ushimbedi, nduku ukina.

²²Nyu tshe wa la kuma ya la kete, Nyukadimo uya le mi, ku nyayushimbamela, Ne dia dime keli Unyashungu, nduku ukina.

²³Dimi lambuyatshiba la diui dia shikaa uma lʼunyo ami, Diaheyi nkalula ukalulakalula nti: Adui tshe ayunkhusamela, La nimi tshe yayutshiba[90] dia mbekama le mi.

²⁴Antu wayutaka vati: Samou kʼololo la wulu weko paka le Latuyalaka ndame. Antu wayuyakaka le ndi, Keli waku tshe watuwukaka kele, wayutshama sonyi.

²⁵Tukanula ta Isariyele wayuyindjama, Ndu wayutumbwama le Latuyalaka.