Read tetala Isaya 48 Bible Online

Isaya 48 - tetala bible

Isaya 48

¹Nyuhukami, nyu wa lu luudu la Jakoba, Watetamaka lukumbu la Isariyele, Ndu wakatumbi uma lu dikila dia Juda, Watutshibaka lu lukumbu la Latuyalaka, Watetaka Unyashungu wa Isariyele aha lu mete, kana lu ololo.

²Vo watuyataka vati: Asi usumba wʼekila mbesu; watekamaka Unyashungu wa Isariyele, Letawo vati: Latuyalaka Kanga lulimbilimbi.

³Umaka nshi yʼedjedja, mbakamataka akambu wahatayi. Vo wakatumbaka uma lʼunyo andi. Dimi lakasanyaka, shashimuya mbakamatshaka, Ku vo wakashidiyamaka.

⁴Dimi mbeyaka nti: We eko kanga utema a wulu. Kingu kaye keko uku luwulu, La fumu kaye keko uku ohotela.

⁵Diako mbakamakutela akambu ane nshi yʼedjedja. Lakakenyawo ntundu vo watayala, we utuyuta wati: Ekishi kami kambatsha. Ekishi kami ka lutshula la ka lolelola, mbakadjanga.

⁶We akuki akambu ane, ambalimbitela, Undi, we huyala omenyi loko? Umaka kakiane dimi layukenya akambu wʼeyuyu, Akambu wushami wakiye kumbeya.

⁷Vo wambutumba kakiane, aha lu nshi yʼedjedja. We atawaukaka nduku lushi paka elo, We utukuyuta wati: Lambuwaeyaka.

⁸We kumbauka, kumbaeya nduku yema, Ee, uma lu nshi yʼedjedja atui aye waki khu, Ne dia dimi lakeyi nti: We kuludi too la lukesu, Ndu we aketama uma lʼutema wa nyo ati: Kanga uhedia.

⁹Ne dia lukumbu lami, mbamumushimba kele kami; Ndu dia lutumbu lami, mbamumuyakimela, dimi ntukukudiaka.

¹⁰Dimi lakakutshulula, aha uku atuwutshululaka fesa, Keli lakedika lu khuka kʼasui.

¹¹Ne dia dikambu diami, Ee, ne dia dikambu diami, mbayumutsha akambu ane. Ukundi ayonywama lukumbu lami? Dimi hakimo lutumbu lami le untu ukina.

¹²Umbukeli, we Jakoba! Ee, we Isariyele lakameti! Dimi dime, keli etatelu ndu ekumelu.[93]

¹³Lunya lami mbakakitsha tshina dia kete, Lunya lami la pami mbakananula ulungu. Lamʼatumuwaetaka, vo watuyakaka esadi.

¹⁴Nyu tshe, nyusangani kame, nyuki! Ekishi kakona lʼatei a ditemolatemola dianyu kakati akambu ane? One latulangemaka le Latuyalaka, ayutshela Babilona uku alangandi. Ndu lunya landi layuyala wulu le asi Kaladiya.

¹⁵Dimi dime kakateketa; ee, dime kakaweti. Dimi kakawela, ku ndi ayuluwanya akambu andi.

¹⁶Nyusukani le mi, nyulungi dikambu ne, Umakʼetatelu dimi konteketa lu usheshe. Umakʼetatelu kʼakambu ane, dimi laki lawo. Ku kakiane Khumadioudjo, Latuyalaka akantumi, ndu Nyuma kandi.

¹⁷Okone mbata Latuyalaka, Utshungudi aye, lʼEkila la Isariyele ati: Dimi leli Latuyalaka, Unyashungu aye, Latuketshaka dia we nduwana. Ndu latukolombolaka lu mbuka kahumbaye ntsho.

¹⁸Utunduyala we akalungi elembe ami, Tshiki ki kaye kutuyala utamanya, La sambu kaye kʼololo kutuluwana otekoya;

¹⁹Tshiki tukanula taye tutufula uku losenga, La anʼaye wutuyala efula uku seke ya lokongo; Tshiki lukumbu laye tutululana, Tutuluhamela uma la ntundu kami.

²⁰Nyutumbi uma la Babilona,[94] Nyulawo uma lʼatei wʼasi Kaladiya! Nyuhangohango nyati: Latuyalaka Akatshungula ukambi andi Jakoba! Nyimbaki dikambu ne lʼongenongeno, Nyutaditaka pulu ndu la kuma ya kete.

²¹Nyutaki nyati: Vo kumvo la pusa kʼashi Lamʼakandatalombolaka lʼesui wa shenga. Ndi akatundjiya ashi uma lu dive, akati dive, Ku ashi wakafukofuko.

²²Latuyalaka kata ati: Ki kema le antu wa kolo.[95]