Read tetala Isaya 50 Bible Online

Isaya 50 - tetala bible

Isaya 50

¹Latuyalaka kambula okone ati: Lendʼeli mukanda wa ndjaka diwala, wakamaseke nyengenyu? Kuyanga lʼatei a wane wunkuli abasa, Le akona akamanyusundja le ndi? Enda, nyu nyakatshanyema ne dia ehedia anyu, Ndu nyengenyu akasekama ne dia kolo yanyu.

²Lamʼakamayi, dikambu kuna diakimi kuntana nduku untu? Lamʼakameti, dikambu kuna diaki untu kunkaluyami diui? Undi, lunya lami mundumundu mbelo, Mbahalakuki mbatshungula? Dimi kema la wulu wa mbashimbela uka? Enda, la luhangu lami mbamumumia ashi a waki, Mbamumukadimula ekedi shenga. Nsi yawo yayuvo la pusa kʼashi. Yo yayuyala sulu, ne dia kema ashi.

³Dimi layolotsha ulungu udjima a tshududu, Ndu layukumba ulangitshi wa dikutu.

⁴Khumadiondjo, Latuyalaka lambumbisha lulimi lʼuluwanyi La dimi mbeya ndakanya one lambokomo, Atumbetulaka pindju tshe, Atudihulaka atui ami dia vo mbuka ololo.

⁵Khumadiondjo, Latuyalaka akandjihula atui. Dimi kumbuhedia, kuyanga nkalula ekongokongo.

⁶Dimi lakalungi okongo le wane wakankomolaka, La luwanga le wane wakambikulaka ndedu. Dimi kuminya elundji kami uma lu sonyi, La uma lu soi yakawampongwelaka.[102]

⁷Khumadiondjo, Latuyalaka atunkimanyiaka, Diako mbahamatukandakandaka, Mbatumukikitshaka elundji kami uku dive. Dimi mbeyaka nti: Halutshama sonyi.

⁸One latunyindjaka, eko suki. Akona ama la mi na? ndi atumbi, temali kame! Akona eli utunyi ami? ndi asukani!

⁹Enda, Khumadiondjo, Latuyalaka atunkimanyiaka. Akona avumbidja mananu? Enda, vo wayolemba uku emusu wʼahondo, ku wediya ayuwale.[103]

¹⁰Untu tshe lʼatei anyu latukaka Latuyalaka woma, Alungi diui diʼukambi andi. La one tshe latokendakendaka lu udjima, aha lʼusasi, Aʼungameli lu lukumbu la Latuyalaka, ekami Unyashungu andi.

¹¹Enda, nyu tshe wahetsha dja ndu wakime ewa, Nyokendekende lu dja la lu ewa wakanyahetsha. Uma lu lunya lami, mbayukuma dikambu ne le nyu. Nyu nyayetama lʼatei wʼasui.