Read tetala Isaya 54 Bible Online

Isaya 54 - tetala bible

Isaya 54

¹We ekumba, laki kumbuta ona, laki kuntsho diemi, Uhangohango lʼongenongeno, Ne dia osekami ayuleka one lutshukami mbuta ana efula.[119]

²Okokole luudu laye la dipema. Unanule apema wa mvudu yaye, tuhekoki. Utaluli ekodi ndu ushikike dikoho dia luudu laye,

³Ne dia ayudiangana lu lunya la pami Ndu lu lunya la lomoso. Tukanula taye tayulela wedja Ndu wayululanela lu esumba wa hwe.

⁴Tukaki woma, ne dia we huvo sonyi. Tukananaki, ne dia we hutshama sonyi. Keli we ayuhela sonyi ya lu nshi yaye yʼusekaseka. We huho lotengo lakawakotengaka lamʼakiye wadi aki udu.

⁵Utungi aye keli umeye. Lukumbu landi eli Latuyalaka Kanga lulimbilimbi. LʼEkila la Isariyele keli Utshungudi aye. Ndi ambetama ati: Unyashungu a kete tshe.

⁶Latuyalaka, Unyashungu aye, kata ati: Dimi lambuketa ntu uku umuntu lakasekama, Leli la lunyangu lʼutema, Uku wadi lakawasukula eki usekaseka.

⁷Etenyi ka tshitshe kakamakoseke, Keli layukukaluya la ketshi ka mamba.

⁸Lʼetena ka tshitshe kakimi la kele, Dimi lakakushe elundji kami. Keli uma lu ngandji kami ka pundju, mbayumukul a ketshi, Mbata Latuyalaka, Utshungudi aye.

⁹Dikambu ne diambufana la nshi ya Noa le mi. Uku akamatshibi lu nshi ya Noa nti: Ashi hawukukanelaki ntu ladiku dia kete.[120] Osoku mbatshibami nti: Dimi hakukaki kele, hakuhangwelaki ntu.

¹⁰Kuyanga ekungu kumoka kana akuna kosekoka, Ngandji kami ka shikaa hamoki uma le ye. La daka diami dia ki hasekoki, Mbata Latuyalaka, latukukaka ketshi.

¹¹Isariyele li, we usuyami, lakahenyahenyamaka Ndu laki kunsambema, Ulungi, dimi layudja ave aye lu alangi wʼamena! Layuhika atshina aye la ave wʼedima wʼushinga a wulu.

¹²Dimi layutsha ete aye lʼave wa tilili, kuki yaye lʼave wa ngaingai, Ndu eheli kaye ka lukumbu lʼave wʼushinga a wulu.[121]

¹³Ana aye tshe wayetshama le Latuyalaka,[122] Ku vo wayuyala la ki kʼutamanya.

¹⁴We ayushikikala lu sambu kʼololo, Asui wayuyala etali uma le ye, Ne dia we hahumbi mbuka woma. Elanyelu kayuyala etali uma le ye, To husukana le ye ntu.

¹⁵Naka vo wayukudjela tuseki, dikambu so hadiuya uma le mi. Untu tshe layulanga ndo la ye, ayolembiama le ye.

¹⁶Enda, dimi kakatungi utshudi a mbulu latufufaka dja, Latutshulaka ehumo ka ta, dia ntsha ulimu ato. Dimi kakatungi ndu ulanyishi latulanyaka.

¹⁷Ehumo tshe kambutshulama dia ndo la ye huluwana. Lulimi tshe layukutungeia dikambu lʼelumbwelu, We ayuludja mananu. Oso eli sangu diʼekambi wa Latuyalaka. Oso eli eyindjamelu kawo ima le mi, mbata Latuyalaka.