Read tetala Isaya 57 Bible Online

Isaya 57 - tetala bible

Isaya 57

¹Untu ololo avo, ku nduku untu ladja yimba lu dikambu diako. Akanga wa ketshi watunyemaka, ku nduku lakana ati: Untu ololo ambunyema la ntundu kʼelanyelu.

²Ndi amboto lu dihuli dia ki. Antu wʼololo watukundjaka mumuya lu mbetu yawo.

³Keli nyu, ana wa umuntu kanga doka, Diuhu dia kanga munanyi ndu dia unyimba kanga luseka, nyusukani.

⁴Akona asokanyu? Akona asenyu enyo? Akona aletwenyu nimi? Aha ana wa kolo mbenyu la diuhu diʼakanga a kashi uka?

⁵Aha nyu mbatuyakimoka lʼotemwelo wa dikishi, La tshina dia utamba tshe wʼuyuyu, Mbatudiakaka ana lʼekidi, lu weuku wʼave uka?

⁶Lʼatei ave wa lokolonga wa lukidi keli esonwelo kanyu, Ee, vo weli etenyi kanyu ka sangu. Nyu nyatuwalambulaka elambu, Nyatuwatelaka elambu wa lutela. Undi, dimi mbeyaka nembohala lu dikambu diako?

⁷Lʼote wʼukungu wʼutali kakanyakitsha tangi yanyu, Ndu leko katunyumbelaka la ntulambula elambu.

⁸Nyu nyakakitsha euhwelu kanyu lʼedia lukuki ndu lʼedia dikoho. Nyu nyakanseke, nyakatuyakimo lʼotemwelo ukina. Nyu nyakakokola etema anyu, Nyakadji la dikishi diako sheki. Nyakangenangena lʼotemwelo adio.

⁹Nyu nyakatshu le khumʼekanga La iso la diango diʼupumu efula, Nyakatumi akendji anyu etali, Pulu ndu lʼUdimu a Pengandu.

¹⁰Nyu nyakalembe lu lokendo lanyu. Nyu kumvuta nyati: Tambuheko. Nyakakundja wulu wʼuyuyu, mbakinyu kunkita balakata.

¹¹Akanyukia woma dia nyu mvuta kashi? Akanyusakia lukumba diaha nyu mbuhomi La diaha nkana yimba lu dikambu diami? Lamʼakamayakimela edja, Undi, nyu nyakambuki woma?

¹²Layutaka dia ololo anyu la etsha anyu, Keli akambu aku hawuyala waho le nyu.

¹³Lamʼalelanyu, dikishi dianyu mbeyaka nyutshungula uka? Efufelu ka luwi kayudinya, Ku lopepe layudiemba dio tshe. Keli one latuyangaka eshamelu le mi, Ayuyala kanga wudja, ayukita ndu ukungu ami wʼekila.

¹⁴Diui diayutama ati: Nyati osese, nyolongosole, nyutedia afuku, Nyunya utamba wa ntakanya lu mbuka ka wudja ami,

¹⁵Ne dia KhumʼUlungu, kanga edjaselu ka pundju Ndu kanga lukumbu lʼekila, kata ati: Dimi layudjase ladiku lu dihuli diʼekila, Kame la kanga utema wambate ndu wa ndjakitshakitsha, Dia mbulula lumu la kanga ndjakitshakitsha La nkikitsha kanga utema wambate.

¹⁶Dimi hatudjaka lʼuntu tamu pundju, Kuyanga ntshikala la kele nshi tshe. Nyumu yatukukita balakata la ntundu kami, Ee, etema wakamatungi,

¹⁷Ne dia kolo ka okom va andi mbakamuki kele, mbakamokomola. Dimi lakawushe elundji, lakumala; Ku ndi akatetemala ndjela lulangu lʼutema andi.

¹⁸Dimi lakenyi etsha andi, layokonoya. Dimi layolombola, layusamba ndi la wane watulelaka la ndi.

¹⁹Layukitsha diandu lʼelomo. Ki, ki, kayali le one leli lasuki Ndu le one leli etali,[127] mbata Latuyalaka. Dimi la; akonoya.

²⁰Antu wa kolo weli uku ashi a waki Wasutshashutshama, waheyi nembohala, Ne dia ashi awo watunyiyaka ditshi la loteke.

²¹Ki kema le antu wa kolo, mbata Unyashungu ami.[128]