Read tetala Isaya 59 Bible Online

Isaya 59 - tetala bible

Isaya 59

¹Nyuki, lunya la Latuyalaka kema mundumundu. Ndi mbeyaka nyushimbela, Atui andi kema khu, ndi mbeyaka mbuka.

²Keli ehedia anyu mbambunyatanya la Unyashungu anyu. La kolo yanyu yambunyushela elundji kandi diaha ndi nyukela,

³Ne dia anya anyu watululaka too la dikila, La pita yanyu too la kolo. Elomo anyu watoteketaka akambu wa kashi, La nimi yanyu yatutaka akambu wa kolo.

⁴Nduku latuyelaka sambu kʼololo, Nduku latutaka akambu wa mete, Vo watekamaka akambu wʼanyanya, watutaka kashi, Watutshoka waemi wa kolo, watutaka ehedia.

⁵Vo watuhuhulaka ekeli wa dikhuha, watelaka etei wa dihuha. Naka untu ayole ukeli omotshi, ku ndi mvo; Naka ayoteta omotshi, ku ului ntumba.

⁶Etei awo haweyi ndjala ahondo wa ndota. Antu hawolote diango diatshawo. Elimu awo weli elimu wa kolo, La ditshelu dia ngala dieko lʼanya awo.

⁷Ekulu awo watulawoka utsha lu kolo. Vo watusamanyaka dia ntutundja dikila diaha la unungu. Tukanyi tawo teli tukanyi ta kolo. Ohenyohenyo la elanyelu weko lu mbuka kawo.

⁸Vo haweyi mbuka ka ki.[129] La nduku dikambu diʼusimbwi dieli lu mbuka yawo. Vo wakayatela mbuka yʼakote akote. Untu tshe latokendakendaka loko, heyi ki.

⁹Ne dia akambu wʼusimbwi weko etali uma le su, Mbahakumi panda le su. Shu tatulungamelaka yanyi, ku udjima utu. Shu tatukungelaka usasi, Keli tatokendakendaka lu luhutshihutshi.

¹⁰Shu tatamambaka eheli uku akanga atutshungu, Tatekekaka uku antu waha la ashu. Tatutakanaka la midi uku la hyutshihutshi, Uku edu lʼatei wʼakanga a wulu mbesu.

¹¹Shu tshe tatumulaka amu uku tambwe, Tatukhumaka akhumu uku binga. Shu tatukungaka etshungwelu, ku to kema. Tatulungamelaka panda, ku to keko etali uma le su,

¹²Ne dia ehedia asu waya efula la ntundu kaye, La kolo yasu yeko emenyi asu. Mete, ehedia asu weko kame la su, Shu mbeyaka kolo yasu.

¹³Takanguna ndu takahedia Latuyalaka, takaseke Unyashungu asu. Takasanguya akambu wa ngala la wʼetombokwelo. Takakani aui wa kashi lʼetema, takawati.

¹⁴Etshungwelu kakakalula ekongokongo, La panda kambemala etali. Mete kambunyema lʼesese, Ku akambu wʼusimbwi haweyi mboto leko.

¹⁵Mete kakahumbama. Okone one latumoka uma lu kolo, atundamaka. Latuyalaka akenyi dikambu so, keli ndi kongenangena, Ne dia akambu wʼusimbwi tawakiko.

¹⁶Ndi akakashimo lamʼakindi komena oteketedi. Ku paka lunya landi mbakukimanyia, La sambu kandi kʼololo kakushikike.[130]

¹⁷Ndi akakime sambu kʼololo uku engawu,[131] Akahe lufule la panda lʼote andi.[132] Ndi akalote esombweyo uku dihondo; Akayakumbi la kandjema uku koti.

¹⁸Ndi ayufuta antu uku ditshelu diawo: Kele le atunyi andi, sonyi le wane watuhetshaka. Ndi ayufuta ndu wa lu asenga pupu.

¹⁹Antu wayukaka lukumbu la Latuyalaka woma umakʼedjelu, La lutumbu landi umakʼehutwelu ka unya. Latuyalaka ayuya uku ashi wa pedu, Watokelaka uma lʼefufelu kandi.

²⁰Utshungudi ayuyala la Siona, Ndu le asika Jakoba watukadimoka uma lu kolo yawo,[133] mbata Latuyalaka.

²¹Daka diakamalakana la wo ne nti: Nyuma kami keli la ye, la aui ami wakamadji lʼunyo aye hawumoki uma lʼunyo aye kana uma lʼenyo wa anʼaye, kuyanga uma lʼenyo wʼekana aye, umaka kakiane edja ndu pundju, mbata Latuyalaka.