Read tetala Isaya 60 Bible Online

Isaya 60 - tetala bible

Isaya 60

¹We Jerusalema, uneli, osenyami, Ne dia lutumbu la Latuyalaka lambukuhutwela, Ee, usasi aye wambukuma.

²Enda, hyutshiliutshi ayukumba kete, La udjima a tshududu asi wedja. Keli Latuyalaka ayuyala ladiku diaye, La lutumbu landi layukohetela.

³Ku wedja wayuya dia ndjuyanga usasi aye, La khumi ya dikanga wayusamanya uya Lu ngaingai kʼesenyelo kaye la pindju.

⁴Edia ashu aye, endi lʼutshimba. Vo tshe wambomota kame, wuyayi uya le ye. Anʼaye wʼapami wayuya uma lʼetali, La anʼaye wʼamantu wayembama lu tukundu.

⁵Lamʼayuyena dikambu ne, we ayongenangena. Utema aye ayulimbolimbo lʼongenongeno, Ne dia engonyi wa lu ashi a waki wayukadimo le ye, La ekundji a wedja wayuya le ye.

⁶We ayukumbama lʼului wa kamelo, Kamelo yʼesekaseka yʼuma la Midiyana, la yʼuma la Efa. Yo tshe yay uya uma la Sheba yayembe paunyi La malashi wʼushinga a wulu, yayatumbula Latuyalaka.

⁷Nyimba tshe ya dungalunga ya la Kedara yayomotshama le ye, Ndu waumi wʼekoko wa la Nebayota wayuyala lʼulimu aye. Vo wayumbela lʼediakelu kami, Ku dimi layuwaetawo lʼongenongeno. Layutumbula luudu leli too la lutumbu lami.

⁸Wana aku wayayi esadi uku wangi, Wayafumbo uku bingu uya lu kefu kawo na?

⁹Ne dia asenga watulungamelaka le mi, Mashua wa la Tarashishi wayuya ntundu, Dia mbela anʼaye uma lʼetali, kame la fesa la paunyi yawo, Lu lukumbu la Latuyalaka, Unyashungu aye, Ee, le lʼEkila lʼIsariyele, Ne dia ndi ambukutumbula.

¹⁰Asi wedja wayuhika peli diawo ntu, La khumi ya dikanga yawo yayukukambela ulimu, Ne dia dimi laki la kele mbakamakusuya, Keli uma lu ngandji kami kakukami, mbamumukuka ketshi.

¹¹Asuku aye wayutshikalaka hwe nshi tshe. Vo hawudihamaka la yanyi kuyanga lʼutshu, Dia mbotshiya khumi ya dikanga ya wedja la atshindedi awo Lamʼayuwukelaka ekundji wa wedja awo,[134]

¹²Ne dia wudja la diulelu wahakukambela ulimu, Wayulanyema, ee, wudja ako wayushila ushiki.

¹³Lutumbu la Lebanona lay uya le ye: Esasi, eduwula, esingi, dia nenga dihuli diami diʼotemwelo. Dimi layutumbula dihuli diatumukitshaka ekulu.

¹⁴Ku ana a waku wakakusuyaka, Wayuyakitshakitsha la ntundu kaye, La waku wakakuhetshaka, wayukhusama la ntundu kaye.[135] Vo wayuketaka vati: Usumba wa Latuyalaka, Siona ya lʼEkila lʼIsariyele.

¹⁵Kuyanga we akatunama kana akahetshama Edja ndu nduku untu lakakindula lʼatei aye, Dimi layukete engo ka nemo pundju, Ongenongeno wa lolonga la lolonga.

¹⁶We ayulela wedja diango, ayulela ndu khumi ya dikanga. Okone we ayeya wati: Dimi keli Latuyalaka, Ushimbedi aye, Utshungudi aye, Kanga Wulu a Jakoba.

¹⁷Dimi lavukela paunyi lu dihuli diʼohotela, Fesa lu dihuli dia luwulu, ohotela lu dihuli diʼutamba, Ndu luwulu lu dihuli diʼave. Dimi layete elombodi aye ki, La ambuledi aye antu wʼololo.

¹⁸Hawuka wata akambu wa ngala lu wudja, Kuyanga ohenyohenyo lʼelanyelu lu kete yaye. We ayeta peli diaye wati: Panda, La asuku aye wati: Diandu.

¹⁹We huyala la uhumba wa unya nkohetela la yanyi, Kuyanga ekashiyelu ka ngondo, Ne dia Latuyalaka ayuyala usasi aye pundju, Unyashungu aye ayuyala lutumbu laye.[136]

²⁰Unya aye hawudjaki, ndu ngondo kaye hashishoki, Ne dia Latuyalaka ayuyala usasi aye pundju. Ku nshi yaye ya delu yayushila.

²¹Antu aye wayuyala antu wʼololo atu. Vo wayukita kete pundju. Vo weli lukuno lakamune, Ndu ulimu wʼanya ami, dia dimi ntumbwama.

²²One leli tshitshe ayuyala kinunu, Ona one luleki tshitshe wudja a wulu. Dimi, Latuyalaka, layusamanya dikambu ne lʼetena kadio.