Read tetala Isaya 61 Bible Online

Isaya 61 - tetala bible

Isaya 61

¹Nyuma ka Khumadiondjo, Latuyalaka keli la mi, Ne dia Latuyalaka akankiti iso Dia dimi nsambisha amenyi fono lukumu lʼololo.[137] Ndi akantumi dia dimi nkonoya akanga wʼetema wambate, Dia mvutela fumbi dia vo ndjala la ndjadjasela, La dia mvutela asi lukanu dia vo ntshungo;

²Dia nsanyia antu diʼeleku ka ngandji ka mamba ka Latuyalaka[138] La dia lushi lʼesombweyo ka Unyashungu asu, Ndu dia nsamba antu tshe walela;[139]

³Dia nembohaya wane walela lu Siona, Dia mbasha alembo lu dihuli diʼutuku, La iso kʼongenongeno lu dihuli diʼutanda, Diandu lu dihuli diʼukananu, Dia vo mbetama vati: Etamba wa sambu kʼololo, Ekambo ka Latuyalaka, dia vo mbutumbula.

⁴Vo wayuhika ngelu ntu lu ahuli wakalana. Vo wayunyiya dihikahika diakato. Vo wayulula esumba wakalana, Dilanyelu dia nonga efula.

⁵Asi wedja wayuyala leko dia Ndesha nyimba yanyu ya dungalunga. Vo wayuyala ekambi anyu wa dikambo Ndu wa lu dikambo diʼelua.

⁶Nyu nyayetama elombedi wa Latuyalaka. Antu wayunyeta vati: Ekambi wa Unyashungu asu. Nyu nyayole engonyi wa wedja, Ndu nyayutumbwama uma lʼengonyi awo.

⁷Nyu nyayukundja difutu tena pendi lu dihuli dia sonyi. Nyayongenangena lu sangu dianyu lu dihuli dia dionyo. Okone nyu nyayukita diango pendi pendi lu kete yanyu, Nyayuyala la ongenongeno wa pundju.

⁸Dimi, Latuyalaka, latulangaka akambu wʼusimbwi, Latuhetshaka uvi la akambu wa kolo. Dimi layunyufuta la kolamelu, Layudja la nyu sheki ya pundju.

⁹Ekana anyu wayeyama lʼatei a wedja, La tukanula tanyu lʼatei wʼantu, La antu tshe wayuwaena, wayeya vati: Vo weli diuhu diakatshokola Latuyalaka.

¹⁰Dimi layongenangena le Latuyalaka. Utema ami ayutamanya ngenangena le Unyashungu ami, Ne dia ndi akandotsha ahondo wa panda kandi. Ndi akankumbi koti dia sambu kʼololo, Uku ataheka utshuki a wadi dembo, Ndu uku atuyalengaka utshukami dengalenga diandi.[140]

¹¹Ne dia uku atudihulaka kete etumbatumba, Ndu uku atomenyaka ekambo wehu, Osoku mbayomenya Khumadiondjo, Latuyalaka panda La lutumbu la ntundu ka wedja tshe.