Read tetala Isaya 62 Bible Online

Isaya 62 - tetala bible

Isaya 62

¹Ne dia ngandji ka Siona mbahamolembohala, Ne dia ngandji ka Jerusalema, mbahamumuya, Edja ndu eyindjelu kandi kambenama uku usasi, La panda kandi uku uwa waheta.

²Wedja wayenda eyindjelu kaye, La khumi ya dikanga tshe wayenda lutumbu laye, Ku we ayetama lukumbu lʼuyuyu layukole Latuyalaka.

³We ayuyala dembo dia kusu lu lunya la Latuyalaka, Ee, lufule la diulelu lu lunya la Unyashungu aye.

⁴We hayetama osekami ntu, Ndu wudja aye hawetama elanyelu ntu. We ayetama ongenongeno ami, la wudja aye utshukami, Ne dia Latuyalaka atongenangenaka dikambu diaye, Okone wudja aye ayuyala la umi ntu.

⁵Uku atutshukaka olongo a pami usekaseka a umuntu, Osoku mbayukutshuka anʼaye wʼapami. Uku atongenangenaka utshuki dikambu dia utshukami, Osoku mbayongenangenaka Unyashungu aye dikambu diaye.

⁶We Jerusalema, dimi lakakitsha elami ladiku dia peli diaye. Vo hawutshikala ki ndu la yanyi ndu lʼutshu. Nyu wane watuhulaka Latuyalaka, tanyumuyaki!

⁷Tanyuwushaki mumuya, Edja ndu ndi ambushikike Jerusalema, Edja ndu ndi ambuyete engo ka nemo.

⁸Latuyalaka akedia lunya landi la pami la wulu; Akatshibi la etambi kandi ka wulu ati: Dimi handjusha atunyi aye mbu yaye ya nde ntu, Asi wedja hawuyono wanu aye wakayatshi.

⁹Wane wakakambi mbu ya nde, wayuyile, Ku wayandula Latuyalaka. La wane wakahini elua, wayono ashi awo Lu aseke wʼetemwelo kami.

¹⁰Nyutumbi la suku, nyutumbi dia ntolongoswela antu mbuka. Nyolongosole esese, nyutedia afuku, nyunya ave. Nyedia ekuhu ka koi ladiku diʼantu.

¹¹Enda, Latuyalaka ambudianganya diui pulu ndu la kuma ya kete ati: Nyuteli ona umuntu Siona nyati: Enda, panda kaye uyayi kame la difutu diandi, La diango diandi dia lukahu diambuwetela la ntundu.[141]

¹²Vo wayuwaeta vati: Wudja wʼekila, Atshungwami wa Latuyalaka. Ku vo wayuketa we vati: Uyangemi, usumba wahasekama.