Read tetala Isaya 65 Bible Online

Isaya 65 - tetala bible

Isaya 65

¹Dimi laketawo mbukela wane waki konombami. Dimi laketawo ntanema le waku waki kunyangami.[148] Dimi lakatela wudja waki kumbetaka lukumbu lami. Nti: Dimʼone, dimʼone!

²Dimi lakasimbula anya ami nshi tshe Le wudja wʼakanga wʼuhedia,[149] Watokendakendaka lu mbuka ya kolo, Watuyelaka tukanyi tawo.

³Nyu nyeli wudja watumbutshaka kele ndu la ntundu kami, Watulambulaka elambu lu dikambo, Watutshumbaka elambu wa malashi ladiku diʼatafadi.

⁴Nyu nyeli wudja wateteka waumbu ahuli wa mbidjase, La weuku ahuli wa ndala; Watolekaka sumbu, Ndu ushi wa sulu wa wononyi.

⁵Watumvutelaka vati: Umo laku! Tusukanaki la le su, ne dia shu nkuleka ololo. Akambu ane weli dinga lʼehembe ami, Ndu uku dja yatohetaka yanyi tshe.

⁶Enda, kene kakamasanguya la ntundu kami nti: Dimi halolembohala, keli layunyusuya, Ee, dimi layunyusuya lu tulu yawo,

⁷Ne dia kolo yanyu, ndu ne dia kolo ya washenyu, Wakatshumbaka malashi lu ekungu Ndu wakantengaka lu akuna, mbata Latuyalaka. Okone layuwaedikela difutu uku etsha a wo wa ntundu.

⁸Latuyalaka kata okone ati: Uku atuwuhinaka ashi wʼelua uma lʼesandji, Ku vo mvuta vati: Tanyukilanyaki, Ne dia otshoko weko loko. Osoku mbayumutsha ne dia ngandji kami le ekambi ami, Diaha dimi mbalanya vo tshe.

⁹Dimi layutundja tukanula uma le Jakoba, La ekito wʼekungu ami uma le Juda. Esonami ami wayukita kete yako, La ekambi ami wayudjase loko.

¹⁰Sharona ayuyala dihuli dia dungalunga ndekaka adiyu, La ukidi wʼAkora[150] dihuli dia dio mbetamaka, Ne dia wudja ami watunyangaka.

¹¹Keli nyu wane watonsekaka, dimi Latuyalaka, Watuhelaka ukungu ami wʼekila, Wakalela Lukulu lʼOlo mesa, Ndu wane wakasohanyia Wendjudi wanu.

¹²Mete, dimi layunyukimo dia nyu ndjakema la yombo, Ne dia lamʼakamanyeti, nyu kumbetawo; Lamʼakamateketa, nyu kununga. Keli nyu nyakatshaka akambu waki kolo lu ashu ami. Nyu nyakasonola akambu waki nkongenyangenyami.

¹³Diako mbata Khumadiondjo, Latuyalaka ati: Enda, ekambi ami wayole, keli nyu nyayuvo ndjala. Ekambi ami wayono, keli nyu nyayuvo pusa. Ekambi ami wayongenangena, keli nyu nyayutshama sonyi.

¹⁴Ekambi ami wayimba esambu la etema wʼongenongeno, Keli nyu nyayulela la etema wa lunyangu, Nyayukhuma akhumu la ukiyanu wa lʼetema anyu.

¹⁵Nyu nyayutshikela esonami ami lukumbu lanyu la mananu. Khumadiondjo, Latuyalaka ayunyudiaka. Ku ndi ayole ekambi andi lukumbu lukina.

¹⁶One latulangaka ntshokwama lu kete, Ayulanga ntshokwama paka le Unyashungu a mete, La one latutshibaka lu kete, Ayutshibaka paka le Unyashungu a mete, Ne dia asui wa ntundu wambuhamamela, wambumo lu ashu ami.

¹⁷Enda, dimi lutsha ntunga ulungu wʼuyuyu la kete yʼuyuyu[151] Akambu wa ntundu wayuhamamela, hawuyuhwama ntu.

¹⁸Nyongenengene, nyuyali la ongenongeno wa pundju, Ne dia kene kayangami ntunga. Enda, dimi lutsha ntunga Jerusalema, usumba wʼongenongeno, La antu awo, antu wʼongenongeno.

¹⁹Dimi layongenangena dikambu dia Jerusalema ndu dia antu ami. Alelu la tukuku tʼalelu hawukema leko ntu.[152]

²⁰Nduku ona layuvo lamʼekindi la nshi tshitshe, Ndu usumbi havu tshikima ndi ambukutsha nshi yandi. Ona mbeyaka mvo, tshikima aya deku lukama, La untu a kolo laya deku lukama, ayudjama mananu.

²¹Vo wayuhika mvudu, wayudjaseka loko; Wayune dikambo diʼelua, wayolekaka elua wʼuma loko.

²²Vo hawuhika mvudu, ku akina ndjudjase loko. Vo hawukamba dikambo diʼelua, ku akina ndjole elua uma loko. Nshi yʼantu ami yayuyala uku nshi yʼetamba. Esonami ami wayongenangena ne dia elimu wʼanya awo.

²³Vo hawukamba ukambakamba, kuyanga mbuta ana, Dia vo ndiakema shashimuya, Ne dia vo weli ana wʼatshokwami wa Latuyalaka ndu anʼawo pupu.

²⁴La ntundu vo watambeti, dimi layakaluya diui. Layuwaukela lamʼekiwo lu nteketa.

²⁵Laundu la onʼokoko wayole kame. Tambwe ayole adiyu kame la ngombe. La ului ayoleka paka ditshu. Vo hawutshela nduku engo kolo, Kana kilanya lʼukungu ami wʼekila tshe,[153] mbata Latuyalaka.