Read tetala Isaya 66 Bible Online

Isaya 66 - tetala bible

Isaya 66

¹Latuyalaka kata okone ati: Ulungu eko kiti kami ka diulelu,[154] La kete eko kihuna kʼekulu ami.[155] Wuhu akona wa luudu wukukinyu mbikelami? Lendʼeli dihuli diukukimi mbidjase?

²Lunya lami mbakatungi diango ne tshe. Osoku diami mbedio dio tshe, mbata Latuyalaka.[156] Enda, dimi layediya ashu ami Utsha le one latusuwaka ndu leli lʼutema ambate, Utsha le one latukaka diui diami woma.

³Untu latudiakaka ngombe eko uku one ludiaki untu. Untu latulambulaka onʼokoko, Eki uku one lokodi fo kingu. One lalambula ulambu wa shima, Eko uku one lukimwi dikila dia sumbu. Untu latshumba malashi, Eko uku one latemola dikishi. Vo tshe watosonolaka mbuka yawo; Etema awo watongenangenaka lu akambu awo wa wononyi.

⁴Ndu dimi ntu layasonwela lukulu lʼengeno, Layatumela kene kayuwautsha woma, Ne dia dimi lakawaeti, ku vo kunkaluyami diui. Lakateketa la wo, ku vo kunungami. Keli vo wakatshi akambu waki kolo lu ashu ami; Wakasonola akambu wahatongenyangenyaka.

⁵Nyu wane watukaka Latuyalaka 3 woma, Nyulungi diui diandi. Nyulungi okone wati anengenyu, Wane watunyuhetshaka Ndu watunyusukulaka ne dia lukumbu lami, vati: Latuyalaka atumbwami, Ku shu tayena ongenongeno anyu! Keli vo wayutshama sonyi.

⁶Nyulungi diui so diambutumba uma lʼusumba. Diui diako diambutumba uma lʼetemwelo, Dio dieli diui dia Latuyalaka, Latufutaka atunyi andi difutu diawo.

⁷Siona akuti ntundu yatatati lono, Ee, ntundu yatatati lono mbakayuti ona pami.[157]

⁸Akona akuki dikambu dia wuhu oso? Akenyi dikambu diufanyi la dio? Undi, utundu wa kete mbeyaka mbuto lushi otoi uka? Kana wudja mbuto lʼetena otoi? Kamʼakatatela Siona lono, mbakayuti onʼayo.

⁹Naka dimi layetawo umuntu ntsho diemi, Dimi layushimba dia ndi mbuta uka? Mbambula Latuyalaka, Dimi latuluwanyaka waemi, ku layushimba dia ana mbuto uka? Mbambula Unyashungu anyu.

¹⁰Nyongenengene kame la Jerusalema, Nyogenengene kame la yo, nyu tshe watuyukaka ngandji. Nyu tshe watulelaka dikambu diayo, Nyulimbolimbo lʼongenongeno kame la yo;

¹¹Dia nyu ndeshama la ndutshama awele wa sambelu diayo, Dia nyu mpina awele ayo La ngenangena lu elulelu ka lutumbu layo.

¹²Okone mbata Latuyalaka ati: Enda, dimi layolombwela Jerusalema ki uku okedi, La lutumbu la wedja uku kyoko yatshulotshulo. Ku nyu nyayoloma; nyayembama lu tukundu, La nyayosengama lu dihelo diayo.

¹³Uku atusambaka nyangu onʼandi, osoku mbayumunyusamba. Nyu nyayusambema lu Jerusalema.

¹⁴Nyu nyayena dikambu diako, Ku etema anyu wayongenangena. La weka anyu w yukikitala esadi, Uku atukikitalaka adiyu wʼomongela. Latuyalaka ayenya ekambi andi lunya landi la wulu, Ku ayuka atunyi andi kele.

¹⁵Enda, Latuyalaka ayukuma lʼatei wa dja La pusupusu yandi uku punganendji. Ndi ayukadimula kele kandi efuki ka dja, La luhangu landi lumbi la dja.

¹⁶La dja ndu la yombo yandi, Mbayusambula Latuyalaka akambu wʼantu tshe; Ndi ayudiaka antu efula.

¹⁷Waku watuyakidiaka ndu watuyaediaka dia ntsho lʼekambo, dia ntotemola etamba a waki, la dia ntole unatshi wa sumbu, dji la diango dia wononyi, vo tshe wayulanyema kame, mbata Latuyalaka.

¹⁸Dimi mbeyaka elimu awo la tukanyi tawo, etena kayuyala ka dimi nsanganya wedja tshe wa eteketa tshe, ku vo wayuya la ndjenda lutumbu lami.

¹⁹Dimi layukitsha djimbitelu lʼatei awo. Ku uma lʼatei awo, dimi layutuma atshikadi utsha lu wedja: la Tarashishi, la Puta, ndu la Luda, wane watukaka eta, la Tubala la Javana, ndu lu asenga wʼetali, le wane wahatuki lukumu lami, kuyanga mena lutumbu lami. Ku vo wayututela wedja dia lutumbu lami.

²⁰Vo wayuya la anengenyu tshe uma lu wedja tshe uku ulambu le Latuyalaka. Vo wayuya le wo wahemi ladiku dia falasa, lu pusupusu, lu poyi, ladiku dia punda, ndu ladiku dia kamelo uya la Jerusalema, lʼukungu ami wʼekila, mbata Latuyalaka, uku atelaka asi Isariyele elambu awo lu puki ya pudipudi, uya lu luudu la Latuyalaka.

²¹Uma lʼatei awo, mbayumosonola elombedi la asi Lewi, mbata Latuyalaka.

²²Uku wayutshikala ulungu wʼuyuyu la Kete yʼuyuyu[158] yayangami ntunga, Mbayutshikala tukanula taye la lukumbu laye La ntundu kami, mbata Latuyalaka.

²³Uma lu yalelu ya ngondo utsha lu yalelu ya ngondo, Uma lu lushi la mumuya utsha lu lushi la mumuya, Antu tshe wayuyakaka la ndjontemola, mbata Latuyalaka.

²⁴Lamʼayuwutumbaka, vo wayenaka edu wʼantu wakantombokwela, ne dia kusu hayushilaki laawo, la dja yatshumba edu hayudimalaki.[159] Ku edu ako wayuyala wononyi le antu tshe.