Read tetala Isaya 8 Bible Online

Isaya 8 - tetala bible

Isaya 8

¹Latuyalaka akamvutela ati: Ose ehasi ka wuki, ufundi ladiku diato lʼufundelu wʼololo wati: Mahere-Shalala-Hashi-Baza (kitshimudi ati: Diango dia lohotola diatshu esadi, diango diakawambi diasamanya.)

²Dimi lakatshu la emenyi wʼololo Uriya, olombedi, la Zakariya onʼa Jeberekiya.

³Dimi lakeyana la wademi, umvutshi a umuntu. Ku ndi akatshu diemi, akuti ona pami. Ku Latuyalaka akamvutela ati: Uwole lukumbu wati: Mahere-Shalala-Hashi Baza.

⁴Ntundu ona ateyi mvuta ati: Papa! kana nyomi! ekundji Wa Damaseke la diango dia lohotola dia Samariya diayembama la ntundu ka khumʼekanga kʼAsuriya.

⁵Latuyalaka akateketa la mi ntu ati:

⁶Ne dia wudja one wakatuni ashi wa la Shiloa, watokelaka okoke ndu watongenangenaka lu akambu wa Rezina la onʼa Remaliya,

⁷enda, Khumadiondjo ayakediya ashi wa wulu ndu efula uma lu Ndjali, khumʼekanga kʼAsuriya la lutumbu landi tshe. Ashi ako wayulula lu ekedi awo tshe, wayudiangana ladiku diʼekenge awo.

⁸Vo wayoto lu kete ya Juda, wayufulanela, wayuyala efula, wayukuma pulu ndu lu kingu. Edianganelu kʼashi ako kayukukanela lu kete yaye tshe, we Emanuele!

⁹Nyudi tukuku ta ta, nyu wedja. Ku nyu nyayatshatshema. Nyuhuke atui, nyu tshe uma lu wedja wʼetali. Nyukikitsha eya, nyayatshatshema.

¹⁰Nyudji sheki, ku yo yayuyala anyanya. Nyuti diui, ku dio diayuyala uyalayala, Ne dia Unyashungu eko la su.

¹¹Okone Latuyalaka akamvutela la diui dia wulu, akambetsha diaha dimi nkendakenda lu mbuka ka wudja one.

¹²Ndi akamvutela ati: Tetaki wati: Sheki, kene tshe keta wudja one vati: Sheki. Tanyukaki kene kukawo woma, woma, kana mbate asulu lu dikambu diako.

¹³Nyete Latuyalaka Kanga lulimbilimbi Ekila, nyuwukaki woma ndame,[18] nyateki asulu lu dikambu diandi ntu.

¹⁴Ndi ayuyala etemwelo, dive dia ntakanya, la dive dia djewoki lu mvudu hyendi ya Isariyele, ndu djunga lʼotei le asi Jerusalema.

¹⁵Antu efula wayutakana loko. Vo wayoko, wayatshatshema;[19] ee, vo wayutala, wayundama.

¹⁶Ombe omenyi ami, udihi wetshelu lʼatei wʼandjedi ami.

¹⁷Dimi layukungela Latuyalaka, latushelaka luudu la Jakoba elundji kandi. Ku layukungela[20]

¹⁸Enda, dimi la ana wakambisha Latuyalaka[21] teko tulimbitelu ndu ambewudi lʼatei Isariyele, uma le Latuyalaka Kanga lulimbilimbi, latudjaseka lu ukungu wa Siona.

¹⁹Lamʼayuwunyutela vati: Nyutuyangi wane watoteketshaka djimu ndu wetshi wʼawulu watendjaka, watudjoka, wudja hawuhumbi nyanga Unyashungu awo uka? Ololo vo mumbwela wasena akambu le wane wakavu uka?

²⁰Watshu le olembe ndu le omenyi! Naka vo hawoteketa aui aso, mete, usasi hawene le wo ntu.

²¹Vo wayekeko lu kete lu lunyangu la ndjala. Lamʼayuwudiena la ndjala, vo wayuka yenyi, wayoloka khumʼekanga kawo la Unyashungu awo. Vo wayedia dundji diawo utsha ladiku.

²²Vo wayenda la kete, wayena paka asui, udjima, la okei. Okone vo wayusukwama utsha lu udjima a tshududu.