Read tetala Akambu wʼAsi Lewi 1 Bible Online

Akambu wʼAsi Lewi 1 - tetala bible

Akambu wʼAsi Lewi 1

¹Latuyalaka aketi Mose, akateketa la ndi uma lu luudu lʼesanganelu la dipema; akawutela ati:

²Otekete lʼasi Isariyele, uwateli wati: Lamʼela untu omotshi uma lʼatei anyu ulambu le Latuyalaka, kanyelaki ulambu anyu wa dungalunga uma lʼatei a ngombe kana uma lʼatei wʼekoko.

³Naka ulambu andi weli ulambu wa lutshumba wʼuma lu limba la ngombe, ndi kalambuli kʼumi kaha la ekomo. Ndi kakilambuli lʼeotwelo ka luudu lʼesanganelu la dipema, dia ndi mbetawoma la ntundu ka Latuyalaka.

⁴Ndi kahe lunya landi ladiku diʼote wʼulambu wa lutshumba, ku vo wayetawoma dikambu diandi, dia mbutungela ekesanelu.

⁵Ndi kadiaki osongo a ngombe la ntundu ka Latuyalaka. Ku elombedi, ana apami wa Arona, wayulambula dikila, wayudimonga lʼutshimba tshe wʼediakelu keli lʼeotwelo ka luudu lʼesanganelu la dipema.

⁶Ndi kuwuli ekuhu kʼulambu a lutshumba, kuhimbuli tenyi tenyi.

⁷Ana apami wʼolombedi Arona wayongonya dja lʼediakelu, wayolonga kunyi lu dja.

⁸Ku elombedi, ana apami wa Arona, wayolonga tenyi diako, ote la wata ladiku dia kunyi yeli lu dja ladiku diʼediakelu.

⁹Keli ndi kasuli mbu yato yʼutema la sanga yato lʼashi. Ku olombedi ayuyitshumba yo tshe lʼediakelu, uku ulambu wa lutshumba, ulambu wa nambula lu dja, dia ndjala diowo dia ngenyangenya Latuyalaka.

¹⁰Naka ushasha andi wa ulambu wa lutshumba weli uma lu limba lʼekoko kana la mbudi, ndi kalambuli umi laha la ekomo.

¹¹Ndi kudiaki la ntundu ka Latuyalaka lu leke la ngelʼa kushi lʼediakelu. Ku elombedi, ana apami wa Arona, wayomonga dikila diawo lʼediakelu lʼutshimba tshe.

¹²Ndi kuhimbuli tenyi tenyi, kame la ote awo la wata awo. Ku olombedi ayudilonga ladiku dia kunyi yeli lu dja ladiku diʼediakelu.

¹³Keli ndi kasuli mbu yʼutema la sanga lʼashi. Ku olombedi ayuyilambula yo tshe, ayuyitshumba lʼediakelu. Oso eli ulambu wa lutshumba, ulambu wa nambula lu dja, dia ndjala diowo dia ngenyangenya Latuyalaka.

¹⁴Naka ulambu andi wa le Latuyalaka weli ulambu wa lutshumba wa fudu, ndi kela ulambu andi wa binga kana wa tana ta kudumba.

¹⁵Ku olombedi ayela fudu kako uya lʼediakelu, ayushidikula ote ato, ayukitshumba lʼediakelu; ayokedia dikila lʼumamu wʼediakelu.

¹⁶Ndi kanya dioselo la sala, kadikadja lʼutuku lu leke lʼehutwelu lʼediakelu.

¹⁷Ndi kakiati landja, keli takisambulaki betshi pendi. Ku olombedi ayukitshumba lʼediakelu ladiku dia kunyi yeli lu dja. Oso eli ulambu wa lutshumba, ulambu wa nambula lu dja, dia ndjala diowo dia ngenyangenya Latuyalaka.