Read tetala Akambu wʼAsi Lewi 10 Bible Online

Akambu wʼAsi Lewi 10 - tetala bible

Akambu wʼAsi Lewi 10

¹Nadaba la Abihu, ana apami wʼArona, wakose untu lʼuntu luhusu la dja, wakadji dja loko, wakadji malashi ladiku diayo. Vo wakela dja ku dja la ntundu ka Latuyalaka, wuhu wakindi kumbadjangela.

²Ku dja yakatumbi uma la ntundu ka Latuyalaka, yakatshumbi, ku vo wakavu la ntundu ka Latuyalaka.

³Mose akatela Arona ati: Dikambu ne mbakati Latuyalaka ati: Dimi layuyaenya ekila lʼatei a wane weli lasuki la mi. Layutumbwama la ntundu ka antu tshe. Ku Arona akatshikala ki.

⁴Mose aketi Mishaele la Elezafana, ana apami wa Uziyele, onangu shi Arona, akawatela ati: Nyusukani, nyutundja edu wʼanengenyu uma la ntundu kʼetemwelo. Nyetole etali lʼandja a pangu.

⁵Okone vo wakasukana, wakayemba edu awo wolotshi sumishi yawo yʼasangu lʼandja a pangu, uku akati Mose.

⁶Ku Mose akatela Arona la anʼandi Eleazara la Itamara ati: Tanyunyaki divu, tanyatshatshaki ahondo anyu, ne dia nyutukuvo. Ndu Latuyalaka atukuka ului wʼantu tshe kele. Nyukimo anengenyu, khumbu ka Isariyele tshe, waleli wane wakatshumbi Latuyalaka.

⁷Tanyutumbaki uma lʼeotwelo ka luudu lʼesanganelu la dipema, nyutukuvo, ne dia nyakakitama iso ka Latuyalaka. Ku vo wakatshi uku diui dia Mose.

⁸Latuyalaka akatela Arona ati:

⁹We la anʼaye wʼapami weli kame la ye, tanyonokaki wanu kuyanga enono ka wulu lamʼayunyotoka lu luudu lʼesanganelu la dipema, nyutukuvo. Oso eli olembe wa pundju lu nonga yanyu tshe,

¹⁰dia nyu ntshikitanya akambu wʼekila la akambu wʼanyanya, ndu akambu wa mindu la akambu wa pudipudi,

¹¹dia nyu mbetsha asi Isariyele elembe tshe wakawadjela Latuyalaka lʼunyo a Mose.

¹²Ku Mose akatela Arona la anʼandi wʼapami ahendi wakatshikala la ndi, Eleazara la Itamara, ati: Nyose etenyi kʼulambu wa shima wambutshikala uma lʼelambu wa nambula lu dja le Latuyalaka, nyukili aha la edya lʼumamu wʼediakelu, ne dia to keli ulambu wuleki ekila.

¹³Kanyukili lu dihuli diʼekila, ne dia tokeli uhiku anyu, we la anʼaye, uma lʼelambu wa nambula lu dja le Latuyalaka, ne dia osoku mbakandambidjangela.[7]

¹⁴Keli kanyolekaki tulu ka letshetsha, la elemba ka lukulu ka lediedia kambukimwama ulambu lu dihuli dia pudipudi, we la anʼaye wʼapami la anʼaye wʼamantu, ne dia vo weli uhiku anyu, we la anʼaye wʼapami, uma lʼelambu wa ki wʼasi Isariyele.

¹⁵Kawela elemba ka lukulu dia nkiediedia, la tulu dia nkietshetsha kame la wata wʼelambu wa lutshumba la ntundu ka Latuyalaka. Vo wayuyala uhiku anyu, we la anʼaye wʼapami pundju, uku akadjanga Latuyalaka.[8]

¹⁶Mose akayangi mbudi kʼulambu wa kolo wulu, ayendi ku to kakatshumbami! Ndi akuki ana apami wʼArona wakatshikala, Eleazara la Itamara, kele; akawambula ati:

¹⁷Okoko wana wakinyu konde ulambu wa kolo lu dihuli diʼetemwelo, lamʼewo engo kuleki ekila,[9] kakawanyusha dia nyu mbeya memba kolo kʼului wʼantu, dia mbatungela ekesanelu la ntundu ka Latuyalaka?

¹⁸Enda, nyu kontola dikila diato lʼatei wʼetemwelo. Diaki la nyu dia nkile lʼatei wʼetemwelo, uku akamadjanga.

¹⁹Ku Arona akatela Mose ati: Uhukami, vo wakalambudi ulambu awo wa kolo ndu ulambu awo wa lutshumba la ntundu ka Latuyalaka. Kuku akambu uku ane wakayadi le mi! Utunduyala lakali ulambu wa kolo elo, vo wutulungwama lu ashu wa Latuyalaka?

²⁰Ku lamʼakuki Mose aui aso, ndi aketawo.