Read tetala Akambu wʼAsi Lewi 11 Bible Online

Akambu wʼAsi Lewi 11 - tetala bible

Akambu wʼAsi Lewi 11

¹Latuyalaka akatela Mose la Arona ati:

²Nyuteli asi Isariyele nyati: Kanyolekaki dikendakenda dieli la lumu ne lʼatei a nyama tshe ya la kete.

³Kanyolekaki nyama tshe keli la sanga ya sandju ndu katutuwulaka adiyu.

⁴Keli tanyulekaki nyama yatutuwulaka adiyu atu, kana yeli la sanga ya sandju tshu. Okone tanyolekaki kamelo, katutuwulaka adiyu atu, keli kema la sanga ya sandju; to keko mindu le nyu.

⁵Tanyolekaki ewuka, ne dia to katutuwulaka adiyu, keli to kema la sanga ya sandju; to keko mindu le nyu.

⁶Tanyolekaki utumba, ne dia vo watutuwulaka adiyu, keli vo kema la sanga ya sandju; vo weko mindu le nyu.

⁷Tanyolekaki sumbu, ne dia to keko la sanga ya sandju, keli to hatutuwulaka adiyu; to keko mindu le nyu.

⁸Tanyolekaki nyama nye kana munanda edu ayo; yo yeko mindu le nyu.

⁹Lʼatei a dikendakenda tshe dia lʼashi, kanyulekaki wehu ene: nsi tshe yeli la mpafuhafu, la pusu, yatokendakendaka lʼashi a waki, lu ndjali, la lu kushi.

¹⁰Keli dikendakenda tshe diatuyalaka lʼashi a waki ndu lʼekedi, diaha la mpafuhafu la pusu, diayuyala wononyi le nyu.

¹¹Dio diayuyala wononyi le nyu. Tanyudilekaki, ndu edu adio wayuyala wononyi le nyu.

¹²Dikendakenda tshe dia lʼashi diaha la mpafuhafu la pusu, diayuyala wononyi le nyu.

¹³Lʼatei a fudu tshe, fudu nye mbayuyalaka wononyi le nyu, tanyuyilekaki: pungu, kumbaka, eki,

¹⁴lodi la wane wufanyi la lo;

¹⁵dingwangwa la wehu tshe wufanyi la dio;

¹⁶teki, esukula, diwata diʼashi la djela la wehu ayo tshe;

¹⁷ekuki, eokoko, uputute,

¹⁸dikonde, diata la lukudukoto;

¹⁹yemema, yongaakuki la wehu ayo tshe, lulima, la fukifuki.

²⁰Tufumbofumbo tshe tatokendakendaka lʼekulu ato tshe enei, tayuyala wononyi le nyu.

²¹Keli lʼatei a tufumbofumbo tsbe tatokendakendaka lʼekulu ako tshe enei, kanyolekaki tone teli la ekulu ehendi wʼetali wa nimbo.

²²Tone mbayunyolekaka: endjo, akeleli, nyunyu, la akata la wehu awo.

²³Keli tufumbofumbo tshe teli la ekulu enei, teko wononyi le nyu.

²⁴Tufumbofumbo tako tayunyete mindu. Untu tshe layunanda edu ato, ayuyala mindu edja ndu dikolo.

²⁵Untu tshe layemba etenyi kʼuma lʼedu ato, kasuli ahondo andi, ku ndi ayutshikala mindu edja ndu dikolo.

²⁶Nyama tshe keli la sanga ya sandju, keli hatutuwulaka adiyu, keko mindu le nyu. One tshe layukinanda, ayuyala mindu.

²⁷Kanyendaki nyama tshe yeli la ekulu enei, yatukamelaka la emunyi wʼakaka ayo uku nyama ya mindu. Untu layunanda edu ayo, ayuyala mindu edja ndu dikolo;

²⁸untu layemba edu ayo, kasuli ahondo andi, ku ndi ayutshikala mindu edja ndu dikolo. Yo yeko mindu le nyu.

²⁹Lʼatei a nyama yayakutula la kete, nyama nye mbeli mindu le nyu: ngolanyoi, edji, la lukudi la wuhu alo tshe;

³⁰dikalanga, lombe, lukaa, lombolombi, ndu longonya.

³¹Nyama yatuyakutulaka sho. Untu tshe layunanda edu ayo, ayuyala mindu edja ndu dikolo.

³²Lʼatei a nyama nye, naka yango uma lʼedu ayo yayoko ladiku diʼengo tshe katuwutshaka la to ulimu: ludu, dihondo, ekuhu, paya, to kayuyala mindu. Dieli la to dia mbidjama lu ashi. To kayutshikala mindu edja ndu dikolo. Ku lʼokongo diku, to kayuyala pudipudi.

³³Naka yango uma lʼedu ayo yayoko lu puki ka diwumba, to kayuyala mindu; dieli la nyu dia nkiula.

³⁴Engo ka nde tshe kayoto ashi ane, kayuyala mindu. Enono tshe kayoto lu mbaka kakoto ashi ako, kayuyala mindu.

³⁵Engo tshe kayoko yango motshi uma lʼedu awo ladiku diato, kayuyala mindu: tshuka diʼefumbelu la tshuka diʼekatelu. Dieli la wo dia nanyema. Vo weko mindu, ndu wayuyala mindu le nyu.

³⁶Kuyanga edu ayo wayoko lʼeteko kana lʼeduwa, ashi watshikala pudipudi. Keli engo tshe kayutusakana lʼudu ayo loko, kayuyala mindu.

³⁷Kuyanga yango uma lʼedu ayo yayoko lu wehu wayangawo mune, vo wayutshikala pudipudi;

³⁸keli naka wayudja ashi lu wuhu, ku yango uma lʼedu ayo yayoko loko, vo weko mindu le nyu.

³⁹Naka nyama keyanyu nde kayuvo usina, one layunanda udu ato, ayuyala mindu edja ndu dikolo.

⁴⁰One layole nyama kato, kasuli ahondo andi, ku ndi ayuyala mindu edja ndu dikolo. Ndu one layemba udu ato, kasuli ahondo andi, ku ndi ayuyala mindu edja ndu dikolo.

⁴¹Nyama tshe kayakutula la kete kayuyala wononyi le nyu, tanyukilekaki.

⁴²Lʼatei a nyama tshe yayakutula la kete, nye yatuyakutulaka lu akundju ayo kana nye tshe yatokendakendaka lʼekulu ako tshe enei wa tumundu kana lʼekulu efula, tanyuyilekaki, ne dia yo yeko wononyi le nyu.

⁴³Tanyuyaeteki wononyi uma le nyama tshe yatuyakutulaka. Tanyuyasanyaki la yo, ne dia nyutukuyala mindu.

⁴⁴Dimi keli Latuyalaka, Unyashungu anyu. Okone nyuyakidia, nyuyali ekila, ne dia dimi leli ekila. Tanyuyaeteki mindu uma le nyama tshe yatuyakutulaka la kete.

⁴⁵Dimi leli Latuyalaka lakanyutundja uma lu kete ya Edjibitu, dia ndjala Unyashungu anyu. Okone nyuyali ekila, ne dia dimi leli ekila.

⁴⁶Oso eli olembe wa nyama, wa fudu, wa dikendakenda tshe diatuyalaka lu ashi, la nyama tshe yatuyakutulaka la kete;

⁴⁷dia nyu ntshikitanya kene keli mindu la kene keli pudipudi, la nyama yeyanyu nde la nyama yahanyakuki nde.