Read tetala Akambu wʼAsi Lewi 13 Bible Online

Akambu wʼAsi Lewi 13 - tetala bible

Akambu wʼAsi Lewi 13

²Lamʼeli untu la edada, lukaya, kana diwadi dia tilili, diufanyi la kandji ka sudi lu dimba diandi, kawuyi la ndi le olombedi Arona kana le onʼandi omotshi lʼatei wʼanʼandi wʼapami weli elombedi.

³Ku olombedi ayûshishima kandji kako lu dimba diandi. Naka wosa wambukaso, ndu ndi ambena ati: Kandji kamboto pulu ndu lʼemunyi, keti kandji ka sudi keto. Olombedi layûshishima, ayutela antu ati: Untu one aya mindu.

⁴Keli naka diwadi dia tilili dieki lu diuwu utu, atoto lʼemunyi, ndu diosa diatakaso, ku olombedi ayudiha nshi esambeli.

⁵Olombedi ayûshishima ntu lushi lʼesambeli. Naka ndi ambena ati: Kandji ambutshikala wuhu ako utu, atadiangana lu dimba, ndi ayudiha nshi esambeli kina ntu.

⁶Ku olombedi ayûshishima ntu lushi lʼesambeli, ku naka diwadi diambukitakita tilili, la kandji hadiangana lu dimba, ku olombedi ayuta ati: Ndi eli pudipudi; one eli paka lukaya lutu. Ndi kasuli ahondo andi, ku ndi ayuyala pudipudi.

⁷Keli lʼokongo wʼediamelu kandi le olombedi, naka diwadi diambudiangana lu dimba, dieli la ndi dia ndjaenya le olombedi ntu.

⁸Olombedi ayûshishima, ku naka diwadi diambulalo lu dimba ku olombedi ayuta ati: Ndi aya mindu, kandji ka sudi keto.

⁹Lamʼambuyala untu la kandji ka sudi, kawuyi la ndi le olombedi.

¹⁰Olombedi ayûshishima, naka ndi ambena edada ka tilili lu diuwu, la to kambukasula diosa, la puta kʼuyuyu keko laawo,

¹¹keti sudi kʼedjedja keko lu dimba diandi. Ku olombedi ayuta ati: Ndi eli mindu. Ndi hudiha ntu, ne dia ndi aya mindu.

¹²Naka sudi kambutumba awadi dimba tshe umaka ote pulu ndu lʼekulu, lu ahuli tshe wukuki olombedi menda,

¹³ku ndi ayûshishima. Naka ndi ambena ati: Sudi kaya dimba tshe, ndi ayuta ati: Untu one eko pudipudi ka kandji. Lamʼambukaso dimba tshe awadi atu, ndi pudipudi ka kandji.

¹⁴Keli lushi layuwutatela mena puta kʼuyuyu lu dimba diandi, ndi ayuyala mindu.

¹⁵Lamʼayena olombedi puta kʼuyuyu, ndi ayuta ati: Ndi aya mindu, puta kʼuyuyu kene keli mindu, sudi keto.

¹⁶Keli naka puta kʼuyuyu kambukadimo, kambuyala diwadi dia tilili, ndi kakaluli le olombedi.

¹⁷Olombedi ayûshishima. Naka kandji kambuyala awadi wa tilili, ku olombedi ayuta dia one leli la puta ati: Ndi aya pudipudi.

¹⁸Lamʼayokono untu dina,

¹⁹ku edada ka tilili kana diwadi dia ebelabela diambenama lu dihuli diakidio, ndi katuyaenya le olombedi.

²⁰Olombedi ayuwenda, naka kandji kako kamboto lʼemunyi ndu diosa diambukaso, olombedi ayuta ati: Mindu kendi, kandji ka sudi kene kambutumba lu dihuli diaki dina.

²¹Keli naka olombedi ambushishima, ambena ati: Diosa hadiukaso, kandji hoto lʼemunyi, la diwadi diambukitakita, olombedi ayudiha nshi esambeli.

²²Naka diwadi diambulalo lu diuwu, olombedi ayuta ati: Ndi aya mindu. Onʼeli kandji ka sudi.

²³Keli naka diwadi diako diayutshikala lu dihuli otoi tu, hadiulalo la dimba, keti dio dieko dina. Ku olombedi ayuta ati: Pudipudi kendi.

²⁴Lamʼayuyala untu la puta ka dja lu dimba diandi, ku diwadi diʼebelabela diambuyala lu lufu la puta kako,

²⁵olombedi ayûshishima. Naka diosa diambukaso lu diwadi, la diwadi diambukuma pulu ndu lʼemunyi, keti sudi keso kambutsha diwadi lu puta ka dja. Ku olombedi ayuta ati: Untu one eli mindu. Kandji ka sudi kene.

²⁶Keli naka olombedi ambena ati: Diosa hadiukaso lu diwadi, ndu kandji kambukitakita, ndi ayudiha untu ako nshi esambeli.

²⁷Olombedi ayûshishima lushi lʼesambeli. Ku naka diwadi dieko lu ntalalo lu diuwu, olombedi ayuta ati: Ndi eli mindu, one eli kandji ka sudi.

²⁸Keli naka diwadi diambutshikala lu dihuli otoi, hadiulalo lu diuwu, ndu diambukitakita, oso eli edada ka dja. Olombedi ayuta ati: Ndi eli pudi-pudi, ne dia one eli lufu la puta ka dja.

²⁹Lamʼayuyala pami kana umuntu la puta ka lʼote kana ka lu luwanga,

³⁰olombedi ayûshishima puta kako. Ku naka ndi ambena ati: Puta kambukuma pulu ndu lʼemunyi, la naka weondji wambuyala endondo ndu woduwodu, olombedi ayuta ati: Untu one mindu. One eli lukangangu, sudi ka lʼote kana ka lu luwanga.

³¹Naka olombedi ambena ati: Puta ka lukangangu katakumi pulu ndu lʼemunyi, ndu weondji wʼedima kema laawo, ndi ayudiha nshi esambeli.

³²Olombedi ayûshishima puta kako lushi lʼesambeli. Naka lukangangu kundalo, la diosa diʼendondo kema laawo, ndu naka puta katakumi pulu ndu lʼemunyi,

³³one luka lukangangu kanya divu, keli tanyaki lu dihuli dialo. Ku olombedi ayudiha ntu nshi esambeli.

³⁴Olombedi ayûshishima lukangangu lako lushi lʼesambeli. Naka lukangangu halulalo lu diuwu ndu latakumi pulu lʼemunyi, olombedi ayuta ati: Pudipudi kendi. Ku ndi ayusula ahondo andi, ayuyala pudipudi.

³⁵Keli naka lukangangu lambulalo lu diuwu lʼokongo wa mvuta ati: Ndi pudipudi, olombedi ayûshishima ntu.

³⁶Olombedi ayuwenda, naka lukangangu lambulalo lu diuwu, olombedi tadienaki ntu dia nyanga weondji wʼendondo. Ndi eli mindu.

³⁷Naka ndi ambena ati: Lukangangu haluhami, ndu weondji wʼedima hawuli laawo, keti lukangangu lambokono. Ndi eli pudipudi. Ku olombedi ayuta ati: Ndi pudipudi.

³⁸Lamʼayuyala pami kana umuntu la tuwadiwadi ta wema lu diuwu,

³⁹olombedi ayûshishima. Naka tuwadiwadi tako teko ehemahema, keti to teko puti. To tambutumba lu diuwu diandi. Ndi eli pudipudi.

⁴⁰Naka pami ambushila divu lʼote andi, keti kanga diwandji kendi. Ndi eli pudipudi.

⁴¹Naka untu lambushila divu lʼote uya la fumu, ndi eli kanga diwandji diʼuma la fumu. Ndi eli pudipudi.

⁴²Keli naka puta kʼebelabela kambuyala lu dihuli dia diwandji diʼuma la fumu, kana diʼuma la kotshi, keti sudi keso kambutsha puta lu diwandji diʼuma la kotshi kana diʼuma la fumu.

⁴³Olombedi ayûshishima. Naka edada kʼebelabela kambuyala lu diwandji diʼuma la kotshi kana diʼuma la fumu kufanyi la sudi lu diuwu, untu oso eli kanga sudi.

⁴⁴Ndi eli untu lukanga sudi; ndi eli mindu. Olombedi ayuta ati: Mindu kendi, puta ka sudi keko lʼote andi.

⁴⁵Kanga sudi, lambuyala la puta, kalote ahondo wa betshi betshi, katshiki divu esakalaka, kaduya loledu, ku ndi ntahangohangoka ati; Mindu, mindu!

⁴⁶Etena tshe kayunduyala la puta, ndi ayuyala mindu. Ndi eli mindu, ndi ayudjase ndame. Luudu landi layuyala lʼandja a pangu.

⁴⁷Lamʼayuyala diwadi dia tunya ta sudi lu dihondo dia diosa kana lu dia linene,

⁴⁸lʼuhimbu kana lʼekasa ka linene kana ka diosa, lʼekuhu kana lʼengo kemotshi kakatshama la ekuhu,

⁴⁹naka tunya tambuyala tuwadi ta eleselese kana ta tilili ladiku dia dihondo, kana lʼekuhu, lʼuhimbu kana lʼekasa kana ladiku diʼengo ka lʼekuhu, keti tunya ta sudi mbeto. Kawutenya olombedi tunya tako.

⁵⁰Olombedi ayûshishima tunya, ku ndi ayudiha engo kakatakitama nshi esambeli.

⁵¹Ndi ayûshishima tunya lushi lʼesambeli. Naka tunya tambulalo lu dihondo lʼuhimbu kana lʼekasa, lʼekuhu kana lʼulimu wakatshama lʼekuhu, keti tunya ta sudi kʼedjedja mbeto. Engo kako keli mindu.

⁵²Ndi ayutshumba engo tshe kambutanema tunya: dihondo, uhimbu, ekasa ka diosa kana ka linene, kuyanga engo kemotshi ka ekuhu, ne dia oso eli sudi kʼedjedja. To katshumbami lu dja.

⁵³Keli naka olombedi ambena ati: Tunya hatudianganyi lu dihondo, lʼuhimbu kana lʼekasa, ladiku diʼengo kemotshi kʼekuhu,

⁵⁴ndi ayuta dia vo nsula engo kakakitama tunya tako. Ku ndi ayukidiha nshi esambeli ntu.

⁵⁵Olombedi ayûshishima tunya lʼokongo a wambushila ntusula. Naka tunya hatukadimwi ndu hatudianganyi, keti engo kako keko mindu. Kanyukitshumbi lu dja, ne dia etenyi ka lʼandja kana ka lʼetei kakalema.

⁵⁶Naka olombedi ambena ati: Tunya tambuyala ekesekese lʼokongo wa ntusula, ndi katuhatuli uma lu dihondo kana uma lʼekuhu, uma lʼuhimbu kana uma lʼekasa.

⁵⁷Naka to takenama ntu lu dihondo, lʼuhimbu, lʼekasa, kana ladiku diʼengo kemotshi keli lʼekuhu, keti kandji ka sudi keto. Engo kakakitama tunya katshumbami lu dja:

⁵⁸dihondo, uhimbu, kana ekasa, engo kemotshi ka lʼekulu, kakasulama, ku tunya takashili laawo, to kasulami etena ka hendi. Ku to kayuyala pudipudi.

⁵⁹Oso eli olembe wa tunya ta sudi lamʼayutoto lʼahondo wa diosa, kana wa linene, lʼuhimbu, lʼekasa kana lʼengo kemotshi kʼekulu, dia nshikike diui ati: Engo kene keko mindu, kana pudipudi.