Read tetala Akambu wʼAsi Lewi 14 Bible Online

Akambu wʼAsi Lewi 14 - tetala bible

Akambu wʼAsi Lewi 14

²Onʼeli olembe wayuyala le kanga sudi lu lushi lʼedielu kandi. Vo wayuwela la ntundu kʼolombedi.[12]

³Olombedi ayutumba uma lu pangu, ku ndi ayutushishima kanga sudi. Naka puta ka kanga sudi kambokono,

⁴olombedi ayuta dia vo mbosela one layanga mbediama fudu hyendi ya nsena ndu ya pudipudi, tshamba yʼusasi, wundu la nyumba.

⁵Olombedi ayuta dia vo ndjaka fudu kemotshi lu puki ka diwumba, ladiku diʼashi wʼuma la lushi.

⁶Ndi ayosa fudu kʼosenyu, tshamba yʼusasi, wundu la nyumba, ayumbia diango diako kame la fudu kʼosenyu lu dikila dia fudu kakawadiaki ladiku diʼashi wʼuma la lushi.

⁷Ndi ayomonga one lalanga mbediama uma lu sudi tena esambeli. Lʼokongo diku olombedi ayuta ati: Ndi ambuyala pudipudi, ku ndi ayufumbula fudu kʼosenyu lʼusui.

⁸One lambediama kasuli ahondo andi, kahelole diosa diandi tshe, koke ashi; ku ndi ayuyala pudipudi. Lʼokongo diku ndi mbeyaka nkalula la pangu. Keli ndi ayutshikala nshi esambeli lʼandja a luudu landi la dipema.

⁹Lushi lʼesambeli, ndi kanya divu diandi tshe, ndedu yandi, ndu kondji yandi; kahelole diosa diandi tshe; kasuli ahondo andi, koke dimba tshe, ku ndi ayuyala pudipudi.

¹⁰Lushi lʼenanei ndi kose esongo ehendi wʼekoko waha la ekomo, ndu okoko a wadi weki eleku otoi, waha la ekomo, tenyi satu dia dikumi dia efa ka shima ka pudipudi, ulambu wa nsohanya la iso, ndu longo otoi lʼiso.

¹¹Ku olombedi layanga ntsha edielo, ayeme untu lalanga mbediama la diango ne la ntundu ka Latuyalaka, lʼeotwelo ka luudu lʼesanganelu la dipema.

¹²Olombedi ayosa osongo wʼokoko wʼumi omotshi, ayukimo ulambu wʼunungu kame la longo otoi lʼiso. Ku ndi ayudietshetsha la ntundu ka Latuyalaka.

¹³Ndi ayudiaka osongo wʼokoko lu dihuli diatuwudiakaka nyama yʼulambu wa kolo, ndu yʼulambu wa lutshumba, lu dihuli diʼekila. Ne dia ulambu wʼunungu weko uku ulambu wa kolo, nyama ndjalaka kʼolombedi. Ulambu ako mbuleki ekila.

¹⁴Olombedi ayosa dikila dia nyama kʼulambu wʼunungu, ayudikita one layanga mbediama lu sodi ka tui dia lupami, ndu lu luhita lʼumi la lu lunya landi la lupami, ndu lu lubita lʼumi la lukulu landi la lupami.

¹⁵Olombedi ayosa longo lʼiso, ku ndi nkitshulula lu difuku diʼewambu kandi ka lomoso.

¹⁶Olombedi ayumbia luhita la lunya landi la lupami lu iso keli lu difuku diʼewambu ka lunya landi la lomoso, ku ndi ayomonga iso kako la luhita tena esambeli la ntundu ka Latuyalaka.

¹⁷Olombedi ayukita iso kambutshikala lu lunya lu sodi ka tui dia lupami dia one layanga mbediama, ndu lu luhita lʼumi la lunya landi la lupami ndu lu luhita lʼumi la lukulu landi la lupami, ladiku dia dikila dia nyama kʼulambu wʼunungu.

¹⁸Olombedi ayutela iso kutshikadi lu lunya landi lʼote wa one layanga mbediama, ayutungela ekesanelu la ntundu ka Latuyalaka.

¹⁹Ku olombedi ayulambula ulambu wa kolo, dia ntungela one layanga mbediama uma lu mindu kandi ekesanelu.

²⁰Lʼokongo diku olombedi ayudiaka nyama kʼulambu a lutshumba. Ndi ayulambula ulambu wa lutshumba, lʼulambu a shima lʼediakelu. Okone ndi ayutungela untu ako ekesanelu. Ku untu ako ayuyala pudipudi.

²¹Keli naka usi wula kendi ndu heyi ntana efula, ndi kela osongo wʼokoko wʼumi otoi, kayukimo ulambu wa lutshumba ne dia ulambu wʼunungu, dia mbutungela ekesanelu; ndi kose etenyi otoi ka dikumi ka efa ka shima ka pudipudi kosohanyimi la iso ne dia ulambu wa shima, la longo lʼiso.

²²Ndi kose ndu binga pendi kana tana tuhendi ta kudumba, uku ekundjelu kandi: kemotshi ne dia ulambu wa kolo, kekina ne dia ulambu wa lutshumba.

²³Lushi lʼenanei, ndi kela diango ne tshe le olombedi lʼeotwelo ka luudu lʼesanganelu la dipema, la ntundu ka Latuyalaka, ne dia ediamelu kandi.

²⁴Olombedi ayosa osongo wʼokoko wa ulambu wʼunungu la longo lʼiso, ayudietshetsha la ntundu ka Latuyalaka.

²⁵Olombedi ayudiaka osongo wʼokoko wʼulambu wʼunungu. Ndi ayosa dikila dia nyama kʼulambu wʼunungu, ayudikita one layanga mbediama lu sodi ka tui dia lupami, ndu lu luhita lʼumi la lunya landi la lupami; ndu lu luhita lʼumi la lu lukulu landi la lupami.

²⁶Olombedi ayutshulula iso lu difuku diʼewambu kandi ka lomoso.

²⁷Ndi ayomonga iso keli lʼewambu ka lunya landi la lomoso la luhita la lunya landi la lupami tena esambeli, la ntundu ka Latuyalaka.

²⁸Olombedi ayukita iso keli lu ewambu kandi lu sodi ka tui dia lupami dia one layanga mbediama, lu luhita lʼumi la lunya landi la lupami ndu lu luhita lʼumi la lukulu landi la lupami lu dihuli diakandakitshi dikila dia osongo wʼokoko wʼulambu wʼunungu.

²⁹Olombedi ayutela iso kutshikadi lu lunya lʼote wa one layanga mbediama, dia mbutungela ekesanelu la ntundu ka Latuyalaka.

³⁰Ku ndi ayulambula ulambu wa binga kana wa tana ta kudumba uku weyandi ntana:

³¹kemotshi ulambu wa kolo, kekina ulambu wa lutshumba, kame la ulambu a shima. Ku olombedi ayutungela one layanga mbediama ekesanelu la ntundu ka Latuyalaka.

³²Oso eli olembe ne dia one leli la kandji ka sudi, laheyi ntana elambu ne dia ediamelu kandi.

³³Latuyalaka akatela Mose la Arona ati:

³⁴Lamʼayunyutsho lu kete ya Kanana, yamumunyusha, naka lambutuma kandji ka sudi lu luudu la lu wudja omotshi wayunyuyala akanga awo,

³⁵one layuyala kanga luudu, katshu le olombedi la ntuwutela ati: Dimi lambutatela mena diwadi uku dia kandji ka sudi lu luudu lami.

³⁶Ntundu olombedi atoto dia ntushishima kandji, ndi ayuta dia vo minya diango lu luudu, ne dia kene tshe keli loko katukuyala mindu. Ku lʼokongo diku olombedi ayoto dia ntenda luudu.

³⁷Ndi ayûshishima kandji. Naka ndi ambena ati: To kambutshima afuku wʼeleselese kana wa ebelabela lu peli dia luudu, la afuku ako wamboto pulu lʼatei eheli,

³⁸ndi ayutumba uma lu luudu. Lamʼayundukuma la suku, ndi ayudiha luudu yediko ya nshi esambeli.

³⁹Olombedi ayukalula leko lushi lʼesambeli. Naka ndi ambena ati: Kandji kambudiangana lu peli dia luudu,

⁴⁰ndi ayuta dia vo minya ave wambundama la kandji, la mbakadja lʼandja wʼusumba, lu dihuli dia mindu.

⁴¹Ndi ayuta dia vo mpelola lʼetei a luudu; la dia vo mbikadja ditshu diayuwohelola lʼandja wʼusumba, lu dihuli dia mindu.

⁴²Ku vo wayosa ave akina dia mbidja lu ahuli waki ave wa ntundu; la kete ya losoha kina dia nshingula luudu ntu.

⁴³Naka kandji kambukalula ntu ndu kambutsha diwadi lu luudu lʼokongo a minya ave, ndu wa mpelola la nshingula luudu ntu,

⁴⁴ku olombedi ayukalula leko ntu. Naka ndi ambeya ati: Kandji kambudiangana lu luudu, keti sudi kʼedjedja keli loko. Lo leko mindu.

⁴⁵Vo kawunyukuli luudu, ave ndu etamba, kete tshe ya losoha ya lu luudu; kawotole diango diako lʼandja wʼusumba, lu dihuli dia mindu.

⁴⁶Dikambu dikina, one layoto lu luudu lʼetena tshe kudihamilo, ayuyala mindu edja ndu dikolo.

⁴⁷One layetama loko, kasuli ahondo andi; ndu one layole lu luudu lako, kasuli ahondo andi.

⁴⁸Keli naka olombedi ayukalula lu luudu, ku ndi ambena ati: Kandji hadianganyi lʼokongo wa mumba luudu ntu, ndi ayuta ati: Lo laya pudipudi, ne dia kandji kalo kambushila.

⁴⁹Olombedi ayosa fudu hyendi, tshamba yʼusasi, wundu la nyumba dia mbedia luudu.

⁵⁰Ndi ayudiaka fudu kemotshi lu puki ka diwumba ladiku diʼashi wʼuma la lushi.

⁵¹Ndi ayosa tshamba yʼusasi, nyumba wundu la fudu kʼosenyu, ayumbia diango diako lu dikila dia fudu kakawadiaki ndu lu ashi wʼuma la lushi. Ku ndi ayudimonga tena esambeli lu luudu.

⁵²Ndi ayedia luudu la dikila dia fudu, la ashi wʼuma la lushi, la fudu kʼosenyu, kame la tshamba yʼusasi, nyumba la wundu.

⁵³Ndi ayufumbula fudu kʼosenyu lʼusui, lʼandja wʼusumba. Osoku mbayutungela luudu ekesanelu, ku lo layuyala pudipudi.

⁵⁴Oso eli olembe wa kandji tshe ka sudi: wa lukangangu,

⁵⁵wa sudi ka lu dihondo kana ka lu luudu,

⁵⁶wa edada, lukaya kana diwadi,

⁵⁷dia menya lamʼeli engo mindu ndu lamʼeto pudipudi. Oso eli olembe wa sudi.