Read tetala Akambu wʼAsi Lewi 15 Bible Online

Akambu wʼAsi Lewi 15 - tetala bible

Akambu wʼAsi Lewi 15

¹Latuyalaka akatela Mose la Arona ati:

²Nyuteli asi Isariyele nyati: Pami tshe keli la ekelelo uma lu dimba diandi, ekelelo kandi keko mindu.

³Onʼeli olembe wa mindu kandi ne dia ekelelo: kana dimba diandi diatokediaka kana diatukimelaka, dikambu diako dieko mindu le ndi.

⁴Tangi tshe kayetama one leli la ekelelo kayuyala mindu, ndu engo tshe kayundudjase kayuyala mindu.

⁵Untu tshe layunanda tangi kandi, kasuli ahondo, koke. Uma laso ku ndi ayuyala mindu edja ndu dikolo.

⁶Untu tshe layudjase lu engo kakadjashi one leli la ekelelo, kasuli ahondo, koke. Uma laso ku ndi ayuyala mindu edja ndu dikolo.

⁷Untu tshe layusakana la one leli la ekelelo, kasuli ahondo, koke. Uma laso ku ndi ayuyala mindu edja ndu dikolo.

⁸Naka one leli la ekelelo ayutela untu soi, untu ako kasuli ahondo, koke. Uma laso ku ndi ayuyala mindu edja ndu dikolo.

⁹Edie tshe ka ladiku dia nyama kayundudjase, kayuyala mindu.

¹⁰Untu tshe layusakana la engo kakandadjashi, ayuyala mindu edja ndu dikolo. Untu tshe layemba engo kakandadjashi, kasuli ahondo, koke. Uma laso ku ndi ayuyala mindu edja ndu dikolo.

¹¹Untu tshe layunandema le one leli la ekelelo, lahatotsha anya, kasuli ahondo, koke. Uma laso ku ndi ayuyala mindu edja ndu dikolo.

¹²Kawuli mbaka tshe kayunanda one leli la ekelelo. Kawusuli ludu tshe layundunanda.

¹³Lamʼayokono one leli la ekelelo uma lu ekelelo kandi, ndi kali nshi esambeli ne dia edielo kandi; kasuli ahondo, katoke lʼashi wakela. Ku ndi ayuyala pudipudi.

¹⁴Lu lushi lʼenanei, ndi kose binga pendi kana tana tuhendi ta kudumba. Kayi la ntundu ka Latuyalaka lʼeotwelo ka luudu lʼesanganelu la dipema, kayuyikimo le olombedi.

¹⁵Ku olombedi ayuyilambula: kemotshi ne dia ulambu wa kolo, la kekina ne dia ulambu wa lutshumba. Olombedi ayutungela ekesanelu la ntundu ka Latuyalaka, ne dia ekelelo kandi.

¹⁶Naka untu ayokosha alomi andi okoshakosha, ndi koke dimba tshe. Uma laso ku ndi ayuyala mindu edja ndu la dikolo.

¹⁷Dihondo tshe la ekuhu tshe kayoko alomi ako, kawusulami lʼashi. Uma laso ku dio diayuyala mindu edja ndu dikolo.

¹⁸Naka pami ayokoshiya umuntu alomi, vo ahendi kawoke. Uma laso ku vo wayuyala mindu edja ndu dikolo.

¹⁹Lamʼayena umuntu dikila, ndi ayuyala mindu nshi esambeli, la one tshe layusakana la ndi, ayuyala mindu edja ndu dikolo.

²⁰Tangi tshe ketamandi lu nshi yandi ya dikila kayuyala mindu, ndu engo tshe kayundudjase kayuyala mindu.

²¹Untu tshe lasakana la tangi kandi, kasuli ahondo, koke. Ku ndi ayuyala mindu edja ndu dikolo.

²²Untu tshe layusakana la engo kakandadjashi, kasuli ahondo, koke. Ku ndi ayuyala mindu edja ndu dikolo.

²³Naka untu ayusakana la engo kaki lu tangi kandi, kana lʼedie kakandadjashi, ndi ayuyala mindu edja ndu dikolo.

²⁴Naka pami ayeyana la ndi, ku dikila dia umuntu ako diambuyala lu dimba diandi, ndi ayuyala mindu nshi esambeli. Ndu tangi tshe kayundetama, kayuyala mindu.

²⁵Naka umuntu ayena dikila lʼetena kahandatenaka, kana nshi yambundena ambuleka nshi yatundenaka, ndi ayuyala mindu uku lu nshi yatundenaka dikila.

²⁶Tangi tshe kayundetama lamʼendi la dikila, kayuyala uku tangi kandi ka lu nshi ya dikila. Engo kayundudjase kayuyala mindu uku atukiuyalaka mindu lu nshi yandi ya dikila.

²⁷Untu tshe layusakana la diango diako, ayuyala mindu, kasuli ahondo, koke. Ku ndi ayuyala mindu edja ndu dikolo.

²⁸Keli naka dikila diambushila, ndi kali nshi esambeli, lʼokongo diku ndi ayuyala pudipudi.

²⁹Lu lushi lʼenanei, ndi kela olombedi binga pendi kana tana ta kudumba tuhendi lʼeotwelo ka luudu lʼesanganelu la dipema.

³⁰Olombedi ayulambula kemotshi ulambu wa kolo, la kekina ulambu wa lutshumba. Ku olombedi ayutungela ekesanelu, ne dia mindu kandi la ntundu ka Latuyalaka.

³¹Osoku mbayunyanganyaka asi Isariyele uma lu mindu yawo, ne dia watukuvo lu mindu yawo naka vo wambudja etemwelo kami keli lʼatei awo mindu.

³²Oso eli olembe le pami keli la ekelelo ka tunya ndu le one lasana la alomi, dia mbete mindu.

³³Oso eli ole-mbe ndu le umuntu lambena dikila, le pami kana le umuntu leli la ekelelo; ndu le pami leyana la umuntu leli mindu.