Read tetala Akambu wʼAsi Lewi 16 Bible Online

Akambu wʼAsi Lewi 16 - tetala bible

Akambu wʼAsi Lewi 16

¹Latuyalaka akateketa la Mose lʼokongo wa nyoi kʼana apami ahendi wa Arona wakavu lamʼakawasukana la ntundu ka Latuyalaka.

²Ndi akatela Mose ati: Uteli onanyo Arona totoki tena tshe lu dihuli diuleki ekila, lʼedia dihondo diʼatanyelu[13] la ntundu kʼufudi wʼoshete wʼekila, ndi atukuvo; ne dia dimi layene lu dingi ladiku diʼufudi ako.

³Keli Arona kotoki lu dihuli diʼekila kame la diango ne: osongo a ngombe wʼumi ne dia ulambu wa kolo, la okoko wʼumi ne dia ulambu wa lutshumba.[14]

⁴Ndi kalote ukutu wʼasangu wa linene wʼekila, kalote ndu ehaku, la uya wa linene. Kahe lufule lʼolombedi la linene lʼote: vo weli eloto wʼekila. Ndi katoki la ntundu ka mbelota.

⁵Ndi kalunguli weumbi ehendi wa mbudi ne dia ulambu wa kolo, la okoko wʼumi ne dia ulambu wa lutshumba uma le ului wʼasi Isariyele.

⁶Ku Arona ayulambula ngombe kʼumi uku ulambu wa kolo, lu dikambu diandi, dia ndjatungela ekesanelu, ndi la wa lu luudu landi.

⁷Ndi ayosa mbudi yako hyendi, ayuyikitsha la ntundu ka Latuyalaka, lʼeotwelo ka luudu lʼesanganelu la dipema.

⁸Ku Arona ayuka mbudi yako hyendi uwali, dia mbeya kene kayuyala le Latuyalaka, la kene kayuyala nseku.

⁹Arona ayosa kene kayosonwama le Latuyalaka, ayukilambula uku ulambu wa kolo.

¹⁰Keli mbudi kayundama uwali dia ndjala nseku, kayukitshama osenyu la ntundu ka Latuyalaka, dia Arona ntunga ekesanelu ladiku diato. Ku ndi ayukitshanya uku nseku utsha lʼusui.

¹¹Arona ayulambula ngombe kʼumi uku ulambu a kolo dikambu diandi, ku ndi ayutunga ekesanelu lu dikambu diandi ndu dia wa lu luudu landi. Ndi ayudiaka ngombe kako uku ulambu wa kolo dikambu diandi.

¹²Ndi ayosa luhusu too lʼakalanga wa dja, uma lu dja ya lʼediakelu yeli la ntundu ka Latuyalaka. Ndi ayosa awambu ahendi wa malashi wʼufutshi. Ndi ayotola diango ne lʼedia dihondo diʼatanyelu.

¹³Ndi ayudja malashi lu dja la ntundu ka Latuyalaka, dia edinga wa malashi ako nkumba ufudi wʼoshete wʼomenyi, ne dia ndi atukuvo.

¹⁴Ndi ayosa dikila dia ngombe kako, ayudimonga la luhita landi lʼufudi wʼoshete, lu leke lʼehutwelu. Ku ndi ayomonga dikila la luhita landi la ntundu kʼufudi wʼoshete wʼekila tena esambeli.

¹⁵Ndi ayudiaka mbudi kʼulambu wa kolo dikambu dia wudja. Ndi ayotola dikila lʼedia dihondo diʼatanyelu.[15] Ku ndi ayutsha la dikila diako uku akandatshi la dikila dia ngombe kʼumi. Ndi ayudimonga lʼufudi wʼoshete wʼekila ndu la ntundu kʼufudi ako.

¹⁶Ndi ayutungela dihondo diʼekila ekesanelu, ne dia mindu yʼasi Isariyele, ehedia awo la kolo yawo tshe. Osoku mbayundutshela luudu lʼesanganelu la dipema leli kame la wo lʼatei a mindu yawo.

¹⁷Untu totoki lu luudu lʼesanganelu la dipema lamʼayoto Arona dia ntutunga ekesanelu lu dihuli diʼekila, edja ndu lamʼayundutumba, ndu lamʼayundushila ntunga ekesanelu dikambu diandi ndame ndu dia wa lu luudu landi, la dia ului tshe wa Isariyele.

¹⁸Lamʼayundutumba, ndi ayutsho utsha lʼediakelu keli la ntundu ka Latuyalaka, ayukitungela ekesanelu. Ndi ayosa dikila dia ngombe la dia mbudi, ku ndi ayudikita lʼutshimba tshe wa seki ya lʼediakelu.

¹⁹Ndi ayomonga dikila la luhita landi tena esambeli ladiku diʼediakelu kako. Ndi ayukiedia, ayukikidia ne dia mindu yʼasi Isariyele.

²⁰Lamʼayundushidiya ntungela dihuli diʼekila, luudu lʼesanganelu la dipema, ndu ediakelu ekesanelu, ndi ayela mbudi kʼosenyu.

²¹Ndi ayahe anya andi lʼote a mbudi kako, ayushwela asi Isariyele kolo yawo ladiku diato, ndu ehedia awo wakawatshaka, ayuwahe lʼote a mbudi. Ndi ayukikimo le untu lakasonwama dia ndi nkitshanya utsha lʼusui wa shenga.

²²Untu ako kakitshanya utsha lʼusui wa shenga, ku mbudi ayuwaembela kolo yawo tshe utsha lu kete yahadjashi antu.

²³Arona ayuya uya Ju luudu lʼesanganelu la dipema, ayukulula eloto wa linene wakandalotshi lamʼakandotwe lu dihuli diʼekila. Ndi ayakitsha loko.[16]

²⁴Ku ndi ayoka ashi weli lu dihuli diʼekila, ayolota ahondo andi. Ku ndi ayutumba la ndjulambula ulambu andi wa lutshumba, ndu ulambu wa lutshumba wa wudja. Ndi ayutunga ekesanelu dikambu diandi, ndu dia wudja.

²⁵Ndi ayutshumba wata wa nyama kʼulambu wa kolo lʼediakelu.

²⁶Okone, one layutshanya mbudi kʼutsha le Azazele, kasuli ahondo andi, koke. Lʼokongo diku ndi mbeyaka nkalula lu pangu.

²⁷Kawotole ngombe kʼumi kʼulambu wa kolo, la mbudi kʼulambu wa kolo, dikila tshe diakawatodi dia ntunga ekesanelu lu dihuli diʼekila lʼandja a pangu.[17] Kawutshumbi dikuhu diayo, emunyi ayo ndu tumi tayo lu dja.

²⁸One layuyitshumba, kasuli ahondo andi, koke. Lʼokongo diku ndi mbeyaka nkalula lu pangu.

²⁹Olembe one mbayuyala pundju le nyu. Lushi la dikumi la ngondo kʼesambeli, kanyuyakimelaki, tanyutshaki ulimu, kuyanga usi ngelu kana ongendangenda,

³⁰ne dia lushi lako mbayuwunyutungelaka ekesanelu dia nyu mbediama;[18] uma lu kolo yanyu tshe mbayunyediama la ntundu ka Latuyalaka.

³¹Lo leli lushi lʼekila, la mumuya ka shikaa le nyu, nyu nyayuyakimelaka. Oso eli olembe wa pundju.

³²Olombedi lambukitama iso ndu lambukidiama lu dihuli dia shi lʼulimu wʼolombedi ayutungela ekesanelu, olotshi eloto wa linene wʼekila.

³³Ndi ayutungela etemwelo ekesanelu; ndi ayutungela luudu lʼesanganelu la dipema la ediakelu ekesanelu. Ndi ayutungela elombedi la antu tshe wa lʼului ekesanelu.

³⁴Oso eli olembe wa pundju le nyu: dia ntungela asi Isariyele ekesanelu etena otoi lu eleku lʼeleku, ne dia kolo yawo tshe. Ku ndi akatshi uku akadjangela Latuyalaka Mose.