Read tetala Akambu wʼAsi Lewi 17 Bible Online

Akambu wʼAsi Lewi 17 - tetala bible

Akambu wʼAsi Lewi 17

¹Latuyalaka akatela Mose ati:

²Uteli Arona la anʼandi wʼapami la asi Isariyele wati: Olembe wambudja Latuyalaka one.

³Naka pami tshe ka lu khumbu ka Isariyele ambudiaka ngombe, onʼokoko kana mbudi lʼatei a pangu, kana kidiaka lʼandja a pangu,

⁴ku ndi hakiela uya lʼeotwelo ka luudu lʼesanganelu la dipema, dia ndjukilambula uku ushasha le Latuyalaka, la ntundu kʼetemwelo kandi, ndi ayuyala la unungu, ne dia ndi ambutshulula dikila utshululatshulula. Untu ako ayunyema uma lʼatei a wudja awo.

⁵Dikambu so eli dia asi Isariyele ndja la elambu awo watuwudiakaka lʼusui, la mbela le Latuyalaka, lʼeotwelo ka luudu lʼesanganelu la dipema le olombedi, la mbediaka uku elambu wa ki le Latuyalaka.

⁶Ku olombedi ayomonga dikila lʼediakelu ka Latuyalaka, lʼeotwelo ka luudu lʼesanganelu la dipema. Ndi ayutshumba wata dia ndjala diowo dia ngenyangenya Latuyalaka.

⁷Tawulambulaki ditemolatemola diakawatemolaka elambu awo ntu. Oso eli olembe wa pundju lu lolonga la lolonga.

⁸Usi Isariyele tshe, kana ongendangenda ludjashi la nyu, layulambula ulambu kana ulambu wa lutshumba,

⁹ku ndi hela ulambu ako uya lʼeotwelo ka luudu lʼesanganelu la dipema, dia ndjulambula Latuyalaka; untu ako ayunyema uma lʼatei a wudja awo.

¹⁰Naka pami tshe ka lu khumbu ka Isariyele, kana ongendangenda ludjashi lʼatei awo, ayole dikila, dimi layendana la untu ako lale dikila. Dimi layuwunya uma lʼatei a wudja awo,[19]

¹¹ne dia lumu la dimba leko lu dikila. Dimi lakanyushalo lʼediakelu dia ntungela etema anyu ekesanelu, ne dia dio dieli dikila diatutungaka ekesanelu[20] dikambu dia lumu.

¹²Diako mbakamatela asi Isariyele nti: Lʼatei wʼasikanyu, kana angendangenda wudjashi lʼatei anyu, untu talekaki dikila.

¹³Ndu pami tshe lʼatei wʼasi Isariyele kana lʼatei wʼangendangenda wudjashi lʼatei anyu, untu tshe layutsho lu winga, layutudiaka nyama kana fudu katuwolekaka, ndi kasedia dikila, ku ndi dife kete.

¹⁴Lumu la etungatunga tshe leko dikila diato. Diako mbakamatela asi Isariyele nti: Tanyolekaki dikila dia etungatunga tshe, ne dia lumu la etungatunga tshe leko lu dikila diato. Untu tshe layole dikila, ayunyema.

¹⁵Untu tshe, ona luta kana ongendangenda, layole engo kambuvo usina kana kene kakandama le nyama, ndi kasuli ahondo, koke. Ku ndi ayuyala mindu edja ndu dikolo; lʼokongo diku ndi ayuyala pudipudi.

¹⁶Keli naka ndi hasuli ahondo, hoke, ndi ayemba wutshu wa kolo kandi.