Read tetala Akambu wʼAsi Lewi 18 Bible Online

Akambu wʼAsi Lewi 18 - tetala bible

Akambu wʼAsi Lewi 18

¹Ku Latuyalaka akatela Mose ati:

²Uteli asi Isariyele wati: Dimi keli Latuyalaka, Unyashungu anyu.

³Tanyutshaki uku atuwutshaka lu kete ya Edjibitu, lene akanyadjashi, ndu tanyu-tshaki uku atuwutshaka lu kete ya Kanana, lene atamanyotole. Tanyuyelaki elembe awo.

⁴Kanyutshaki uku adjangu ami, kanyulamaki elembe ami, kanyeyelaki. Dimi keli Latuyalaka, Unyashungu anyu.

⁵Okone kanyulamaki elembe ami la adjangu ami, lu ntsha kene kayuyala untu la lulumbi.[21] Dimi keli Latuyalaka.

⁶Lʼatei anyu, untu tasukanaki dia mbufula utakataka wa one luto la ndi. Dimi keli Latuyalaka.

⁷Tufuiaki utakataka wa sho. Vo mbeli utakataka wa nyo. Ndi keli nyo, tufulaki utakataka andi.

⁸Tufulaki utakataka a wadi a sho. Vo weli utakataka wa sho.[22]

⁹Tufulaki utakataka wa kadiyaye, one lusangi la ye sho kana one lusangi la ye nyo kana one lakuto lu ngelu kanyu kuyanga one lakuto lu ngelu kekina.[23]

¹⁰Tufulaki utakataka wa ukana aye a umuntu: onʼa onʼaye la pami kana onʼa onʼaye la umuntu, ne dia utakataka awo weli utakataka aye.

¹¹Tufulaki utakataka wa onʼa wadi a sho, lakanduti la sho, ne dia ndi eli kadiyaye.

¹²Tufulaki utakataka wa shokadi, ne dia ndi eko shokadi.

¹³Tufulaki utakataka wa nyokadi, ne dia ndi eli nyo.

¹⁴Tufulaki utakataka a wadi a onangu sho. Ndi eli shokadi.[24]

¹⁵Tufulaki utakataka wa olokai aye. Ndi eli wadi a onʼaye.[25]

¹⁶Tufulaki utakataka a wadi onanyo. Ndi eli utakataka wa onanyo.[26]

¹⁷Tufulaki utakataka wa umuntu omotshi la wa onʼandi a umuntu, ndu tosaki ukana andi a umuntu, lakuti onʼandi a pami kana onʼandi a umuntu dia mbufula utakataka awo, ne dia wali la ona mbewo. Dikambu so dieko kolo.[27]

¹⁸Tutshukaki umuntu omotshi dia ndjala onʼa manda le onangu, dia mbufula utakataka andi lamʼeki onangu la lumu.

¹⁹Tusukanaki le umuntu dia mbufula utakataka andi lamʼendi la mindu ka dikila.[28]

²⁰Tetamaki la wadi unyaye, dia ntsha luseka, tuyalanyaki la ndi.[29]

²¹Tukimoki anʼaye dia vo mbalambula Moleka. Tonyolaki lukumbu la Unyashungu aye:[30] dimi keli Latuyalaka.

²²Teyanaki la pami uku ateyanaka pami la umuntu. Dikambu so dieko wononyi.[31]

²³Teyanaki la nyama, tuyalanyaki la to. Umuntu tasukanaki le nyama dia mbeyana la to, dikambu so dieko ufutanu.[32]

²⁴Tanyuyalanyaki lu akambu ane, ne dia akambu ane tshe mbakayalanyaka wedja watamatshanya la ntundu kanyu.

²⁵Kete yakalana la wo. Diako mbakamayisuya, ku yo yambutuwo antu ayo.

²⁶Okone nyulamaki elembe ami la adjangu ami, ona luta kana ongendangenda ludjashi lʼatei anyu, ndu tanyutshaki nduku dikambu lʼatei wʼakambu ane a wononyi

²⁷(ne dia akanga a kete waki la ntundu kanyu wakatshaka akambu aso tshe wa wononyi, okone kete yakalana);

²⁸ne dia kete yatukunyutuwo ndu nyu lamʼayunyuyilanya, uku akayatuwo waku waki la ntundu kanyu.

²⁹Ne dia antu tshe wayutsha dikambu dimotshi lʼatei wʼakambu aso a wononyi, antu ako wayunyema uma lʼatei a wudja awo.

³⁰Okone nyukitanyiaki diui diami, diaha nyu ntsha nduku etshelu lʼatei a ditshelu diakawatshaka la ntundu kanyu, tanyuyalanyaki la dio. Dimi keli Latuyalaka, Unyashungu anyu.