Read tetala Akambu wʼAsi Lewi 19 Bible Online

Akambu wʼAsi Lewi 19 - tetala bible

Akambu wʼAsi Lewi 19

¹Latuyalaka akatela Mose ati:

²Uteli ului tshe wʼasi Isariyele wati: Nyuyali ekila, ne dia dimi Latuyalaka, Unyashungu anyu, leko ekila.[33]

³Nyu tshe, untu lʼuntu alemiaki shi la nyangu,[34] ndu nyulamaki nshi yami ya mumuya.[35] Dimi keli Latuyalaka, Unyashungu anyu.

⁴Tanyukadimoki utsha le dikishi,[36] kuyanga ndjatshela ditemolatemola dia lolelola.[37] Dimi keli Latuyalaka, Unyashungu anyu.

⁵Lamʼayunyulambula Latuyalaka elambu wa ki, kanyulambuli wuhu wayundetawo.

⁶Kanyuli nyama kʼulambu ako lushi layunyulambula kana la wedi a pindju. Naka etenyi kayutshikala edja ndu lushi la satu, kanyukitshumbi.

⁷Naka untu ayole etenyi kawo lushi la satu, ulambu ako wayuyala wononyi, hawulungwama.

⁸Untu tshe layuwole, ayemba kolo kandi, ne dia ndi ambusuwula engo kʼekila ka Latuyalaka. Untu ako ayunyema uma lu wudja awo.

⁹Lamʼayunyuyala la dinela lu kete yanyu, tanyunaki lu atshuku tshe wa lu dikambo dianyu, kuyanga nkodiakodia lʼokongo a dinela dianyu.

¹⁰Tanyumbaki elua tshe tshe wa lu dikambo dianyu diʼelua, kuyanga ntongona elua wamboko lu dikambo dianyu. Kanyetshikeli asi wula la angendangenda. Dimi keli Latuyalaka, Unyashungu anyu.[38]

¹¹Tanyuvanelaki,[39] tanyukesanaki;[40] tanyutanelaki kashi.

¹²Tanyutshibaki lukumbu lami lu kashi,[41] nyutukusuwula lukumbu la Unyashungu anyu. Dimi keli Latuyalaka.

¹³Tengiyaki unyaye, kuyanga mbohotola engo kandi. Tukimelaki difutu diʼukambi aye utshu tshe edja ndu la pindju.[42]

¹⁴Tudjaki kanga luhuki mananu, kuyanga nkitsha utamba a ntakanya la ntundu ka kanga tshungu,[43] keli ukaki Unyashungu aye woma. Dimi keli Latuyalaka.

¹⁵Tusambulaki usambulasambula lʼelumbwelu: tekamaki usi wula kana nemia untu a wuki. Keli kusambuiaki anyaye la sambu kʼololo.[44]

¹⁶Tetetaki lʼatei a wudja anyu uku kanga kadikadi. Tutungelaki unyaye nyoi. Dimi keli Latuyalaka.

¹⁷Tuhetshaki onanyo lʼutema aye: keli koteketaki la unyaye,[45] ne dia utukuyemba kolo lu dikambu diandi.

¹⁸Tukaluyaki kolo lu kolo, tuyalaki la ukumba le asi wudja aye. Keli ulangaki unyaye uku ayalangaye.[46] Dimi keli Latuyalaka.

¹⁹Kanyulamaki elembe ami. Tetawoki ngombe kaye kemotshi mbuta la wuhu ukina wa ngombe. Tuneki wehu ehendi a wuhu kame lʼekambo kaye. Tolotaki dihondo dia wehu ehendi wʼahondo.[47]

²⁰Naka untu ayetama la umuntu leli fumbi dia mbeyana la ndi, umuntu lakasonwama le pami kekina ndu lahatatshungwama kana ndjala la ndjadjasela, vo wayusuyama. Keli aha ndjakema, ne dia umuntu atatshungo.

²¹Pami kako kela ulambu andi wʼunungu le Latuyalaka, lʼeotwelo ka luudu lʼesanganelu la dipema, okoko wʼumi wʼulambu wʼunungu.

²²Olombedi ayutungela ekesanelu la okoko wʼumi wʼulambu wʼunungu la ntundu ka Latuyalaka, ne dia kolo kakandatshi. Ku ndi ayudimanyiama kolo kakandatshi.

²³Lamʼayunyukuma lu kete yako, kanyune wehu tshe wʼetamba wʼelua watuwolekaka. Kanyendaki elua ako deku satu uku elua weli olembe. Lʼatei wa deku satu so, vo wayuyala olembe le nyu, tanyelekaki.

²⁴Keli lʼeleku ka nei, elua awo tshe wayuyala ekila, ulambu wa diandi le Latuyalaka.

²⁵Ku lʼeleku ka tanu, nyu mbeyaka nde elua awo, dia vo nyotwela elua efula. Dimi keli Latuyalaka, Unyashungu anyu.

²⁶Tanyolekaki nyama keki la dikila.[48] Tanyedjaki wetshi, kuyanga ntsha akambu wa doka.[49]

²⁷Tanyunyaki luhimbi kuyanga nkolonga toledu.

²⁸Tanyuyakotaki puta lamʼavo untu, kana ndjadja sangu lʼalimba anyu.[50] Dimi keli Latuyalaka.

²⁹Tulanyaki onʼaye a umuntu, dia mbete kanga luseka,[51] ne dia kete yatukulula la luseka, ndu kete yatukuyala too la kolo.

³⁰Kanyulamaki nshi yami ya mumuya, kanyolemiaki etemwelo kami. Dimi keli Latuyalaka.[52]

³¹Tanyukadimoki le wetshi watoteketshaka djimu, kuyanga utsha le akanga wʼaloho.[53] Tanyayangaki dia nyu ndjalanya la wo. Dimi keli Latuyalaka, Unyashungu anyu.

³²Kunelaki la ntundu ka kanga ndjui. Kolemiaki usumbi wʼuntu; ukaki Unyashungu aye woma. Dimi keli Latuyalaka.

³³Lamʼayudjase ongendangenda la ye lu kete yanyu, tanyutshelaki kolo.

³⁴Ongendangenda ludjashi la nyu, kayali uku onʼa luta lʼatei anyu. Kanyuwukaki ngandji, uku atunyuyaukaka ngandji, ne dia ndu nyu mbaki angendangenda lu kete ya Edjibitu.[54] Dimi keli Latuyalaka, Unyashungu anyu.

³⁵Tanyuyalaki la lukesu lʼelumbwelu, lu tediko tʼetali, ta wetshu, kana tʼefula.

³⁶Nyuyali la tediko ta pupu: kilo ya pupu, wetshu wa pupu, mbaka ya pupu, la efa ya pupu.[55] Dimi keli Latuyalaka, Unyashungu anyu, lakanyutundja uma lu kete ya Edjibitu.

³⁷Kanyulamaki elembe ami tshe la adjangu ami tshe, kanyatshaki. Dimi keli Latuyalaka.