Read tetala Akambu wʼAsi Lewi 2 Bible Online

Akambu wʼAsi Lewi 2 - tetala bible

Akambu wʼAsi Lewi 2

¹Lamʼela untu ulambu wa shima uku ulambu le Latuyalaka, ulambu andikawuyali wa shima ka pudipudi. Ndi kateli iso ladiku diato, kadji ndu tsho loko.

²Ndi kakiela le elombedi, ana apami wa Arona. Ndi kose diwambu too dia shima ka pudipudi uma loko la iso, kame la totsho tawo tshe. Ku olombedi ayukitshumba uku etenyi kato kʼeuhwelu ladiku diʼediakelu, ulambu wa nambula lu dja, dia ndjala diowo dia ngenyangenya Latuyalaka.

³Etenyi kʼulambu wa shima kayutshikala, kayuyala ka Arona la anʼandi wʼapami. Oso eli etenyi kuleki ekila lʼatei wʼelambu wa nambula lu dja le Latuyalaka.

⁴Lamʼelaye ulambu wa shima ka lufumba uku ulambu, vo kawuyali ekama waha la edya wa shima ka pudipudi kosohanyimi la iso, kana ekati waha la edya woloyami la iso.

⁵Naka ulambu aye weli ulambu wa shima ka lukalanga, vo kawuyali wa shima ka pudipudi kaha la edya, kosohanyimi la iso.

⁶Kati ukama ako betshi, kuditeli iso. Oso eli ulambu wa shima.

⁷Naka ulambu aye weko ulambu wa shima ka lukanga lu panu, vo kawutshami la shima ka pudipudi la iso.

⁸Kela ulambu wambutshama la diango so le Latuyalaka. Lamʼakimwamawo le olombedi, ndi ayuwela lʼediakelu.

⁹Ku olombedi ayutoshi uma lʼulambu wa shima etenyi kawo kʼeuhwelu, ayukitshumba lʼediakelu, ulambu wa nambula lu dja, dia ndjala diowo dia ngenyangenya Latuyalaka.

¹⁰Etenyi kʼulambu ako wa shima kayutshikala, kayuyala ka Arona la anʼandi wʼapami. Oso eli etenyi kuleki ekila lʼatei wʼelambu wa nambula lu dja le Latuyalaka.

¹¹Nduku ulambu wa shima wayunyela le Latuyalaka wayutshama la edya, ne dia nyu hanyutshumba edya kuyanga usanga uku ulambu wa nambula lu dja le Latuyalaka.

¹²Nyu mbeyaka mbaela uku ulambu wʼolonga le Latuyalaka. Keli tawulambwamaki lʼediakelu, dia ndjala diowo dia ngenyangenya.

¹³Kudjaki leho lu elambu aye tshe wa shima. Tetawoki dia leho la sheki ya Unyashungu aye mpumbama lʼulambu aye wa shima. Kulambulaki leho kame la elambu aye tshe.

¹⁴Naka we ambulambula ulambu wa shima kʼolonga le Latuyalaka, kulambuli tongo yʼeyuyu yʼetoshu yʼuma lʼesika wʼeyuyu, ya lufumba, ne dia ulambu wa shima kʼolonga aye.

¹⁵Kutelaki iso ladiku diawo, kudjaki ndu tsho loko. Oso eli ulambu wa shima.

¹⁶Ku olombedi ayutshumba etenyi ka tongo yʼetoshu la ka iso kame la totsho tato uku etenyi kawo kʼeuhwelu. Oso eli ulambu wa nambula lu dja le Latuyalaka.