Read tetala Akambu wʼAsi Lewi 20 Bible Online

Akambu wʼAsi Lewi 20 - tetala bible

Akambu wʼAsi Lewi 20

¹Latuyalaka akatela Mose ati:

²Kuteli asi Isariyele ntu wati: Naka usi Isariyele kana ongendangenda wudjashi lʼatei anyu ayukimo onʼandi omotshi le Moleka, ndi ayudiakema; asi wudja kawuwuki ave.

³Ndu dimi layendana la untu ako, layuwunya uma lʼatei a wudja awo, ne dia ndi ambukimo onʼandi omotshi le Moleka, ambete etemwelo kami mindu, ndu ambulanya lukumbu lami lʼekila.

⁴Naka akanga a wudja wayunya ashu awo le untu ako, lamʼakimondi onʼandi omotshi le Moleka, ku hawudiaki,

⁵dimi layendana lʼuntu ako, ndu la khumbu kandi. Dimi layuwunya, ndi la wane tshe watotemolaka la ndi Moleka uma lʼatei a wudja awo.

⁶Naka untu ayukadimo le wane watoteketshaka djimu kana le akanga wʼaloho dia ndjala kame la wo lʼotemwelo, dimi layendana lʼuntu ako, layuwunya uma lʼatei a wudja awo.

⁷Okone nyuyakidia, nyuyali ekila, ne dia dimi keli Latuyalaka, Unyashungu anyu.

⁸Nyulamaki elembe ami, nyetshaki. Dimi keli Latuyaiaka, latunyukidiaka.

⁹Pundju, one layudja shi kana nyangu mananu, kadiakemi.[56] One lakadji shi kana nyangu mananu, dikila diandi diayuyala lʼote andi.

¹⁰Naka pami ayunana la wadi a unyandi, ndu umunanyi a pami ndu umunanyi a umuntu wayudiakema[57]

¹¹Untu letama la wadi a shi, ambufula utakataka wa shi. Vo ahendi wayudiakema, dikila diawo diayuyala lʼete awo.[58]

¹²Naka untu ambetama ia olokai andi, mete vo ahendi wayudiakema. Vo wambutsha dikambu dia sonyi, dikila diawo diayuyala lʼete awo.[59]

¹³Naka pami ayeyana la unyandi pami, uku atuweyanaka la umuntu, vo ahendi wambutsha dikambu dia wononyi. Vo wayudiakema, dikila diawo diayuyala lʼete awo.[60]

¹⁴Naka pami ayutshuka wadi, ku ndi ntshuka ndu nyangu wadendi, dikambu so dieko kolo. Kanyatshumbi ndi la wo lu dja, ne dia akambu wa kolo watukuyala lʼatei anyu.[61]

¹⁵Naka untu ambetama la nyama, ndi ayudiakema; kanyudiaki ndu nyama kako.

¹⁶Naka umuntu ayusukana le nyama dia mbetama la to, kanyudiaki ndu umuntu ndu nyama. Vo ahendi wayudiakema; dikila diawo diayuyala lʼete awo.[62]

¹⁷Naka untu ambosa kadiyendi, lusangi la ndi shi kana lusangi la ndi utema, ku ndi ambena utakataka a kadiyendi, ndu kadiyendi ambena utakataka andi, dikambu so dieko sonyi. Vo wayunyema uma lu ashu wʼasi wudja awo. Ndi ambufula utakataka wa kadiyendi, ndi ayemba wutshu wa kolo kandi.[63]

¹⁸Naka pami ambetama la umuntu lamʼendi la kandji kandi, ndu ambufula utakataka andi, ndu ambete ekelelo kandi utakataka, ndu umuntu ako ambufula ekelelo ka dikila diandi, vo ahendi wayunyema uma lʼatei a wudja awo.[64]

¹⁹Tufulaki utakataka wa nyokadi kana wa shokadi, ne dia oso eli mbete untu luleki mbuto la ye utakataka. Vo wayemba wutshu wa kolo kawo.

²⁰Naka untu ambetama la wadi a onangu umbutshi andi, keti ndi ambena utakataka wa onangu umbutshi andi. Vo wayemba wutshu wa kolo kawo, wayuvo dikumba.[65]

²¹Naka untu ambosa wadi a onangu, dikambu so dieko mindu. Ndi ambufula utakataka wa onangu, vo wayuvo dikumba. [66]

²²Kanyulamaki elembe ami tshe la adjangu ami tshe, ndu kanyatshaki, ne dia kete, lene atamanyolombola dia nyu ntudjase, yatukutunyutuwo.

²³Tanyuyelaki ditshelu dia wedja watamatshanya la ntundu kanyu, ne dia vo wakatshaka akambu aso tshe. Diako mbakawayala wononyi le mi.

²⁴Keli dimi lakanyutela nti: Nyu nyayukita kete yawo; dimi layunyushayo dia nyu yikita, kete yuludi too lʼawele la usanga. Dimi keli Latuyalaka, Unyashungu anyu, lakanyumamitula uma le wedja.

²⁵Okone kanyutshikitanyaki nyama ya pudipudi la yaha pudipudi, fudu yaha pudipudi la ya pudipudi. Tanyuyaeteki wononyi dikambu dia nyama, fudu, kana ekendakenda tslie kayakutula ka la kete; kakamanya uma le nyu nti: To keko mindu.

²⁶Nyuyali ekila le mi, ne dia dimi Latuyalaka leko ekila, ndu lakanyumamitula uma le wedja, dia nyu ndjala wami.

²⁷Pami kana umuntu latoteketshaka djimu kana leli kanga aloho, ayudiakema. Kawuwauki ave; dikila diawo kadiuyali lʼete awo.