Read tetala Akambu wʼAsi Lewi 21 Bible Online

Akambu wʼAsi Lewi 21 - tetala bible

Akambu wʼAsi Lewi 21

¹Latuyalaka akatela Mose ati: Otekete la elombedi, ana apami wa Arona, uwateli wati: Olombedi tayaeteki mindu lʼudu wʼusi wudja awo,

²tshikima lʼudu wa one luleki mbuto la ndi, nyangu lakawuti, shi lakawuti, onʼandi a pami, onʼandi a umuntu, kana onangu lakuto la ndi.

³Ntu ndi mbeyaka ndjaete mindu lʼudu wa kadiyendi lʼemuma (laha la umi, lu dikambu diandi kukindi ndjasanya la mindu).

⁴Ndi tayeteki mindu uku utshukami lʼatei a wudja awo, dia ndjasuwula.

⁵Elombedi tawunyaki aketo lʼete awo kuyanga nkolonga ndedu yawo, kana ndjakota puta lʼalimba.[67]

⁶Kawuyali ekila le Unyashungu awo, tawusuwulaki lukumbu landi, ne dia vo watulambulaka elambu wa nambula lu dja le Latuyalaka, ma dia Unyashungu awo. Okone kawuyali ekila.

⁷Elombedi tawutshukaki umuntu kanga luseka kana lakaweyana la ndi la wulu, kuyanga ntshuka umuntu lakasekama le umendi, ne dia olombedi eli ekila le Unyashungu andi.

⁸Kûkidia, ne dia ndi katulambulaka ma dia Unyashungu anyu. Ndi ayali ekila le ye, ne dia dimi Latuyalaka, latunyukidiaka, leko ekila.

⁹Naka ona umuntu a olombedi tshe ambuyasuwula lu akambu wa luseka, keti ndi ambusuwula shi. Ndi katshumbami lu dja.

¹⁰Olombedi leli ladiku diʼasikandi, lakatamela iso kʼekitelu lʼote ndu lakakidiama dia ndota eloto, tatshikaki divu diandi esakalaka kuyanga mbatshatsha ahondo andi.

¹¹Ndi tasukanaki lʼudu wʼuntu kuyanga ndjaete mindu lu dikambu dia shi kana dia nyangu.

¹²Ndi tatumbaki uma lʼetemwelo, kuyanga nsuwula etemwelo ka Unyashungu andi, ne dia ekidielu kʼiso kʼekitelu ka Unyashungu andi keko ladiku diandi. Dimi keli Latuyalaka.

¹³Ndi katshuki umuntu leki emuma.

¹⁴Ndi tatshukaki wadi aki udu kana umuntu losekiwo, kana umuntu lakaweyana la ndi la wulu, kana kanga luseka. Keli ndi katshuki umuntu lʼemuma uma lʼatei a wudja awo hita,

¹⁵diaha ndi nsuwula anʼandi lʼatei a wudja awo, ne dia dimi keli Latuyalaka, lambukidia.

¹⁶Latuyalaka akatela Mose ati:

¹⁷Uteli Arona wati: Untu tshe uma lu diuhu diaye lu lolonga la lolonga leli la ekomo, tasukanaki dia nambula ma dia Unyashungu andi.

¹⁸Untu tshe leli la ekomo, tasukanaki: kanga tshungu, kanga etshumbi, kanga ekomo lʼelundji, kanga eyu kemotshi kuleki utali,

¹⁹one lamboko lukulu kana lunya,

²⁰kanga okongo dikutu, kana shekʼetange, kanga su diʼengondongondo, kanga lukunya, kanga akamba, kana kanga edika wa kundju wambumino.

²¹Usika pami tshe leli la ekomo lu diuhu diʼolombedi Arona, tasukanaki dia nambula elambu wa Latuyalaka wa nambula lu dja. Ndi eli kanga ekomo, okone ndi tasukanaki dia nambula ma dia Unyashungu andi.

²²Ndi mbeyaka nde ma dia Unyashungu andi: diango diuleki ekila ndu diango diʼekila.

²³Keli dikambu otoi, ndi tatshokaki lasuki la dihondo diʼatanyelu kuyanga nsukana lʼediakelu, ne dia ndi eko la ekomo, ndi atukusuwula temwelo diami; ne dia dimi keli Latuyalaka, latudikidiaka.

²⁴Osoku mbakatela Mose Arona la anʼandi wʼapami ndu asi Isariyele tshe.