Read tetala Akambu wʼAsi Lewi 22 Bible Online

Akambu wʼAsi Lewi 22 - tetala bible

Akambu wʼAsi Lewi 22

¹Latuyalaka akatela Mose ati:

²Uteli Arona la anʼandi wʼapami, wamo uma lu diango diʼekila diakakidia asi Isariyele dikambu diami, watukusuwula lukumbu lami lʼekila. Dimi keli Latuyalaka.

³Uwateli wati: Naka untu tshe lu diuhu diaye, lu lolonga la lolonga, ayusukana la diango diʼekila diakakidia asi Isariyele dikambu dia Latuyalaka lamʼendi mindu, untu ako ayunyema uma la ntundu kami. Dimi keli Latuyalaka.

⁴Untu tshe uma lu diuhu dia Arona leli la sudi kana ekelelo, talekaki diango diʼekila, tshikima ndi ambuyala pudipudi. Olembe one wayuyala ndu le one tshe layunanda untu lakasanyi lʼudu, le one layokosha alomi,

⁵le one layusakana la ekendakenda kayakutula, keya mbete mindu, ndu le one layunanda untu lakakitami engo ka mindu, keya mbfete mindu.

⁶Untu layunanda diango so, ayuyala mindu edja ndu dikolo. Ndi talekaki diango diʼekila, tshikima ndi amboka.

⁷Lamʼayudja unya, ndi ayuyala pudipudi. Lʼokongo diku ku ndi ndjole diango diʼekila, ne dia oso eli ma diandi.

⁸Ndi talekaki nyama kambuvo usina, kana kakandami le nyama, ndi atukuyaete mindu. Dimi keli Latuyalaka.

⁹Okone vo kawulamaki okende ami, ne dia watukemba kolo dikambu diawo, ndu watukuvo lamʼusuwulawo. Dimi keli Latuyalaka, lambakidia.

¹⁰Ongendangenda talekaki engo kʼekila. Ongendangenda wudjashi laka olombedi, kana usi ulimu, talekaki engo kʼekila.

¹¹Keli naka olombedi ambusu-mba fumbi la falanga, fumbi kako mbeyaka dile: ndu wane wambuto lu luudu landi mbeyaka nde ma diandi.

¹²Nakaona olombedi ayutshukama la ongendangenda, ndi talekaki ulambu wa lediedia lʼatei a diango diʼekila.

¹³Keli naka ona olombedi aya wadi aki udu, kana osekami, la ndi kema la ona, ndu ndi ambukalula lu luudu la shi uku akindi lu nshi yʼusekaseka, ndi mbeyaka nde ma diako dia shi. Keli ongendangenda tadilekaki.

¹⁴Naka untu ayole engo kʼekila lamʼahandeyi, ndi kafuti olombedi ushinga ato ndu etenyi otoi ka tanu ladiku.

¹⁵Elombedi tawusuwulaki diango diʼekila diatukimoka asi Isariyele le Latuyalaka,

¹⁶watukukaluya wutshu wa kolo le wo lamʼalewo diango diawo diʼekila. Dimi keli Latuyalaka, latakidiaka.

¹⁷Latuyalaka akatela Mose ati:

¹⁸Uteli Arona, la anʼandi wʼapami, lʼasi Isariyele tshe wati: Usi Isariyele tshe kana ongendangenda lʼatei anyu layulanga nambula Latuyalaka ulambu wa lutshumba: ulambu wa nkutsha daka kana ulambu wa nkimo uku lulangu,

¹⁹ndi kakimo nyama kʼumi kaha la ekomo uma lʼatei wa ngombe, wʼekoko kana wa mbudi, dia ulambu andi nungwama.

²⁰Keli tanyulambulaki nyama keli la ekomo, ne dia to hakiulungwama dikambu dianyu.[68]

²¹Untu tshe layukimo ngombe, okoko, kana mbudi dia nambula Latuyalaka ulambu wa ki dia nkutsha daka, kana ulambu wa nkimo uku lulangu, kasonole nyama ka dimena kaha la ekomo, dia to nungwama.

²²Tanyulambulaki Latuyalaka nyama ka tshungu, kamboko lukulu, kambuhumo puta, keli la edada, keli la lukunya kana keli la kaya. Tanyuyilambulaki Latuyalaka kuyanga ndjete ulambu wa nambula lu dja lʼediakelu le Latuyalaka.

²³Nyu mbeyaka nambula ngombe kana osongo wʼokoko weli la lukulu lomotshi luleki utali kana mundu ulambu wa nkimo uku lulangu, keli to hakieyi nungwama uku ulambu wa nkutsha daka.

²⁴Tanyulambulaki Latuyalaka nyama keli la edika wa khundju wambuminomino, wambatshatshema, wambuhatwama kana wambuhimbwama lu kete yanyu.

²⁵Tanyulungulaki nyama ya wuhu oso uma le angendangenda, dia ndjilambula uku ma dia Unyashungu anyu. Yo yeko la dikomo, ne dia alimba ayo kema kukeli. Hayulungwama dikambu dianyu.

²⁶Latuyalaka akatela Mose ati:

²⁷Lamʼayuto ngombe, okoko, kana mbudi, to katshikali nshi esambeli kame la nyangu. Ku umaka lushi lʼenanei, to mbeyaka nungwama ulambu wa nambula lu dja le Latuyalaka.

²⁸Naka eko wali wa ngombe kana wʼokoko, tanyudiakaki kame la yana yawo lushi otoi.

²⁹Lamʼayunyulambula Latuyalaka ulambu wʼeukelu ka lusaka, kanyulambuli wubu wukuki nungwama.

³⁰Kanyuli lushi lako, etenyi kato tatshikalaki edja ndu la pindju. Dimi keli Latuyalaka.

³¹Kanyulamaki elembe ami, kanye-tshaki. Dimi keli Latuyalaka.

³²Tanyu-suwulaki lukumbu lami lʼekila, keli dimi layuyakidia lʼatei wʼasi Isariyele. Dimi keli Latuyalaka, latunyukidiaka,

³³laka-nyutundja uma lu kete ya Edjibitu dia ndjala Unyashungu anyu. Dimi keli Latuyalaka.