Read tetala Akambu wʼAsi Lewi 23 Bible Online

Akambu wʼAsi Lewi 23 - tetala bible

Akambu wʼAsi Lewi 23

¹Latuyalaka akatela Mose ati:

²Uteli asi Isariyele wati: Nshi ya waki ya Latuyalaka yayunyudianganyaka lukumu uku sanganya yʼekila, nshi yami ya waki mbeyo.

³Kanyukambaki ulimu nshi shamalu, keli lushi lʼesambeli, leli lushi lʼekila la mumuya ka lukumu, lusanganya lʼekila. Tanyutshaki ulimu;[69] oso eli lushi lʼekila la Latuyalaka lu adjaselu anyu tshe.

⁴One eli nshi ya waki ya Latuyalaka, sanganya yʼekila, yayunyudianganyaka lukumu lu tena diayo.

⁵Elekanelu ka Latuyalaka, kayuyalaka la dikolo dia lushi la dikumi lʼanei la ngondo ka ntundu.[70]

⁶Ku dambu dia ma diaha la edya[71] dia nemia Latuyalaka, diayuyala lushi la dikumi lʼatanu lu ngondo kako. Kanyolekaki ma diaha la edya yediko ya nshi esambeli.

⁷Lu lushi la ntundu kanyuyalaki la lusanganya lʼekila, tanyutshaki ulimu.

⁸Kanyulambulaki ulambu wa nambula lu dja le Latuyalaka nshi esambeli. Lu lushi lʼesambeli ayuyalaka lusanganya lʼekila, tanyutshaki ulimu.

⁹Latuyalaka akatela Mose ati:

¹⁰Uteli asi Isariyele wati: Lamʼayunyukuma lu kete yamumunyusha, ndu lamʼayunyuna dinela diayo, kanyelaki ekanda kʼolonga ka dinela dianyu le olombedi.

¹¹Ku ndi ayetshetsha ekanda kako la ntundu ka Latuyalaka, dia to nungwama dikambu dianyu. Wedi a pindju wa lushi lʼekila mbayukietshetsha olombedi.

¹²Lushi layunyetshetsha ekanda kako, kanyulambulaki osongo wʼokoko wa eleku otoi, waha la ekomo, ulambu wa lutshumba le Latuyalaka.

¹³Ndu ulambu a shima kame la wo, wayuyala wa tenyi pendi dladikumi dia efa ka shima ka pudipudi kosohanyimi la iso, dia ndjala ulambu wa nambula iu dja le Latuyalaka, diowo dia ngenyangenya; ndu ulambu wa dinono kame la wo wayuyala wa wanu, etenyi otoi ka nei ka hina.

¹⁴Tanyolekaki ma kana diango dia lufumba kana diʼeyuyu, edja ndu lushi lako layunyela Unyashungu anyu ulambu. Oso eli olembe wa pundju lu lolonga la lolonga lu adjaselu anyu tshe.

¹⁵Umaka wedi a pindju wa lushi lʼekila, lushi layunyukimo ekanda ka letshetsha, kanyali bingu esambeli yʼetundu.

¹⁶Kanyali nshi akumi atanu edja ndu wedi a pindju wa lushi lʼekila lʼesambeli. Ku nyu ndjukimo ulambu wa shima wa tongo yʼeyuyu le Latuyalaka.

¹⁷Kanyela ekama ehendi wa ma dia ndjetshetsha uma lu mvudu yanyu, wakatshama uma lu tenyi pendi dia dikumi dia efa, dia vo ndjetshetshama. Vo ka-wuyali wa shima ka pudipudi, kawukatemi la edya, dia vo ndjala olonga le Latuyalaka.

¹⁸Kanyulambuli esongo wʼekoko esambeli wa eleku otoi, waha la ekomo, osongo a ngombe la ekoko a waumi ehendi. Vo wayuyala ulambu wa lutshumba le Latuyalaka, kame la ulambu awo wa shima ndu la elambu awo wa dinono, ulambu wa nambula lu dja, weli la diowo dia ngenyangenya Latuyalaka.

¹⁹Kanyulambuli mbudi kʼumi ulambu wa kolo, la esongo wʼekoko ehendi a waumi wʼeleku otoi ne dia elambu wa ki.

²⁰Ku olombedi ayetshetsha elambu ako kame la ma diʼolonga uku ulambu wa letshetsha la ntundu ka Latuyalaka, kame la esongo ehendi wʼekoko. Vo wayuyala ekila le Latuyalaka ne dia olombedi.

²¹Lu lushi lako, kanyudianganya lukumu. Nyu nyayuyala la lusanganya lʼekila; tanyukambaki ulimu uku fumbi. Oso eli olembe wa pundju le nyu lu adjaselu anyu tshe lu lolonga la lolonga. [72]

²²Lamʼayunyuyalaka la dinela lu kete yanyu, tanyunaki dikambo dianyu lu atshuku adio tshe, kuyanga nkodiakodia lʼokongo a dinela dianyu. Kanyutaditshikelaka asi wula la angendangenda. Dimi keli Latuyalaka, Unyashungu anyu.[73]

²³Latuyalaka akatela Mose ati:

²⁴Uteli asi Isaiiyele wati: Lu ngondo kʼesambeli, lu lushi lato la ntundu, kanyuyalaki la lushi la mumuya ka lukumu, euhwelu kʼedelu ka pungi, lusanganya lʼekila.

²⁵Tanyukambaki ulimu uku fumbi lushi lako, keli kanyulambulaki elambu wa nambula lu dja le Latuyalaka.

²⁶Latuyalaka akatela Mose ati:

²⁷Lushi la dikumi la ngondo kʼesambeli, layuyalaka lushi lʼekesanelu.[74] Lo layuyala etena ka lusanganya lʼekila le nyu, kanyuyasuyaki, kanyulambulaki elambu wa nambula lu dja le Latuyalaka.

²⁸Tanyutshaki ulimu lushi lako, ne dia lo leli lushi lʼekesanelu, dia nyutungela ekesanelu la ntundu ka Latuyalaka, Unyashungu anyu.

²⁹Untu tshe lahuyasuya lushi lako, ayunyema uma lu wudja awo.

³⁰Untu tshe layutsha ulimu omotshi lu lushi lako loso, dimi layulanya untu ako lʼatei a wudja awo.

³¹Tanyutshaki ulimu. Oso eli olembe wa pundju lu lolonga la lolonga lu adjaselu anyu tshe.

³²Oso ayuyala lushi lʼekila la mumuya ka lukumu le nyu, kanyuyasuyaki. Lu lushi la divwa la ngondo la dikolo, umaka dikolo edja ndu dikolo dikina, kanyulamaki lushi lanyu lʼekila.

³³Latuyalaka akatela Mose ati:

³⁴Uteli asi Isariyele wati: Lu lushi la dikumi lʼatanu, la ngondo kʼesambeli, mbayuyalaka dambu dia tutumbutumbu[75] nshi esambeli le Latuyalaka.

³⁵Lu lushi la ntundu la dambu, kanyuyalaki la lusanganya lʼekila. Tanyutshaki ulimu uku fumbi.

³⁶Kanyulambulaki elambu wa nambula lu dja le Latuyalaka nshi esambeli. Lu lushi lʼenanei, kanyuyalaki la lusanganya lʼekila, ndu kanyulambulaki ulambu wa nambula lu dja le Latuyalaka. Oso eli lusanganya la lukumu, tanyutshaki ulimu uku fumbi.

³⁷Nshi ya waki ya Latuyalaka nye, yayunyudianganyaka lukumu uku tena dia lusanganya lʼekila, dia nambulaka Latuyalaka elambu wa nambula lu dja, elambu wa lutshumba la wa shima, elambu wa nyama la wa dinono. Ulambu lʼulambu ayuyalaka la lushi lawo hita.

³⁸Elambu ako wayuyalaka ladiku dia nshi yʼekila ya Latuyalaka, ladiku dia eshasha anyu, ladiku dia elambu anyu tshe wa nshidiya daka, ndu ladiku diʼelambu anyu tshe wa lulangu, watunyukimoka le Latuyalaka.

³⁹Okone lushi la dikumi lʼatanu lu ngondo kʼesambeli, lamʼayunyushidiyaka nsanganya elua wa lu wudja, kanyulamaki lushi la wuki la Latuyalaka nshi esambeli.[76] Lushi la ntundu, layuyalaka lushi la mumuya ka lukumu; ndu lushi lʼenanei, layuyalaka lushi la mumuya ka lukumu.

⁴⁰Lu lushi la ntundu, kanyosaki elua wʼetamba wʼamena, wanga wʼatuku, avundja wʼetamba wa pukaa ndu wʼeduwula wa lʼashi; kanyongenangenaki nshi esambeli la ntundu ka Latuyalaka.

⁴¹Kanyululamaki uku lushi la wuki la Latuyalaka nshi esambeli lʼeleku. Oso eli olembe wa pundju le nyu lu lolonga la lolonga. Kanyululamaki lu ngondo kʼesambeli.

⁴²Kanyudjaseki lu tutumbutumbu nshi esambeli. Asi Isariyele tshe wa luta wayudjaseka lu tutumbutumbu tako;

⁴³dia nonga yanyu mbeya vati: Dimi kakadjashaka asi Isariyele lu tutumbutumbu lamʼakamatundja uma lu kete ya Edjibitu. Dimi keli Latuyalaka, Unyashungu anyu.

⁴⁴Osoku mbakatela Mose asi Isariyele nshi ya waki ya Latuyalaka.