Read tetala Akambu wʼAsi Lewi 24 Bible Online

Akambu wʼAsi Lewi 24 - tetala bible

Akambu wʼAsi Lewi 24

¹Latuyalaka akatela Mose ati:

²Kudjangeli asi Isariyele dia vo nkelaka iso ka mbeli tshu, dia mbidjaka lu tala, dia usasi mpetaka tena tshe.

³Lu luudu lʼesanganelu la dipema, lʼandja a dihondo diʼatanyelu dieli la ntundu kʼomenyi, kayulamaka Arona usasi ako, dia vo mpetaka tena tshe la ntundu ka Latuyalaka umaka dikolo edja ndu pindju. Oso eli olembe wa pundju le nyu lu lolonga la lolonga.

⁴Ndi ayolongaka atala lu ekitshelu kawo ka paunyi ketu dia vo mpetaka tena tshe la ntundu ka Latuyalaka.

⁵Kose shima ka pudipudi, kukifumbi ekama dikumi la ehendi, ukama Iʼukama kawutshami uma lu tenyi pendi dia dikumi dia efa.

⁶Kelonge lʼenongo ehendi; esamalu lʼonongo lʼonongo, lu mesa wa paunyi ketu la ntundu ka Latuyalaka.[77]

⁷Kuteli tsho lʼonongo lʼonongo, dia vo ntsho kame la ma uku etenyi kʼeuhwelu, dia nambwema lu dja le Latuyalaka.

⁸Lushi tshe lʼekila, Arona kakilongaki la ntundu ka Latuyalaka tena tshe lu lukumbu lʼasi Isariyele, uku sheki ya pundju.

⁹To kayuyalaka kʼArona la anʼandi wʼapami.[78] Vo wayukilekaka lu dihuli diʼekila, ne dia lʼatei wʼelambu wa nambula lu dja le Latuyalaka, etenyi kako kuleki ekila dikambu diandi, olembe wa pundju.

¹⁰Ona pami omotshi lakuti umuntu usi Isariyele la pami kʼusi Edjibitu akengola lʼatei wʼasi Isariyele, ku onʼako akalo la usi Isariyele omotshi ta lu pangu.

¹¹Ona pami lakuti umuntu usi Isariyele akatenge Lukumbu, akadji mananu. Ku vo wakayi la ndi la ntundu ka Mose. Nyangu aki Shelomita, onʼa Dibiri, uma lu diuhu dia Dane.

¹²Ku vo wakawudji lu lukanu, edja ndu Latuyalaka ambuwatela lulangu landi.

¹³Ku Latuyalaka akatela Mose ati:

¹⁴Nyutundja one lakadji mananu lʼandja a pangu. Antu tshe wakawuki wawahe anya lʼote, ku ului tshe wayuwuka ave.

¹⁵Uteli asi Isariyele wati: Untu tshe ladja Unyashungu andi mananu, ayemba wutshu wa kolo kandi ndame.

¹⁶Untu tshe latenga lukumbu la Latuyalaka, ayudiakema: ului tshe wayuwuka ave. Ongendangenda kana ona luta layotenga Lukumbu, ayudiakema.

¹⁷One ladiaka untu, ayudiakema.[79]

¹⁸One ladiaka nyama, kakisombole: lumu lu lumu.

¹⁹Lamʼete untu unyandi la ekomo, kawutsheli uku akandatshi:

²⁰eokwelo lu eokwelo, su lu su, la nu lu nu.[80] Uku akandete untu la ekomo, mbayuwuwete ndu ndi.

²¹One ladiaka nyama, ayukisombola. Keli one ladiaka untu, ayudiakema.

²²Nyu nyayuyala la olembe otoi le ongendangenda ndu le ona luta,[81] ne dia dimi keli Latuyalaka, Unyashungu anyu.

²³Mose akateketa la asi Isariyele. Ku vo wakatundja one lakadji mananu uma lu pangu, wakatuwuka ave. Okone asi Isariyele wakatshi uku akadjangela Latuyalaka Mose.