Read tetala Akambu wʼAsi Lewi 25 Bible Online

Akambu wʼAsi Lewi 25 - tetala bible

Akambu wʼAsi Lewi 25

¹Latuyalaka akatela Mose lʼUkungu a Sinai ati:

²Uteli asi Isariyele wati: Lamʼayunyukuma lu kete yamumunyusha, kete yayuyalaka la eleku ka mumuya le Latuyalaka.

³Deku samalu mbayunyuneka wehu lu dikambu dianyu, deku samalu mbayunyukandjulaka dikambo dianyu diʼelua, ndu mbayunyusanganyaka elua adio.

⁴Keli lu eleku kʼesambeli, ayuyala eleku ka mumuya, ka mumuya ka ki dikambu dia kete, mumuya le Latuyalaka. Tanyuneki wehu lu dikambo dianyu kuyanga kandjula dikambo dianyu diʼelua.

⁵Tanyunaki diango diayutumba uma lu tongo yakako lamʼakanyatanaka, tanyumbaki elua wa lu dikambu dianyu diakinyu kunkandjula. Oso ayuyala eleku ka mumuya ka ki.

⁶Diango diayutumba utumbatumba lʼeleku ka mumuya, diayuyala ma dianyu la diʼekambi anyu wʼapami ndu dia ekambi anyu wʼamantu, asi ulimu anyu, la angendangenda wudjashi kame la nyu;

⁷ndu dia dungalunga la nyama yatuyalaka lu kete yanyu. Diango diako tshe diayutundja kete utundjatundja diayuyala ma.[82]

⁸Kanyalaki bingu esambeli ya deku, esambeli tena deku esambeli; dia etena ka bingu esambeli ya deku ndjala le nyu deku akumi anei la divwa.

⁹Kanyudi amama wulu lushi la dikumi la ngondo kʼesambeli. Lu lushi lʼekesanelu, kanyudi amama lu kete kanyu tshe.

¹⁰Ku nyayukidia eleku kʼakumi atanu. Kanyudianganya lukumu la ndjadjasela lu kete le antu tshe wudjashi loko. Oso ayuyala ongenongeno le nyu, lamʼayunyukalula untu lʼuntu lu diango diandi, ndu lamʼayunyukalula untu lʼuntu lu khumbu kandi.

¹¹Eleku kʼakumi atanu, ayuyala eleku kʼongenongeno le nyu. Tanyuneki kuyanga muna diango diakatumbi diame lu dikambo dianyu. Tanyusanganyaki sandji diʼelua wakinyu kunkandjula,

¹²ne dia oso eli eleku kʼongenongeno, to kayuyala ekila le nyu. Nyu nyayolekaka diango diatumba uma lu dikambo dianyu.

¹³Lʼeleku kako kʼongenongeno, untu lʼuntu ayukalula lu diango diandi.

¹⁴Naka we ambusundja engo le unyaye, kana nsumba uma le unyaye, tanyukesanaki.

¹⁵Lamʼayuyusumba kete uma le unyaye, kali la ndi efula ka deku kambeta umaka eleku kʼongenongeno. Ku ndi ayukusundjayo lʼushinga wʼefula ka deku dia dinela kambutshikala.

¹⁶Naka deku dieki efula, we ayudiya ushinga. Ku naka deku diambutshikala tshitshe, kukitshakitsha ushinga. Ndi ayukusundjayo uku efula ka deku dia dinela.

¹⁷Tanyukesanaki, keli nyukaki Unyashungu anyu woma. Dimi keli Latuyalaka, Unyashungu anyu.

¹⁸Kanyutshaki elembe ami, kanyulamaki adjangu ami, ndu kanyatshaki. Ku nyu nyayudjase la lutui tshitshi la kete.

¹⁹Kete yayongonyaka diango, ku nyu nyayolekaka, nyayulutaka, nyayudjase la lutui tshitshi.

²⁰Nyu nyayuyambula nyati: Naka hatune la hatuna lʼeleku kʼesambeli, kayutole na?

²¹Dimi layunyotshokola lʼeleku ka samalu, dia kete ngonya diango diayukuka yediko ya deku satu.

²²Kanyune wehu lʼeleku kʼenanei, ku nyu nyayolekaka tshikatsha. Edja ndu lʼeleku ka divwa lamʼayunyuyala la dinela diʼuyuyu, nyu nyayolekaka tshikatsha.

²³Kete hayusundjamaka pundju, ne dia yami mbeyo. Nyu nyeli angendangenda la asi lokendo lu ashu ami.

²⁴Lu kete tshe yayunyuyala akanga ayo, kanyushikike olembe wʼetshungwelu kayo.

²⁵Naka onanyo ambuyala wula, la ambusundja etshi kandi ka kete, one luto la ndi katshunguli kene kakasundja onangu.

²⁶Naka untu kema la one leya nkitshungula, keli naka ndi ndame ambuyuyala kanga ongonyi lʼokongo a deku dimotshi, ndu ambeya nkitshungula,

²⁷ndi ayala deku diambeta umaka lamʼakandakisundja, ku ndi ayukaluya ushinga wa deku diambutshikala le untu lakandakisundja. Ku ndi ayukalula lu etshi kandi ka kete.

²⁸Naka ndi kema la diango dia nkitshungula, to kayutshikala lʼanya wa untu lakakisumbi edja ndu Iʼeleku kʼonge-nongeno. Ku lʼeleku kako kʼongenongeno, to kayukalula le kangato.

²⁹Naka untu ayusundja luudu landi ludjashindi lʼusumba wudingami la lukumbu, ndi ayuyala la wulu wa lutshungula ntundu kʼeleku otoi atashili uma lʼetena kakandalusundja. Ne dia la ntundu kʼeleku otoi atashili, ndi mbeyaka lutshungula.

³⁰Naka luudu lako lakahikama lʼusumba wudingami la lukumbu, halutshungwami la ntundu kʼeleku otoi atashili, one lakalusimbi ayuyala kangalo pundju, ndi la tukanula tandi. Lo haleyi mumo lʼanya andi ntu, kuyanga lʼeleku kʼongenongeno.

³¹Keli mvudu ya lu ngelu yahadingami la lukumbu yayalema kame la dikambo, yo mbeyaka ntshungwama kana nkalula le akanga ayo lʼeleku kʼongenongeno.

³²Keli lu esumba wʼasi Lewi, asi Lewi mbeyaka ntshungula mvudu yeli lu esumba wa sangu diawo tena tshe.

³³Naka usi Lewi hatshungula luudu lʼusumba awo lakandasundja, lo layukalula le ndi lʼeleku kʼongenongeno, ne dia mvudu ya lu usumba wʼasi Lewi yeli sangu diawo lʼatei wʼasi Isariyele.

³⁴Keli dikambo dia lʼetshimba wʼesumba awo hadieyi nsundjama, ne dia dio dieli sangu diawo dia pundju.

³⁵Naka onanyo ambuyala usi wula, la ndi hayeya ndjakimanyia lasuki la ye, kukimanyia. Kutshelaki uku ongendangenda wudjashi lu wudja anyu, dia ndi mbidjase kame la ye.[83]

³⁶Tulungamelaki osombelo kana waho uma le ndi, keli ukaki Unyashungu aye woma, dia onanyo mbidjase la ye.

³⁷Tosondjaki falanga dia nkundja kokʼa sombo,[84] kuyanga mbusha ma lʼelungamelu ka waho.

³⁸Dimi keli Latuyalaka, Unyashungu anyu, lakanyutundja uma lu kete ya Edjibitu, dia nyusha kete ya Kanana, ndu dia ndjala Unyashungu anyu.

³⁹Naka onanyo ambuyala usi wula lasuki la ye, la ambuyasundja le ye, tukambiaki ulimu uku fumbi.

⁴⁰Ndi ayuyala lasuki la ye uku umundji wʼulimu, ndu uku ongendangenda. Ndi ayukambaka ia ye edja ndu lʼeleku kʼongenongeno.

⁴¹Ku etena kako ndi ayumo uma le ye, ndi la anʼandi. Ndi ayukalula utsha lu khumbu kandi hita, ndu ayukalula lʼukito wa shi.

⁴²Vo weli ekambi ami wakamatundja uma lu kete ya Edjibitu. Okone vo hawukuki nsundjama uku fumbi.

⁴³Tuwulelaki la wulu, keli ukaki Unyashungu aye woma.

⁴⁴Lu dikambu dia fumbi yaye yʼapami ndu yʼamantu yayuyala la ye, kusumbaki fumbi yʼapami la yʼamantu uma lu wedja weli lʼutshimba anyu.

⁴⁵Nyu mbeyaka nsumba ndu uma lʼatei wʼangendangenda wudjashi lʼatei anyu, ndu khumbu yawo yudjashi lʼatei anyu, wane wakuto lu kete yanyu. Vo mbeyaka ndjala ukundji anyu.

⁴⁶Nyu nyayatshikela anʼanyu ukito lʼokongo anyu, dia vo ndjala sangu diawo pundju. Kanyosaki fumbi uma lʼatei awo. Keli le anengenyu asi Isariyele, untu tulelaki onangu la wulu. [85]

⁴⁷Naka umbetshetshi kana ongendangenda ludjashi lakaye ambuyala kanga ongonyi, ku onanyo ludjashi lasuki la ndi ambuyala usi wula, ku ndi ambuyasundja le ongendangenda kana le usi khumbu ka ongendangenda ako,

⁴⁸ndi mbeyaka ntshungwama lʼokongo wa ndjasundja. Onangu omotshi mbeyaka mbutshungula.

⁴⁹Onangu umbutshi andi, kana onʼa onangu umbutshi andi, kuyanga untu ukina luto la ndi, mbeyaka mbutshungula. Naka ndi aya la diango, ndi mbeyaka ndjatshungula ndame.

⁵⁰Ndi ayala la one lakusumbi efula ka deku uma lʼeleku kakandayasundja edja ndu eleku kʼongenongeno. Ku ushinga wʼetshungwelu kandi wayuyala uku efula ka deku diakandûkambelaka. Dio diayalema uku deku diʼumundji wʼulimu.

⁵¹Naka deku efula diekiko, ndi ayufuta etshungwelu kandi uma lʼushinga wakandasumbama, lu yediko ya deku diambutshikala.

⁵²Naka deku tshitshe utsha lʼeleku kʼongenongeno, ndi kali la ndi deku; ndi kafuti etshungwelu kandi uma lu deku diakandûkambelaka.

⁵³Ndi kayalaki le ndi uku umundji wʼulimu lu eleku lʼeleku. Untu ako tawulelaki la wulu lu ashu aye.

⁵⁴Naka ndi kumbeya ndjatshungula lu weuhu eso, ndi ayutumba lʼeleku kʼongenongeno, ndi la anʼandi.

⁵⁵Ne dia asi Isariyele weli ekambi le mi, vo weko ekambi ami wakamatundja uma lu kete ya Edjibitu. Dimi keli Latuyalaka, Unyashungu anyu.