Read tetala Akambu wʼAsi Lewi 26 Bible Online

Akambu wʼAsi Lewi 26 - tetala bible

Akambu wʼAsi Lewi 26

¹Tanyuyatshelaki dikishi,[86] tanyuyaemelaki efanelu ka losela[87] kana luhingu, ndu tanyuyakitshiyaki nduku efanelu ka dive lu kete yanyu, dia nyu dikusela adui; ne dia dimi Latuyalaka, Unyashungu anyu.

²Kanyulamaki nshi yami ya mumuya, kanyolemiaki etemwelo kami. Dimi keli Latuyalaka.

³Naka nyu nyayokendakendaka lu elembe ami, nyayuyelaka adjangu ami ndu nyayatshaka,

⁴dimi layunyushaka mvula yanyu lu deku diayo. Kete yayongonyaka diango, ku etamba wa lu dikambo wayotokaka elua awo.

⁵Nyu nyayuyala lʼesuswelu kʼepunga edja ndu lu diela diʼelua. Diela diʼelua diayukuma pulu ndu lu diunelu, ku nyu nyayolekaka ma dianyu, nyayulutaka.[88] Nyayudjaseka la lutui tshitshi lu kete yanyu.

⁶Dimi layete wudja ki; nyu nyayulala djo, ku nduku untu layunyutsha woma. Dimi layushisha nyama ya ngala uma lu wudja, la yombo hayeta ntu lu kete yanyu.

⁷Nyu nyayutshanya atunyi anyu, ku vo wayoko la ntundu kanyu la tombo.

⁸Antu atanu uma lʼatei anyu wayutshanya atunyi anyu lukama, la lukama uma lʼatei anyu wayutshanya nunu dikumi, ku atunyi anyu wayoko la ntundu kanyu la tombo.

⁹Dimi layunyolemia, layunyete akanga a diwutshi, layunyufudia efula. Ku layushikike la nyu sheki yami.

¹⁰Nyu nyayolekaka tshikatsha, nyayutundja diango diʼedjedja dia ntshikela diango diʼeyuyu dihuli.

¹¹Dimi layete edjaselu kami lʼatei anyu, utema ami hunyuka wononyi.

¹²Dimi layokendakendaka lʼatei anyu. Layuyala Unyashungu anyu, la nyu nyayuyala wudja ami.[89]

¹³Dimi keli Latuyalaka, Unyashungu anyu, lakanyutundja uma lu kete ya Edjibitu, lakanyutshungula uma lu fumbi. Dimi lakatshatsha lokoho lanyu, lakanyokendjakendja esimboki.

¹⁴Keli naka nyu hanyumbukela, hanyukitanyia aui ami ane tshe,

¹⁵naka nyu nyayonyola elembe ami, ndu etema anyu wayuka adjangu ami wononyi, dia mpendula elembe ami la nanya sheki yami,

¹⁶dimi layunyutshela okone. Dimi layunyutumela woma wa mamba; wondju la dimba dja wayunyula ashu, wayulingiya etema anyu. Nyu nyayuneka wehu anyu wunune, ne dia atunyi anyu wayuwele.

¹⁷Dimi layendana la nyu, ku nyu nyayolembiama, la ntundu kʼatunyi anyu. Wane watunyuhetshaka wayunyulela, la nyu nyayulawo ulawolawo lamʼahanyutshanya nduku untu.

¹⁸Naka nyu hanyumbukela lʼokongo wʼakambu aso, dimi layunyusuya tena esambeli ntu ne dia kolo yanyu.

¹⁹Dimi layulanya utaku a wulu anyu, layete ulungu anyu uku luwuiu, la kete yanyu uku ohotela.

²⁰Nyayushisha wulu anyu anyanya, ne dia kete yanyu hayongonya mbu ya nde, la etamba wa la kete hawoto elua awo.

²¹Naka nyu nyayosemanela la mi, hanyulangi mbukelami, dimi layunyela asui ntu wuleki, tena esambeli uku kolo yanyu.

²²Dimi layunyutumela nyama ya lʼukunda, yako yayunyohotola anʼanyu, yayudiaka dungalunga dianyu, ndu yayunyete djui ya tshitshe. Ku mbuka yanyu yayutumba adiyu.

²³Naka asui ane hawunyukadimula uya le mi, keli nyu nyayutetemala nse-manela la mi,

²⁴ndu dimi layosemanela la nyu. Dimi dime layunyusuya tena esambeli ne dia kolo yanyu.

²⁵Dimi layuya le nyu la yombo, layosombweya sheki yami. Naka nyayomotshama kame lʼesumba anyu, ku dimi layunyutumela asui. Nyu nyayukimwama lu anya wʼutunyi.

²⁶Lamʼayumulanya engonelo ka mbu yanyu ya nde, amantu dikumi wayukate ma dianyu lu tshuka otoi, vo wayunyedikela ma dianyu lu tediko ta wetshu. Nyu nyayole, keli hanyuluta.

²⁷Naka nyu hanyumbukedi, nyambosemanela la mi lʼokongo wʼakambu aso,

²⁸ndu dimi layosemanela la nyu lʼududu, dime layunyusuya tena esambeli ntu ne dia kolo yanyu.

²⁹Nyu nyayole emunyi wa anʼanyu wʼapami, ndu nyayole emunyi wa anʼanyu wʼamantu.

³⁰Dimi layulanya alunga anyu, layuhandjula diakelu dianyu dia tsho. Layukadja edu anyu ladiku dia edu wa dikishi dianyu. Ku utema ami wayunyuka wononyi.

³¹Layete esumba anyu atongo atu, layulanya temwelo dianyu. Dimi halukutula luwi lʼaowo anyu wa ngenyangenya.

³²Dimi layulanya kete, ku atunyi anyu wudjashi loko wayamba dikambu diayo.

³³Dimi layunyudianganya lʼatei a wedja, layosomola yombo lʼokongo anyu. Kete yanyu yayulanyema, esumba anyu wayuyala atongo.

³⁴Kete yayongenangena nshi yayo ya mumuya etena tshe kayuyuyala hwe lamʼayunyuyala lu wudja wʼatunyi anyu. Kete yayumuya, yayongenangena nshiyayo ya mumuya.

³⁵Etena tshe kayuyuyala hwe, yo yayuyala la mumuya, mumuya kakiyo kundjalaka la to lu nshi yanyu ya mumuya lamʼakanyadjashi loko.

³⁶Layudja woma lʼetema a wane wayutshikala lʼokongo anyu lu kete ya atunyi awo. Lundju lʼesakanelu ka dikatshi mbeyaka mbalawuya. Vo wayulawo uku atuwulawoka yombo. Wayoko, ku nduku untu latawatshanya.

³⁷Vo wayuyakhumanelaka watako, uku antu watalawo yombo, ku nduku latawatshanya. Nyu hanyuyala la wulu wa memala la ntundu kʼatunyi anyu.

³⁸Nyu nyayulanyema lʼatei a wedja, ku kete yʼatunyi anyu yayunyole.

³⁹Wane wayutshikala uma lʼatei anyu, wayuyala la ulingulingu lu kete yʼatunyi anyu ne dia kolo yawo. Ndu ne dia kolo ya washewo, vo wayuyala la ulingulingu uku vo.

⁴⁰Keli naka vo wambushula kolo yawo ndu kolo ya washewo lu ehedia awo wakawampediaka, la osemanelu wakawasemanelaka la mi,

⁴¹wako wakamasemanela la wo, ndu wakamatole lu kete ya atunyi awo; naka etema awo wahatalongoswama wambuyakitshakitsha, ndu vo wambufuta usahu wa kolo yawo,

⁴²dimi layuhoka daka diami le Jakoba,[90] daka diami le Isaka,[91] daka diami le Abarahama;[92] dimi layuho ndu kete.

⁴³Keli vo wayutshika kete; yo yayongenangena nshi yayo ya mumuya lamʼambuyuyala hwe, aha la wo. Vo wayufuta usahu wa kolo yawo, ne dia vo wakonyola adjangu ami, ndu etema awo wakuki elembe ami wononyi.

⁴⁴Keli lu akambu aso tshe, lamʼambuwuyala lu kete yʼatunyi awo, dimi haluwakadja, haluwauka wononyi lu wuhu wa mbashila ushiki, ndu wa nanya daka diami le wo. Dimi keli Latuyalaka, Unyashungu awo.

⁴⁵Keli dimi layuho daka diakamalaki watshewo, wakamatundja uma lu kete ya Edjibitu lu ashu a wedja, dia dimi ndjala Unyashungu awo. Dimi keli Latuyalaka.

⁴⁶Oso eli aui, adjangu, la elembe wakadji Latuyalaka lʼasandi la asi Isariyele lʼUkungu a Sinai, uma le Mose.