Read tetala Akambu wʼAsi Lewi 27 Bible Online

Akambu wʼAsi Lewi 27 - tetala bible

Akambu wʼAsi Lewi 27

¹Latuyalaka akatela Mose ati:

²Uteli asi Isariyele wati: Lamʼatshika untu daka dia wuhu omotshi diʼantu le Latuyalaka lu edikelu kaye,

³ku edikelu kaye kayuyala le pami, uma lu deku akumi ahendi pulu lu deku akumi asamalu toshekele akumi atanu ta fesa, wuhu wa lʼetemwelo.

⁴Naka untu eko umuntu, edikelu kaye kayali toshekele akumi asatu.

⁵Naka untu eki yediko ya deku tanu pulu ndu deku akumi ahendi, edikelu kaye kayali le pami, toshekele akumi ahendi; le umuntu toshekele dikumi.

⁶Naka untu eki yediko ya ngondo otoi pulu ndu deku tanu, edikelu kaye kayali le pami, toshekele ta fesa tutanu, ku le umuntu edikelu kaye kayali toshekele ta fesa tusatu.

⁷Naka untu aya la deku akumi asamalu pulu utsha ladiku, edikelu kaye kayali le pami, toshekele dikumi la tutanu; le umuntu, toshekele dikumi.

⁸Keli naka untu ambuleka wula efula dia nfuta edikelu kaye, ndi kayi la untu ako la ntundu kʼolombedi, ku olombedi ayuwudja ushinga. Uku akundjelu ka one lakalaki, mbayuwudja olombedi ushinga.

⁹Naka daka dieko dia wuhu wa nyama yatukimoka antu ulambu le Latuyalaka, nyama tshe ka wuhu ako kambukimo untu le Latuyalaka keko ekila.

¹⁰Tawukiengulaki, kana mbidja kʼololo lu dihuli dia ka kolo, kana ka kolo lu dihuli dia kʼololo. Naka ndi ayengula nyama kemotshi lu dihuli dia kekina, ku yako hyendi, ndu to ndu kene kengudindi, yayuyala ekila.

¹¹Naka dio dieko dia wuhu wa nyama ka mindu kahawatulambulaka ulambu le Latuyalaka, untu kela nyama kako la ntundu kʼolombedi,

¹²ku olombedi ayukidja ushinga, kana kʼololo kana ka kolo keto. Uku ayuyukidja ushinga, we olombedi, mbayutuyala.

¹³Naka untu ayulanga nkitshungula, ndi kahe etenyi otoi ka tanu ladiku dia edikelu kaye.

¹⁴Lamʼakidia untu luudu landi dia lo ndjala ekila le Latuyalaka, olombedi ayuludja ushinga, kana ololo kana kolo kelo. Uku ayuludja olombedi ushinga, mbayuluyala.

¹⁵Naka one lambukidia luudu landi nangaka lutshungula, ndi kahe etenyi ka tanu ka edikelu lu falanga ladiku diato, ku lo layuyala landi.

¹⁶Naka untu ambukidia etshi kʼekambo ka lu sangu diandi le Latuyalaka, edikelu kaye kayuyala uku efula ka weuhu wayuwune loko, toshekele ta fesa akumi atanu lu homera otoi a wuhu wʼepunga.

¹⁷Naka ndi ambukidia ekambo kandi umaka eleku kʼongenongeno, to kayemala lu edikelu kaye.

¹⁸Keli naka ndi ambukidia ekambo kandi lʼokongo wʼeleku kʼongenongeno, olombedi kediki falanga yato uku efula ka deku diambutshikala edja ndu lʼeleku kʼongenongeno. Ku ekitshakitshelu kayuyala uma lu edikelu kaye.

¹⁹Naka one lambukidia ekambo nangaka nkitshungula, ndi kahe etenyi otoi ka tanu ka edikelu lu falanga ladiku diato, ku to kayuyala kandi.

²⁰Keli naka ndi halangi ntshungula ekambo, kana naka ndi akakisundja le untu ukina, ekambo kako hakieyi ntshungwama ntu.

²¹Keli ekambo, lamʼayutukimwama lu eleku kʼongenongeno, to kayuyala ekila le Latuyalaka uku ekambo kakakidiama, to kayuyala ekambo kʼolombedi.

²²Naka untu ambukidia ekambo kakandasumbi, kaha etshi ka lʼekambo kandi ka sangu, le Latuyalaka,

²³olombedi ayedika ushinga uma lʼedikelu kaye pulu ndu lʼeleku kʼongenongeno. Ku untu ako ayufuta efula kʼushinga wʼedikelu lushi lako, uku engo kʼekila le Latuyalaka.

²⁴Lu eleku kʼongenongeno, ekambo kayukalula le one lakatasumbama uma le ndi, le one lukanga etshi uku ekambo ka sangu.

²⁵Edikelu tshe kayuyalaka lu yediko ya lu shekele ya lʼetemwelo: ngera akumi ahendi, ku ndjala shekele otoi.

²⁶Tshikima yata kundu ya nyama, yako yeli ya Latuyalaka ne dia yo yeli yata kundu, mbaheyi untu nkidia: ngombe kana okoko, weli wa Latuyalaka.

²⁷Naka to keli nyama ka mindu, ndi ayukisumba ntu lu edikelu kaye, ku ndi ayahe etenyi ka tanu kʼushinga ladiku diato; kana naka to hakutshungwami, to kayusundjama lu edikelu kato.

²⁸Keli engo kakakidiama, kambuki-dia untu le Latuyalaka, uma lu diango dieli la ndi, untu kana ekambo kandi kakandasangula, hakieyi nsundjama kana ntshungwama. Engo tshe kakakidiama[93] keko ekila kuleki le Latuyalaka.

²⁹One lambukidiama, leli la dikambu dia ndjakema lʼatei wʼului wʼantu, heyi ntshungwama: dieli la ndi dia mvo.

³⁰Etenyi ka dikumi tshe ka kete, ka weuhu wa lu kete, kana ka elua wʼetamba, keli ka Latuyalaka. To keli ekila le Latuyalaka.

³¹Naka untu nangaka ntshungula engo kakandakimo lu etenyi ka dikumi, dieli la ndi dia mbahe etenyi ka tanu ladiku diato.

³²Tenyi dia dikumi tshe dia ngombe la ekoko, etenyi ka dikumi tshe ka nyama tshe katetaka la tshina dia danga diʼulami, kayuyala ekila le Latuyalaka.

³³Untu tashishimaki kana nyama keko ololo kana kolo, tahimbaki kiengonya. Naka ndi ambukiengula, ku nyama yako hyendi, ndu to ndu kene kengudiwo, yayuyala ekila. To hakieyi ntshungwama.[94]

³⁴Oso eli adjangu wakadjangela Latuyalaka Mose dikambu dia asi Isariyele lʼUkungu a Sinai.